香港讓座文化三問

"C-Train優先座" by Andyhyleung - Own work. Licensed under CC BY-SA 3.0 via Wikimedia Commons.

“C-Train優先座” by Andyhyleung – Own work. Licensed under CC BY-SA 3.0 via Wikimedia Commons.

高談闊論倫理道德問題總係容易嘅,尤其關於資源分配時。

「有需要嘅人優先享用該資源。」一句說話已道盡資源分配嘅原則。

但何為有需要人士呢?

呢個唔單單係講緊有需要人士嘅定義,同埋乜嘢資源該優先分配畀有需要人士呢啲原則問題,而同時都係講緊當我地搞清楚呢啲問題後,如何分辨出呢啲有需要人士。

呢個係技術性問題,而係讓座行為中,呢點尤為重要。

如何分辨出有需要人士?

其實一個人有無需要坐,或者有幾需要坐,唔係憑肉眼分辨得出,就如圖中位女仔,睇上去同常人無異,但其實係身受燒傷之苦,比起一啲持老賣老嘅人更需要座位。

我又有一個朋友,因為心臟有問題,所以唔可以長時間站立,否則會頭暈,所以佢已經唔會坐地鐵啦,因為佢只係一個年青人,心臟病又無表面症狀,莫講話叫人地讓座畀佢,就算係自己見有位坐低,恐怕都被人話係廢青,受千夫所指,於是,佢索性選擇唔再搭地鐵。

呢啲係咪個別例子?當然係,因為咁後生又咁多病痛,咁需要座位嘅人始終係少眾,但偏偏就係呢種病態嘅讓座文化歧視呢班少眾,拒佢地於地鐵門外。

病態嘅讓座文化永遠都只係一種歧視。

同時,其實香港對於工作保健方面真係做得好差,莫講話地盤、運輸呢啲勞動工作,就連辦公室或者服務業都有機會因為長時間工作而受不同程度嘅勞損,呢啲都會令佢地需要座位。

我唔係話年老同需要座位嘅程度無關,但係其實都有更多因素需要考慮,年齡從來都唔係唯一因素,你點樣從眾多乘客中搵到最需要座位嘅人?

點解唔係有需要嗰個主動問人地可唔可以讓座畀佢?

就如頭先所講,我地好難憑一雙肉眼就睇得出人地有幾需要呢啲座位。所以,點解唔係覺得自己有需要嗰個問人地可唔可以讓畀佢?一定要坐低嗰個做主動者?咁樣一啲都唔合理。你不如試下賣旗時,自己企喺到,睇下有無人買?先唔論原則上,其實大家都係使用者,其實都有權坐低享受服務,而讓座只係美德。技術上,有需要嗰個主動問人,都會令喺實踐呢樣美德時更加方便。人地唔主動讓座就鬧人,其實係將讓座當成老奉,無體諒到呢個只係美德嚟,而美德只係超義務。

點解係唔讓座就要被人鬧?

有無人試過唔買旗所以被人鬧?呢個聽落好荒謬,但係唔讓座而被人鬧,大家就成日聽聞。其實讓座只係美德,如果因為年輕就一定要讓座咁只係另類歧視。其實大家都係乘客,大家都有權坐低,如果你客氣咁問人,一定會有人讓座畀你,點解要鬧人,甚至拍低擺上網公審?相反,其實讓座係值得讚揚,只有讚揚先鼓勵到人做呢個行為,而唔係責罵。

philo@boy.com'

哲學仔

哲學,代表理性;仔,代表感性;睇落去係情理兼備嘅感覺。 一個哲學愛好者嘅心路歷程。

More Posts - Website

Follow Me:
Facebook

高人指點

comments