街市火鍋。鮮入圍煮
同死黨慶祝生日，話想打邊爐wo。鑑於大家都唔想諗既關係，而地點方便：旺角，就決定你食啦 – 鮮入圍煮。位置係登打士廣場，即係好多Cafe果棟野，如果行樓梯就係正門入，如果搭Lift就係後門入，要特登行過正門先可以入座。
將街市同火鍋混埋，成為特色餐廳就係呢到既賣點。不論係有海鮮檔同菜檔係餐廳一邊比客人買到新鮮食材，定係裝修彷街頭風格（雖然裝修太新淨，咁果種味道），都有驚喜。
所有圖片來源：作者
基本上，同出面一樣，都係畫紙仔嗌材料。係海鮮類同菜類可以出出面嗌。每樣都明碼實價寫明幾錢，雖然係扮街市，但唔會學街市既衰野，將個「斤」「兩」寫到鬼成咁細隻字去呃你。
識得揀，湯底一定要「濃厚原隻雞煲花膠湯」，一底兩食。五個人，叫個大既先夠食，即係食先食雞同花膠飲湯，後用湯底打邊爐。
已經好肚餓，請你滾～滾起佢！
一打開，真係成隻雞係入面，好開心！咁，呢個湯底，點食先？首先，個人建議，每人分左花膠、雞、湯，三樣野暖暖胃先。數一數，花膠都有六七舊，平均每人有兩舊食到進補一下，咬啖，真材實料膠質足，正！雞呢，職員會幫手剪開，方便大家夾黎食，記得快食，唔係既，肉質就越黎越老。飲啖湯，味道濃郁，某朋友係咁飲係咁飲，差小小就見鍋底。
飲夠食夠先好加水同落其他材料，咁先保持到花膠雞湯既精髓味道。
其他打邊爐既材料就無咩好講，都係咁。如果講推薦既，炸魚皮、西班牙豬腩片、蝦滑；唔推薦既暫時得響鈴，堅唔掂。
P.S. 原本諗著等齊人先去睇海鮮，但係等等下食食下無左件事，最尾無嗌到 ._.” 哈哈哈，唯有下次再試
讚好「潮童焗飯」，收受最新資訊
餐廳資訊：
鮮入圍煮
電話：2782 2003
營業時間：星期一至日: 17:30-03:00
地址：旺角登打士街43H號登打士廣場2樓
高人指點
Follow 爾雅集