今日凍到咁,應唔應該停課?

圖片來源:蘋果日報

圖片來源:蘋果日報

話說教育局宣佈小學幼稚園特殊學校停課,學民思潮就話要求中學都停。同時間據講某啲學校例如德望中學自行停課。

究竟應唔應該停課呢?老老實實,一年凍得嗰幾日,今次仲要係世紀寒流,停課係冇咩問題嘅。如果天氣對學生有危險,停課係一個合理嘅決定。

只不過,係咪真係一定要由教育局宣佈港九新界全部學校一齊停課呢?我就有疑惑。大家最近都一定留意到,香港地大物博,各個地區嘅天氣都略有不同。新界北區通常凍啲,離島大風啲,市區暖啲,山頂凍啲,如此類推。香港嘅學校,亦都遍佈各區,所以每間學校嘅情況都會唔同。
一個比較合理嘅處理方法,就係學校自行決定使唔使返學,好似德望咁。話晒啲中學校長逗緊六位數嘅人工,雖然比唔上局長咁多,但校長都唔應該好似廢青咁冇用,應該識得作出正確決定架喎。(係「應該」。)當然啦,你話跨區返學嘅點算?可能人哋住打鼓嶺但喺九龍塘返學呢。咁冇計架,家長自己都應該有能力判斷情況係咪安全架嘛。(係,又係應該。不過睇尋晚仆倒上大帽山嘅人就知呢個假設有幾可靠。)唔通全香港有三個家庭返唔到學,教育局就要宣佈全港停課?

雖則話吳克儉睇完萬卷書走萬里路都係垃撚圾,不過就算我坐佢個位,都好難做架喎。如果唔宣佈停課,咁萬一有個學生出咗意外,咪入我數?如果因為一個半個學生有危險就宣佈停課,咁仲洗返學嘅?雖然話做官就係要平衡各方面利益,但點平衡?一停就全港停,一返就全港返,兩樣都未必係最好。最好嘅,當然係由熟悉各區實況嘅人,有切身利益嘅人,自行決定。呢啲就係 #本土派理論,泛民左膠係冇可能學到嘅。

學民思潮喺佔鐘嗰陣不斷講咩「命運自主」,但最後連中學生返唔返學,都要叫一個京官大老爺[1]去斷定,真係好自主,好民主!至於中大左膠莊嗰筆就唔評論喇,中大建國呀嘛,邊論到我呢個港大畢業生出聲

🙂
—-
[1]: 局長係中央政府(i.e. 北京)委任架

散彈一號

全職文字工作者、應用哲學家。對「邏輯一致性」、「系統複雜度」之類的偏門學問獨有心得。在美利堅合眾帝國邪惡資本主義集團的領導下,嘗試改變世界。

More Posts

高人指點

comments