等到頸都長嘅丹麥交流生又係食啲咩㗎?(五)終極篇

唔知你重記唔記得,今年曾經有股熱潮,大家爭住post不同地方嘅exchange學生食啲咩呢?唔知你重記唔記得,有個傻瓜已經喺到寫咗四篇佢身在丹麥嗰時嘅食物生活呢?如果我話俾你聽,原來嗰個傻瓜真係咁有心機,打算再推第五篇,你會唔會繼續捧場呢?:’(

嗰個傻瓜講過,要留返歡樂嘅聖誕節下次分享。佢好守信用,今日翻開久違嘅exchange相簿,那年被寒風冷雪冰封的回憶解凍了,溫暖同香氣又活靈活現咁重現面前……呢一份感動,好想喺咁應節嘅日子,同大家一齊再經歷一次。

第十站:Christmas Party

繼捷克香港薈、他鄉遇故知兩大難題後,傳說中嘅終極挑戰出現了 — Christmas Party!Why so serious? 咪以為係買支酒嚟亂劈一餐嗰種,我哋好健康嘅。咁有咩搞作?都係煮飯仔~至於點解咁災難……

事緣交遊廣闊,international朋友愈來愈多;喺咁國際化嘅組合裏面,臥虎藏龍,個個都隨時係廚藝高手。偏偏喺呢個setting之下,大家有個益智提議︰文化交流!一於每人煮一道菜啦!雖然你會覺得係小學活動,但其實有意義過去灌酒啦!

已經煮到十二月,我都重係無咩自信。其實有啲似大長今御膳比賽咁,淨係諗煮咩餸已經搞咗兩三日。不過講起又神奇,如果有睇第一篇,可能會有印象;我有個奇怪夢想,就係異地煮南瓜。所以喺苦惱嘅同時,一合埋眼就見到南瓜個樣。呢個情意結最終驅使我決定以南瓜為題做我嘅signature dish 😛

而我嘅心血結晶,就係南瓜湯啦。全靠roommate畫龍點睛,行超市我見到蛋撻皮,感慨exchange無機會試到自己焗蛋撻,佢就話不如買一條蛋撻皮返去再倒啲南瓜湯落去,會唔會grand好多?果然good idea,我即刻買咗一條,一共十個蛋撻底,份量啱啱好。

開始大製作啦!煲咗咁耐都係咁淡咁稀、無咩口感嘅?於是絕世好橋又翻兜 — 喂,雪櫃碟用上次買咗嗰袋10 kg薯蓉呢?加埋即刻好好多,話咁快已經接近完工嚕!
好彩隔幾幢平房就係party場地,唔使捧住個湯煲搭巴士,行幾步已經到。我哋換上dress code要求嘅紅色衫出發啦!

一打開廚房門,好多朋友仔已經到齊,但佢哋唔似廚師,似裝修師傅多啲……因為聽到揮刀劈柴聲(!)原來,有朋友別出心裁,準備咗起薑餅屋嘅材料啊!
起屋:好攰啊,啲膠水咁唔夠黏力嘅……(七彩繽紛、中間係黑色嗰啲!教人聞風喪膽之lakrids出沒注意!!!)

DSCF6458

DSCF6459

燒鴨、沙律、薯蓉芝士焗西蘭花、我嘅南瓜湯脆撻同roommate嘅檸汁三文魚、重有香蕉朱古力甜品,色味俱佳,大快朵頤。

20131206_191702

DSCF6434

當然唔少得快樂薑餅屋啦!原來棟牆係自家製自己焗,薑味超濃,我最鍾意薑味㗎啦!

DSCN1776

我哋幫條村起咗個名,叫Den Lille By (The Small Town)。國旗都有埋,紅白色調除咗令,重好有聖誕氣氛呢!

DSCF6477

食飽飽,重有壓軸嘅衾棉胎,大家用各自母語講數字,廣東話、日語、捷克語、普通話、西班牙語、荷蘭語、英語……我今晚真係學咗好多嘢啊!
最後有爆趣嘅交換禮物環節,兩粒骰仔擲嚟擲去將氣氛推至高峰!(返香港之後再同其他朋友用呢個方法抽禮物,100%成功製造歡樂!)

20131206_211005

可惜快樂嘅時光過得特別快,今日一別,以後唔知重會唔會再見。大合照、相擁之後,住得近嘅我哋企喺寒風中,目送一個個瀟灑嘅單車背景風馳電掣,呢份回憶就好似雪糕心太軟咁,剛啱先溫暖完又一盤冰霜來襲。

第十一站:包餃子

話說幾位Mainland同學仔一時技癢,想自製餃子咁話喎(又搶我臺辭……我都想喺丹麥自己整餃子、湯丸,etc. ) 所以趁考試前盡慶,請我哋去佢哋府上進膳。高手雲集小屋中,由餃子皮到餡料,重有蜜糖煨蕃薯都一手包辦!佢哋開唐餐館一啲都唔輸蝕囉!有個同學雖然因為不諳廚藝而次次都無煮嘢嚟gatherings, 但佢屋企原來係賣餃子嘅!今晚重唔係佢show time?!

