教畜好似真係覺得自己大晒咁

cc photo by flickr user Movies in LA

cc photo by flickr user Movies in LA

所謂國有國法,家有家規,學校有校規總少不免,但有時班教畜處起事上黎,係可以惡過依家個政府。(教畜只形容為相當有問題,誤人子弟的教師)

首先,基本上冇野可以令到佢地驚,佢地亦會覺得 閣下唔會夠薑搵法律途徑或者傳媒相助,所以佢地就可以係幾呎土地上,自立為王。

話說當小弟重讀緊中學嗰時,班上有對情侶而且重行得好埋,校規冇明文禁止拍拖,而校方普遍上亦對情侶既規管(不論規則或執行上)都比較寛鬆。但好可惜,有一日呢對情侶係某間M記到親暱(當然未去到犯法既程度),然後畀我地影咗相,之後當然係啲群組到互傳啦。最後,就傳咗落去某老師既耳中,然後就轉介咗去訓導到。

講返少少背景資料先,雖然嗰間M記離學校唔遠,而我地當時就只有一個人著咗校服(非情侶)所以基本上對情侶都係同返訓導講,呢啲事務係屬於佢地私人事,何況當時冇著校服,又唔係犯法,學校亦規矩寫明唔畀,有何不可?

當時,我地呢班在場既花生友亦有被訓導傳召去寫口供,但唔知點解,我地都畀佢地鬧到狗血淋頭,話我地只顧食花生,仲要私下互傳,影響學校聲譽。花咗我地成日時間,畀唔同既訓導老師鬧足一日之後,就話會開會商討點樣作出懲處。

結果,對情侶既男方就被記兩個大過,一個係因為係影響校譽,第二個係因為佢係主動嗰方,女方就一個大過。而我地幾個花生友就各記一個小過。

我地幾人同對情侶當然唔服,如果對情侶係著住校服做親暱既事,我覺得訓導懲罰係情有可原,先唔講校規完全冇講係禁止,但我地學生係私人時間做私人事都要被監管,略嫌有點過份。況且學校咁樣罰埋我地班花生友,就真係完全吞唔落啖氣。

之後,訓導約見我地咁多人既家長,我地家長一概都冇出席。幸好既係,我地眾人既家長都覺得學校咁做好離譜,無法無天,如果學校執法唔跟校規做既,咁同班慈母其實係冇分別。個個當自己山寨王,鍾意點做就點做。

更好彩既係,我地其中一個人係識校董會既人,之後訓導就梗係暫時地被收咗皮,呢件事就更加處理得虎頭蛇尾,剩係每人勸喻幾句就散咗水。

結論係,眼見時下班教畜做野越黎越過份,因循守舊唔在講,做野完全真心覺得自己大晒,某部分重以欺凌、愚弄學生為樂。現時家長既態度更加出現兩極化,一邊就怪獸家長,另一邊就對學校唯唯諾諾,寧得罪子女莫得罪學校。怪獸家長講野冇道理都唔係第一日既事,校方係完全唔怕佢地搞大件事,因為道理係學校個邊。另一個極端既家長就更加唔洗驚,點恰你個仔都視若無睹,梗係盡情恰啦。

教畜氣燄絕不能助長,青少年係將來社會既棟樑,如果再畀呢啲咁既教育教化,小弟真係想像唔到將來個社區會變成點。

派拉特

沒有文字,又怎能說心事?

More Posts

Follow Me:
Facebook

高人指點

comments