Heathrow Terminal 2真係好垃圾

刊登於 2015-08-31 By dingding All, 周圍旅行

cc photo by flickr user [email protected]

希斯魯機場一共有五個客運大樓，但Terminal 2喺我第一年嚟讀書嘅時候已經翻新緊（唔知幾時開始翻新），到幾個月前終於翻新好開返，叫咗’the queen’s terminal’。今次返香港第一次由terminal 2走啦（之前試過T2入境，一切正常），諗住新起好一定又新又靚又有效率，點知第一次喺度走就瀨野。

Terminal 2總共分4個zone，每個zone有幾間航空公司咁。我飛果間公司就Star Alliance嘅，喺Zone A，同時Zone A都有好多其他Star Alliance公司，大約八間到啦。咁正常去到機場都係揀返你嘅航空公司，跟住行過去check in或者寄行李，係咪？

但T2並唔係咁，最少Zone A唔係咁。佢嘅做法真係可以用七國咁亂去形容。首先你去到離境大堂，要先去kiosk度自己scan 護照揀位同申報自己有幾多個行李，跟住佢會print登機證同埋行李牌俾你，kiosk大約有十幾廿部，但係果度有好幾間航空公司，同因為果度好迫，幾部喺入面嘅kiosk行唔到過去，少咗幾部用，所以排呢個位已經打晒蛇餅。仲要好多人係推住架行李車排，完全擠塞。

唔止kiosk嘅隊同隊之間好混亂，排kiosk隊同拎完行李牌排寄行李嘅隊簡直撞到正，我九點幾去排真係極度混亂，好多人都唔知要自己check in拎埋行李牌先可以去櫃台度寄行李，結果好多人排到一半先被告知排錯隊，就要逆流推住架行李車行返出去，條隊本身就唔闊，所以真係亂晒大龍。真係唔明點解要咁做，唔可以去返自己航空公司有人幫你搞？職員搞一定快好多，我地個個塞喺個kiosk搞一輪先識用再入護照資料，都算行李牌都要自己貼⋯⋯真係有呀公呀婆唔識貼架⋯⋯

職員又係唔知做咩，淨係識叫人move forward move forward，有時有人推得慢，佢就推開你幫你推前架行李車⋯⋯大把人排寄行李把到一半，先行過去同人講：你排錯要行返出嚟再排過。總之就一鑊泡，都未見過有機場安排係咁差（之前T2未整好，我搭同一航空公司要去T3，都係去航空公司櫃台度有人幫你搞，唔知T2痴咩線整個新制又唔比多啲 info）

cc photo by flickr user Craig Murphy

但最好笑嘅都唔係以上所講，而係成個Zone A幾間航空公司嘅人都係排同一條隊等，咁條隊就行得比較慢嘅。排排下有職員宣佈話：搭某航班嘅乘客請從速去某個櫃台度寄行李，因為就快閂閘。簡單嚟講，你早去排隊都係廢嘅。永遠都有班機比你早飛但遲過你到嘅人插你隊。我地果日就偏遲到，但如果大家唔插隊我地應該係會準時寄行李入閘，就係太多人插我地隊搞到我地排咗好耐。到起飛前一個鐘我地仲排緊。終於等到有職員叫搭我班機嘅人插隊去寄行李先，即刻幾十個人推住架行李車插隊行去前面。當中好多碰撞，場面好恐怖。真係唔知呢個係咩安排，你整一條隊幾十架機嘅人一齊排，跟住每5-10分鐘就叫人出去插隊？我插幾十人隊我都唔係幾好意思啦，不過無計我插人隊之前已經有幾十人插咗我隊。

我唔係一個人飛，所有人加埋有十件行李，咁排排下隊啲職員話自己貼行李牌咁咪貼囉，睇咗一陣都識貼嘅。咁梗係唔會我一個貼，大家夾手夾腳貼晒一個行李一個牌就算啦係咪。去到check in desk（係被安排插隊，條友語氣仲講到係我地遲到，所以佢格外開恩俾你插隊咁）就俾晒所有護照佢同放行李上磅啦。個職員就幫我地開始搞。入咗3件落去地底之後佢先講，吓，原來你地唔係同一個booking reference架？咁唔得喎你地寄行李要跟返名。咁係可以理解嘅，因為安全理由。但點解你係我地寄咗三件先出聲？（當然係寄錯咗名嘅）咁條友就少黑面咁打電話去問，問完話你唔跟名寄要罰二千鎊架。我心諗咩料先，一嚟你係同我講要跟名，因為我地一早講咗係一齊。又就當我地亂放行李上磅係唔岩，咁你過磅落地下之前係咪有責任幫我對一對啱唔啱？

正常寄行李五分鐘之內實搞得掂啦，今次搞咗足足二十分鐘。佢一路幫我改一路話「嗱，就快閂閘，我搞唔到嘅你行李會上唔到機。」就算我有唔啱，你點都係大責任啲掛吓話，成件事好似我錯晒咁點先。最後佢話搞掂晒啦，我地即刻衝入閘，而果一刻顯示版已經講我班機係last call。

最後究竟點呢，喺Heathrow T2寄咗十件行李，返到香港係行李帶只係拎得返五件。搞咗一輪track到有兩件喺Singapore上唔切second leg班機，另外三件喺倫敦連機都未上。

利申：親身經歷有感而發，唔清楚其他terminal係點run。文筆唔好句子唔流暢，但只係想講下呢個新措拖嘅不足。