咩係法西斯?

cc photo by flickr user halfrain

cc photo by flickr user halfrain

明明,你嘅文字,有幾百萬人睇得明 —— 不過唔准寫;
明明,你嘅說話,係幾百萬人嘅心底話 —— 不過唔准講;
明明,你嘅理念,唔影響到其他人嘅生存 —— 不過就係必須殲滅嘅邪魔外道。

好多人搞唔清楚「唔准」嘅意思。好多時「唔准」只係廉價嘅姿態,冇實質效力。「得個講字」嘅「唔准」,唔算法西斯。例如我隨便講一句:「大家唔准玩 Facebook!」,係廉價嘅,係冇人理會嘅,亦都係不必理會嘅。但係如果我係你老闆,手持生殺大權,而我好認真咁同你講:「如果你再上 Facebook,信唔信我炒咗你吖!」咁就一啲都唔廉價喇。

所以,一個冇能力、冇影響力嘅人,做唔成法西斯。最多係不斷亂噏嘅痴線人士。

法西斯嘅根本問題,就係利用自己嘅客觀優勢,壓迫其他人嘅言語同思想,而呢啲壓迫除咗意識型態或意氣之爭之外,其實無關痛癢。例如話,香港人講廣東話,寫廣東話,唔會令中國人損失咗任何嘢 (除咗未必聽得明你講乜)。如果政府跳出嚟講「唔准講!唔准寫!邊個咁做就唔合格!搵唔到工!我叫全世界都杯葛你!」咁就係法西斯。又例如有人講句粗口 (又唔係鬧你),你睇唔過眼,然後跳出嚟指控人哋係「撒播仇恨」、叫人「文壇消失」,咁如果你真係能夠實行你提出嘅恐嚇,咁你就係法西斯。

當然啦,好多鬥爭,牽涉好多利益。例如政黨 A 攻擊攻黨 B 嘅理念,唔單只係理念之爭,亦係生存之爭。每個人都有爭取自己嘅生存嘅權利,沒有誰比誰更高尚。生存嘅權利,唔單止係衣食住行,仲包括實踐理想嘅權利。正所謂古語有云:人冇夢想,同咸魚冇分別。所以自己實踐自己理想,唔需要道德證成。呢個係生存權利嚟。

當然啦,有啲人嘅理想,寧舍法西斯。例如有啲人嘅理想,係希望全世界嘅人都信奉某套意識形態,信奉某套 XX 主義、YY 道德、ZZ 理論,不得異議。咁樣嘅「理想」,實踐起嚟絕對係法西斯。仲好排外添。

吓?咁點算?我冇點算架。我都冇話唔准人哋有法西斯嘅理想。你估我係法西斯,唔俾人有自由意志咩。

一開始都話我大愛包容架啦。只不過如果搞到我嘅主體性我會反抗之嘛。

—-
伸延閱讀:關於主體性,可以睇下呢篇文https://www.facebook.com/localist.theory/posts/550251275130403

shot@gun3.com'

散彈三號

本土理論家,吹水唔抹嘴

More Posts

Follow Me:
Facebook

高人指點

comments