識揀,一定揀個講粗口嘅老婆

所謂窈窕淑女君子好逑,古人云賢妻良母需入得廚房出得廳堂,家母云好媳婦需打得四圈捱得M記。而網絡上《識揀一定揀個________女朋友》之類嘅文章亦唔少,不過比我揀,一定揀個會喺我面前爆粗嘅女仔做老婆。

有位朋友成日話:情侶相處,當大腦內嘅dopamine 濃度降低,先係難關嘅開始。老老實實我都唔知佢噏乜,不過講到底,情侶兩人之間貴乎真誠,唔只係講緊唔呃對方,更加係講緊唔做作。事實上你嘅伴侶就係你喺亂世中嘅一個避風港,等你可以做返最真嘅自己,令你覺得舒服、自然。試諗下,當你每日如果你工作累鳥嘅時候,返到屋企仲要喺老婆面前扮小丑,真係不如一槍打死我.jpg 啦。所以你話,情侶之間真誠係幾咁重要呢,而正正係因為咁,一個肯喺你面前爆粗嘅老婆,無得輸。

一個女仔喺你面前講粗口,代表佢唔扮矜持,唔扮女神,更代表佢一啲都唔在意乜嘢仙氣。自己喺其他人眼中究竟係點,佢唔在乎,亦都唔希罕。同樣嘅原理,當佢成為你嘅女朋友,甚至妻子,其他人點睇,who cares?捱M記好寒酸咩?So what?男友Package 唔夠好啊?So what?其他人對你,以及對佢嘅評價,佢一啲都唔在乎,佢只係在乎你係一個點嘅人,同埋佢自己開唔開心。咁樣嘅一個女仔,會肯同你捱M記、肯默默支持你。得女如此,夫復何求呢?

同時,爆粗亦代表一個女仔只忠於自己嘅真性情,有嗰句講個句,甚至有少少男人婆。咁樣嘅一個女仔,多數都會係諗乜就講乜,唔會同你搞咁多暗示諗咁多話中話。當你嘅朋友仲係度同你呻緊自己女朋友口講無所謂,但又嫌三嫌四嘅時候,一個爆粗嘅女仔,多數只會同你講句「是X但啦」就算數,或者想食乜就同你講食乜。做男人嘅,你心知肚明,女人諗乜嘢,連女人自己都唔係好知,更何況做男人嘅你?所以如果一個女仔唔賣關子,唔玩暗示,作為男人,你完全無唔娶佢嘅理由。

再者,講粗口嘅女仔,一般嚟講都唔會高高在上。至少做佢男朋友,你唔需要滿肚墨水出口成文,亦唔需要擔心高攀唔起,更唔洗唱返首《高山低谷》。一個講粗口嘅女仔,唔會太離地,唔會聽到粗口就打冷震。要理解一個平凡嘅人,就必須要平凡,你見劉鳴煒可以講得出去少啲日本嘅偉論,就知紈絝子弟係冇可能明你班普通人諗乜啦。當你見到一個女仔講粗口,唔洗資產審查都知佢唔會太離地,至少一定明你。揾老婆,無非都係想揾個明你嘅人啫。

總之,一句講哂:識揀,一定揀個講粗口嘅老婆。

yuk@lung.com'

亦龍

對科學深感興趣,但也不討厭寫作的怪人。格言是「問題並非『做不做到』,而是『如何做到』。」

More Posts

高人指點

comments