已婚的男人最好吃

cc photo by flickr user kedai lelaki

cc photo by flickr user kedai lelaki

Weekend 下晝同 C 小姐去 café 飲野。其實我一啲都唔鍾意 café,每次飲完咖啡我心都會跳得好快好快,同埋我唔鍾意喺 café 睇書寫野。

但係 C 好鍾意。因為佢係一個藝文青。

<狂野奔騰的心,在慢慢停止轉動的杯子漩渦中,安眠安息。喝一口週末下午。>

我望住佢整咗好耐顏色,啱啱 po 上 IG 嘅 café 相,睇住呢句 caption,心諗,乜撚野事…… 妳可以有幾奔騰呀?妳跑完渣打全馬咩?仲要安息添。

C 係我以前做野識嘅朋友。我同佢性格唔係話特別夾,但曾經有一排佢好鍾意揾我傾計,不過幾年前轉 office,之後都少接觸。C 係一個好特別嘅人,所謂特別唔係指佢係一個唔睇書唔識藝術平時最鍾意揾咖啡做 IG model 嘅藝文青。特別,係指佢嘅戀愛態度。C 鍾意嘅男人全部都係有婦之夫,我識咗佢咁多年,以我所知無一例外。C 每同一個新嘅「人夫」一齊就會揾我飲野,同我分享佢嘅故事,而佢從來都唔會同我飲酒,只會同我飲咖啡。

「點呢?」

我望住佢用匙羹攪下攪下自己杯咖啡,杯野俾佢攪到就黎起泡。影完相就咁對杯野,好有中出即飛嘅感覺。Sorry,粗俗咗,應該係「鳥盡弓藏」至啱。

C 個樣唔係話特別靚,但係佢識得打扮。今日佢帶左副 Diane von Furstenberg 嘅黑超。

「冇呀,一齊咗咯。」

我夠知啦,屌。

「嗰次都同你講過啲啦,佢做物流嘅。其實,我都諗咗好耐…… 始終佢都有老婆,搞到人地好似唔係咁好……」

C 每次同一個「人夫」一齊之前都會「諗咗好耐」,但每一次最尾佢都會去馬。

其實我有啲明點解 C 一開始咁鍾意揾我傾計,以前喺 office 嘅大部份女人都好唔鍾意佢。當然啦,冇良家婦女會鍾意一隻狐狸精。而我,就唔會介意,因為我係一個男人,哈哈。

「咁妳今日唔洗陪佢咩?」

我望住窗出面,對面街係維園,呢間 café 喺銅鑼灣名店坊嗰頭。隔離枱有班中學生年紀嘅靚仔靚妹喺度温書做功課。其實有時我唔係好明,點解啲人咁鍾意去 café 做功課。

「Of course not! 佢 family day 梗係陪屋企啦。」

「妳唔會唔開心?」

問完呢條問題我覺得自己好天真。

「梗係唔會,呢啲野我睇得好開,我唔會介意個喎。」

C 真係可以睇得好開。我見過好多好多因為三角關係搞到好唔開心好痛苦嘅男同女,但 C 從來都唔會。佢熱衷於同「人夫」一齊嘅嗰種刺激,嗰一種「侵佔別人資產」嘅慾望。佢同我講過,曾經有一個男人為咗佢想同老婆離婚,不過最尾到冇,因為過咗一排佢覺得同個男人感情淡左,就同佢講分手。其實,我好知道 C 同佢分手嘅真正原因,C 要嘅係佔有一個已婚男人嘅成就感,但當一個男人要為咗佢放棄婚姻,拋妻棄家,咁佢就再唔係 C 想要嘅男人喇。

好快 C 就會揾過第個 target。古語有云﹕世上人夫何其多,問妳吃得幾多個。

「佢唔係揾好多錢,不過冇所謂,最緊要一齊開心嘛!」

C 飲咗啖咖啡。

的確,個男人有冇錢真係唔係佢嘅考慮因素……

「咁妳開心咪得咯。」

我唔係一個道德撚,佢媾邊個都唔關我事。作為佢朋友,見到佢咁放得開生活得咁開心,我都冇咩好 say。

「睇吓!啱啱去完日本。」

佢遞咗部 iPhone 過嚟,裡面係佢嘅旅行相,全部相裡面都只係得佢一個。嗯,有啲人就真係唔係好適合露面嘅,揸機得架喇。做物流有時又真係要出 trip 嘅,寓公「幹」於娛樂嘛。

「仲有呢個呢個,有冇睇呀?呢度啲紅葉真係好紅!」

……

我同 C 坐咗一個下晝,我諗我睇咗過千張相……

屌,好撚攰……

……

終於,去到最尾……

「好喇,都晏,我地走咯?」C 收好自己部電話。

我望下出面個天,已經黃昏接近天黑。

突然之間,我諗起細個小學作文﹕「日落西山,我們帶着沉重的腳步和依依不捨的心情離開了。」

喺呢個企起身走嘅蟆文,我真係覺得我腳步有啲沉重,因為我真係好攰。但係我一啲依依不捨都冇。

「你呀,其實 ok 架,快啲揾番個女朋友拍一陣咪結婚咯。」

聽到一個好似佢咁嘅人提「結婚咯」呢三隻字,我個心打咗個冷震。

「咚」

C 手袋裡面嘅手機響咗下。佢攞出嚟,望咗下,面露一個大笑容。

「點呀?又有活動?」

「係呀,佢話呢家得閒,可以祟出嚟同我 happy hour!」

冇錯,補充番,我同 C 從來都唔會去飲酒,因為佢飲酒嘅 quota 只會留俾佢嘅「人夫系列」。

喺呢一刻,C 笑得好甜。

kenneth@ng.com'

Kenneth Ng

請讓我當一頭港豬吧

More Posts

Follow Me:
Facebook

高人指點

comments