20131207_183403

包完食完又玩,又衾棉胎,輸咗就罰酒。有人前嗰排送咗支38%嘅Vodka畀我哋,反正無可能自己飲,不如唔好㩄,攞嚟搞cocktail一人一啲就容易得多啦!加埋啤酒、果汁、紅酒、可樂……好似幾恐怖下(重點:左上角!)。如果唔罰one shot呢杯恐怖特飲,可以係被畫花面咁囉。

20131207_183306

呢一晚,大家都被38% vodka消毒到一乾二淨。

第十二站:再會.捷克

轉個頭啫,個個都考完試,重開始執包伏走啦!為咗要一個捷克好朋友補返一餐由九月講到十二月都未食到嘅飯,我帶晒材料,獨自坐咗好耐巴士,冒住冷雨去咗個未去過嘅suburb,蕩失路到終於要打電話叫佢嚟接我……先至食到嘅煮飯仔。第一篇提到嘅生菜包,就係我帶去嘅其中一味餸。除咗薯仔,重終於清埋summer exchange朋友送嘅五香肉丁罐頭。

20131216_204749

至於捷克菜,今次雖然得一個人煮,但都一樣咁出色,例如薯仔湯(本以為Kyselica或Bramboračka,經查證後並不全然):

20131216_201243

今次有影上回提及嘅Goulash,重有Knedliky陪伴在側,佢哋今次喺返埋一齊嚕!

20131216_210552

佢兩三日之後就走啦,獨自歸家嘅時候,又係告別時。

第十三站:最後的合作飯

炒啊炒、炒啊炒……曾經以為會無限loop嘅炒飯生涯,到今日終於要完啦。一個人去完Odense,返嚟之後抖多一兩日,大家各自有另一群友伴開展聖誕Mega Tour,陸續開始執拾行裝準備。望住曾經逼到爆嘅雪櫃得返一條香腸同見到樽底嘅果醬、溫習用嘅筆記由書架變晒落廢紙回收箱;大家買返香港嘅手信由房間飾物收返入行李箱,重有沖涼房嘅洗頭水沐浴露、洗面刷牙嘅用品……全部都唔見晒,莫名嘅傷感就會湧上心頭,留下一份空虛。

最後一餐exchange合作飯,我哋都係選擇咗風雨不改嘅炒飯。有甜甜嘅白蘭瓜,再苦都會係甜嘅!多謝你,希望以後有機會再合作,嗰份難以言喻嘅默契會藏喺我嘅美好回憶裏面。

20131221_172926

佢終於喺一個黑到伸手不見五指嘅清晨,拖住個158 cm同50x20x40 cm嘅行李踏出咗房門。其實我晏晝都要走啦,不過我會再返嚟一次,嗰日出發前物盡其用,整咗啲咁嘅嘢:

20131222_141705

係南瓜餡嘅lasagna,唔小心加咗roommate買錯又用剩嘅blue cheese >< 其實即係咁: 20131221_142821

真正check out之前……嗯,我煮炒飯的,然後由Aarhus拎到去Hamburg叮叮做都咪話唔厲害!
Aarhus(係,嗰碗係剩返最後一撮夏枯草):

20140102_215408

Hamburg:

20140104_230636

第十四站:別了,丹麥

歐遊完返Aarhus,去咗一個朋友屋企暫住,最後一次係Aarhus自己煮飯。一包現成蔬菜加勁霉魚柳,同埋用得唔好留畀人嘅印度黃咖哩撈飯,無咩值得欣賞。

20140113_203156

朋友心血來潮個蔬菜雞煲先係重點……兩個人食喎……

20140115_090759

唔知其他歐洲國家係點,但喺Aarhus,聽講有兩樣嘢唔係好食得,一係街知巷聞嘅lakrids,二係金玉其外嘅壽司。繼續留洋嘅Mainland同學喺最近一日同我哋farewell請我哋食飯,順便送我哋上機場巴士。佢哋就係請我哋食壽司啊啊啊啊啊!

20140115_124145

其實,都無咩事啫。

飛機起飛啦,雖然呢一刻食緊嘅係飯來張口嘅飛機餐,但又點及得上嗰日為咗趕上兩點堂而五分鐘食晒嘅白菜意粉、嗰煲因為意外而發現嘅電飯煲粥、甚至係嗰碟炒燶嘅椰菜呢?

丹麥的回憶,一直都在。想繼續追夢嗎?在丁丁blog之《浮翠流丹.麥穗在心》與《廚丁一分鐘》就找到足本回憶啦!內容陸續更新!
www.clairdeluneeauvague.wordpress.com

又或者,這裏都可以:

想真正重新出發?由《浮翠流丹.麥穗在心》Op.1 No.1開始吧!

隨函附上附圖,文中以括號註明圖片位置,圖片均來自本人。

tntintin88@yahoo.com.hk'

丁丁

只要在同一片天空下,就有夢想環遊世界、熱愛音樂與寫作的丁丁。

More Posts

高人指點

comments