我哋心底都係一個崇尚自由嘅左膠

12525459_943496465757344_2487319433987539868_o
 
你話我中唔中意小店?我係中意嘅。正因為佢唔係「大量生產」,品質無保證但同時可以有驚喜。當你要大量生產,喺新鮮程度、精巧程度上就一定要取捨,變得好單調,好單一,好沉悶,所以連鎖店嘅「心思」係不及小店,呢個係真嘅。
 
然而,同樣係因為生產同資金上嘅限制,小店要離罩一定會比起連鎖店更離罩。因為:哪有錢,你老母!
 
小店唔係必然好,連鎖店唔係必然壞,呢個我原本以為係常識。但世界上原來有啲人,睇嘢真係唔係睇實際情況嘅,而係按照佢哋劃分嘅分類同階級去取態嘅。即係,大陸人就自動等如慘,香港人就自動等如係有責任去幫大陸人。又例如工人階級係一定啱嘅,總之做老闆就一定係仆街係賤人黎嘅。又再例如美國係一定萬惡嘅,其他國家一定係慘嘅。又又例如今次咁,小店一定係好嘅,連鎖店一定係邪惡嘅。
 
咁如果由小店做到變連鎖呢?
 
所以我哋睇事物,唔應該由「身份」、「階級」去做出發點,咁樣只會陷入一種盲動嘅「論述」之中。要睇,係睇我哋講緊乜嘢議題,想做到乜嘢目的。
 
例如我哋要搵學生飯堂,我哋要考慮嘅可能有:價錢、質素、䘙生、同埋好可能比外界更多嘅社會責任。呢個先係考慮嘅出發點,點解要「喺學校範圍內」幫小店,我睇唔到有咩理據去支持呢一點。如果話政府要推動「個體戶」去創業,我反而更覺得有理由。
 
大學作為一個「相對無咁銅臭」嘅地方,要求飯堂、餐廳有更多社會責任,係可以理解。而好老實講,小店未必就一定比連鎖店好嫁喎,甚至可以預見,喺好多情況下甚至會更差。因為講到尾,佢哋無資源嘛。請個人都差啲搞唔掂,仲話要 OT 補水要最高工時要關愛要請弱勢社群?條數點埋?講真,去到呢個位,連鎖店係有更充裕嘅資源去達到上述條件。
 
所以,一味對立「連鎖」同「小店」,老實講,既愚且倨。講真,喺一啲不停話要「理性對話」嘅人口中講出黎,好難聽,只係為咗追打出黎撼莊嘅新莊既話,就更加係居心叵測。
 
再一次,喺文化取態上我堅決地支持多元發展,小店嘅價值在於此。但係喺考慮學生飯堂時,並唔係話「小店就要支持因為支持小店等如支持弱勢」,而係應該提出一把尺,喺考慮時用呢把尺去「公平地」量度所有投標者。
 
咩叫公道?公道何價?明乎此,就會明白呢種階級論述嘅盲點係幾咁有毒。

林非

離經,不欲縛於經書舊說。八十後,以追求人生自由之道為己任。

More Posts

Follow Me:
Facebook

高人指點

comments