小秘密，那些躲在角落裡的回憶

刊登於 2015-09-18 By dingding All, 生活文化, 飲飲食食, 香港小故事

圖片來源：openrice；編按：我估係依間XD

（唔知寫呢篇係咪等於自爆身份，不過呢間茶餐廳真係俾咗我好多回憶⋯⋯）

「肥佬寫嘢！」
「呢度無肥佬呀！」
「咁靚仔寫嘢呀！」
「嚟嚟嚟，要咩要咩？」

每次去到同肥佬叔叔都總係要周旋一吓先可以成功落單。

中學時一放飯就要衝去小秘密，真係遲一秒都會無位（無位就要食隔離果間車仔麵⋯⋯）。霸到位之後要即刻叫嘢，因為佢地好多張台但係只係得兩至三個人做，吧入面兩個叔叔就算冬天得十二度都只會著件背心，大汗叠細汗煮嘢俾成百個學生食。肥佬叔叔佢地唔用紙筆記低你嘅order，只係靠記，但係即使你全台八個人叫完全唔同嘅嘢，你要丁通，我要牛米m佢地又要腿通／餐面／叉意，最多都係重覆多一次俾佢地聽，佢地就會完全記得晒。

而小秘密點解叫小秘密，我都唔知，細細個就知佢叫小秘密，過咗幾年先知佢真名。大概係因為佢位於街市後面條街細街，你唔細心搵係唔會搵到。唔知邊一日有第一個學生發掘咗小秘密，從此呢度就成為咗全間中學人人都知嘅大秘密，平時放飯去其他餐廳會有好多其他學校學生爭位，但嚟到小秘密，台台都係著住同一樣校服嘅自己人。（不過位就仍然難爭，因為真係好多學生嚟食⋯⋯）

小秘密嘅嘢食不外乎都係一般茶餐廳食物，一個送配麵，餐包／多士／奄列。我次次都叫牛通，佢地嘅沙爹牛真係不得不得了。再食多個奶醬多，（嘩有時唔係full house無咁忙，肥佬叔叔會加厚料俾我架），再加杯茶走，飽到唔郁得。食完起身走人，去收銀放低廿蚊，走得。當其他餐廳不停加加加，我由中一食到中七都只係廿蚊。小秘密當然都有加少少價抗衡通脹，但係中學果陣只要著住校服去食，佢地永遠收你廿蚊，中一到中七都係。

去小秘密食除咗食佢嘅牛肉同厚多士仲有食人情味。畢咗業之後都繼續特登走去食，食咗咁多年肥佬叔叔認得我就坐隔離同我吹水，問我點呀讀緊咩呀乜都吹一餐。最好笑係果年考完A level幾個星期返去食，佢一坐低就問「嘩考完試啦，大學畢業未呀？」之後每年暑假返香港都會約中學同學返去食，每次坐低都問「喂係咪今年畢業呀？」到今年，真係畢咗業可以答佢「係呀今年畢業呀」，佢竟然行埋嚟問我「喂入大學未呀？」

中一開始到而家十年，當其他餐應幾年就裝一次修裝到新新淨淨，小秘密入面仲係充滿七八十年代嘅感覺。呢間家庭式經營嘅茶餐廳咁多年來都無變過，牆上面嘅瓷磚由開業到而家都無變過，所有staff由中一到而家十年都係一樣，大家認得大家。

啱啱返去小秘密懷念一吓，味道依舊，只係埋單時再無學生優惠，老闆收我地正價三十蚊。係貴咗一半但真係完全願意比，話晒之前幾年餐餐都俾少幾蚊，同埋，都係時候資助返而家師弟師妹嘅學生優惠。