喂?唔該王家欣吖

圖片來源:作者

圖片來源:作者

「喂?唔該王家欣吖,我係坪洲嘅俊賢。」睇完電影《王家欣》,呢句嘢應該係最入腦。

《王家欣》以坪洲作背景,就好似多年前喺長洲戲院嘅《一碌蔗》咁,都會令大家想起屬於香港人嘅《那些年》。劉偉恆導演話九十年代係佢最開心嘅時代,我諗亦係好多香港人回憶最美好嘅時候。坪洲,因為隔咗個海,就好似俾人噴咗遲鈍劑咁,不論人同物,都停留響大家最珍惜嘅時代。士多辦館街坊小店,依然存在喺大街上面(請無視島上信和嗰堆地盤)。住咗半年,我亦好感受到呢度有城市冇嘅嗰種九十年代互相幫助嘅精神。

電影以1992年嘅香港做背景,講又南對一個街上偶遇嘅女仔王家欣一見鍾情,匆忙道別後想再搵佢,可惜淨係知佢個名,於是憑住王家欣當日嘅一句︰「等咗咁耐,冇理由唔等落去」作為一股力量,不斷搵電話簿,逐個逐個王家欣咁打電話去問,相信自己一定會等到心中嘅王家欣出現。

喺call機年代,一個人要完全咁消失,係一件好容易嘅事。但今日,「找尋」、「等待」呢兩個詞語已經變成史前用詞。仲慢慢揾?Google大神撳兩吓就有啦。約響五支旗桿度等,不見不散?你到咗再whatsapp我啦,我行住誠品等你。記得Wyman以前講過,咁多人叫「黃偉文」,唔知其他黃偉文做咩嘅呢?於是就響google上面search「黃偉文」三粒字,千幾個result,裡面包括黃偉文牙醫、黃偉文律師、賣魚黃偉文、賣古董嘅黃偉文等。咁多同名同姓,要揾啱,唯有一個一個咁去試,盡過力後,失敗與否,已經唔再重要,亦唔會後悔,因為學識睇開啲,就會係另外一個世界。

戲中又南唱作嘅歌詞「坪洲,點解咁兜踎」,真唔真?相對市區,坪洲舖頭細啲,選擇少啲,收得早啲,便利少啲,都真係兜踎。但換個角度,兜踎又有兜踎嘅好處喎。 好似戲入面,又南同泰臣無憂無慮咁行吓沙灘,踩吓單車釣吓魚,真係好多坪洲人嘅日常,亦係好多都市人恨都恨唔到嘅生活方式。至於導演拍出嚟嘅坪洲,除咗主場㬌“家安園”茶檔係搭出嚟之外,大部分都係忠實咁呈現,特別係碼頭外枝葉婆娑嘅老樹,平時都冇留意到原來咁靚。

而作為一個坪洲島民Junior嘅我, 對戲入面一個情節特別深刻。裡面講劉美君對外來人開新式cafe非常反感,叫佢哋「咪入嚟搞亂坪洲」。坪洲避世多年,早已擁有自己嘅一套節奏、一派寧靜,每當有一啲新事物出現擾亂,島民們難免會有強烈嘅反感。好似之前有對年輕夫婦一心想入嚟坪洲搞有機食店,供應西式熱狗,漢堡包,三文治等等,但聽講最後因為業主寧願轉租俾人開茶餐廳都唔續佢哋租,佢哋只好心灰已冷咁徹離坪洲。但又因為咁,島民們先可以將小島嘅傳統人文風貌保存到今日,令時空仍然停留響找尋王家欣嘅1992年。

呢幾年,香港人失去太多,得到太少。唔該,禮待坪洲呢個地方,唔好將佢變成另一個假日被淪陷嘅長洲。恆隊長,多謝你令我更愛上坪洲。 「喂?唔該王家欣吖,我係坪洲嘅小島洋蔡。」

小島-洋蔡

今年豁豁豁出去,成為坪洲人Junior,發掘香港真正嘅堅「離地」城

More Posts

Follow Me:
Facebook

高人指點

comments