「獨立」?諗清楚自己想要啲乜先

cc photo by flickr user aussiejeff

cc photo by flickr user aussiejeff

曾幾何時,國家「主權」係講緊「皇帝大晒」,想點就點。部份國家推翻君主制度,就變成「(某啲當權嘅)人民大晒」。但係今時今日所謂「獨立」,其實諸多制肘,所謂「獨立」只淪為虛偽嘅姿態。

歐洲諸國,德國法國英國呢啲,算係「獨立」喇掛?但其實佢哋作為歐盟[1]一分子,已經將好多傳統上被認為係「獨立」國家擁有嘅權力,外判咗俾歐盟。歐洲大部份嘅「獨立」國家,冇自己嘅貨幣,冇入境審批權,本土法律唔可以凌駕歐盟法律,其實制度上個情況唔好得過香港幾多,甚至可以話香港制度上嘅獨立,比歐盟各國更大[2]。只不過係香港冇獨立嘅軍隊,所以 u no gun 啫。

台灣個情況更加有趣。連軍隊都有埋。不過據講因為國際唔承認,所以唔算獨立喎。我無意批判台灣任何事,只係想指出,台灣嗰種追求嗰種「獨立」(at least 部份派別),其實係「俾我埋堆」。同「獨立」嘅字面理解其實幾唔同。

喺全球一體化嘅趨勢之下,經濟獨立已經係冇可能。政治嘅獨立,如果冇經濟獨立,其實係呃人嘅。啲人都識講中美咁多貿易關係,點會打仗吖。咁咪大家作下狀俾下面囉。至於文化嘅獨立,主要係靠自己,冇人迫到你嘅。通常反而係啲人自貶自己嘅文化,然後外力先有機可承。

所以,如果要講「香港獨立」,最好搞清楚自己想要啲乜,同埋「獨立」咗係咪真係可以解決心目中嘅問題。呢一點係好重要嘅。以前泛民令你相信「建設民主中國」香港人就有好日子過,呃咗大家廿幾三十年。「香港獨立」好有可能變成同類型嘅迷思。事關好多諗嘢唔太清晰嘅人,可能一時唔為意「解決一個小問題,容易過解決一個大問題」[3]。至於呢個謬誤有幾 on9,我都係唔重覆人吔之前寫過嘅嘢喇。條 link 喺下面自己睇啦。

事關大家都好易對呢啲文跳掣,我都係不厭其煩澄清返先。我唔係反對「香港獨立」本身,「民族自決權」呢啲咁左膠嘅嘢我都識架。只不過「香港獨立」呢四隻字代表啲乜,似乎虛無飄渺,冇任何實質內容。如果自己都唔知自己想點,咁咪最好搞清楚同講清楚自己想要啲乜囉。如果明知個口號空廢都照講⋯⋯咁你同支聯會鳩嗌「建設民主中國」有咩分別?
————-
[1] 我知佢哋唔止得「歐盟」嘅。例如歐元區又唔係歐盟、法庭有又有幾個,etc etc. 不過重點不在此,反正呢啲濕鳩嘢就交俾學者慢慢呃你哋 like 啦,我又唔熟書。
[2] 呢啲嘢國際政治專家會同你講咩?不過陳雲好似講過。事關被扑,冇得引用,link 都慳返~~ XD
[3]: https://www.facebook.com/hnfong/posts/678808343837

散彈一號

全職文字工作者、應用哲學家。對「邏輯一致性」、「系統複雜度」之類的偏門學問獨有心得。在美利堅合眾帝國邪惡資本主義集團的領導下,嘗試改變世界。

More Posts

高人指點

comments