究竟京都仲有咩鋪頭行?

潛咗咁耐水,係時候要浮返上嚟啦。至於因咩事令我現身呢,就係因為京都8月有新嘅shopping mall開幕,同埋我之前介紹過嘅雪糕鋪又搬咗咁囉。

(所有圖片來源:筆者)

1.BAL

首先講下個shopping mall啦。其實都已經整咗好耐,等佢開幕可以話係等到我[email protected]#%#$咗好多次。而今年,佢終於整好咗啦!即係意味住我終於可以唔駛去梅田都有返間似樣啲嘅MUJI行啦!

我諗好多報章雜誌都應該有寫下呢個新mall有咩咁特別,所以我無謂再浪費時間係度講。比個official site你哋自己去check下有咩啱睇仲好過,而我自己個人最有興趣嘅係The Conran Shop同David Otto Juice,但係對其他舖頭真係無咩興趣,冇計啦。我唔係鍾意買衫嘅人所以服裝品牌呢啲我真係識條鐵咩。

想知有咩鋪頭喺呢個新mall度?click入下面條link睇啦。
http://www.bal-bldg.com/kyoto/

2.Handels Vagen

呢個上次寫飲食介紹時已經提過,所以佢有幾特別真係唔需要多講。想知嘅就搵返我之前嘅post睇下啦。

話說我前兩日喺三條附近睇完戲經過時,諗住入去食杯雪糕啦。點知發現個招牌改咗之餘仲裝修緊,仲話嚟緊會變做pancake鋪,我當時以為呢個雪糕品牌係唔係好似Amanda S.以前間法式糕點鋪咁全線接晒。真係驚到我以為我上個月食嗰杯雪糕已經係最後一杯。而當我返到房上佢官網睇之後先發現,原來佢哋喺新京極間鋪搬咗落地下街。我睇完即刻安樂晒!第二日仲即刻走去搵緊新舖添。不過去到發現佢大舖搬細舖,比起以前冇咁好坐,真係好唔開心,但係總好過無得食啦。你知啦,呢個世界上仲有好多人冇得食雪糕架嘛!總之鍾意食雪糕嘅朋友記得去新鋪支持下啦!

IMG_3550
新舖地址:〒604-8091 京都府京都市中京区御池通寺町東入ル下本能寺前町492-1
ゼスト御池 B1F

跟住我想介紹下買明信片嘅地方,但唔知有無旅遊書介紹過啦。不過就算有都唔緊要啦,因為呢間舖嘅明信片實在太靚,我唔介紹真係對唔住自己。

3.鳩居堂

鳩居堂就係我係寺町通發現嘅一間百年老舖。佢主要係買紙製品呀,畫呀個啲。有時一啲好舊式嘅筆記簿,便箋嗰啲你都可以係呢間鋪頭都搵到架。總之同文房四寶有關嘅嘢我諗你行入去都應該會搵到,而我最鍾意嘅就係佢嘅明信片。因為佢嘅明信片全部都係插畫,同平時喺啲名勝古蹟附近都買到嘢已經好唔同。喺街邊買到嗰啲全部都係啲攝影師嘅相印出嚟嘅,你買得多都覺悶啦。就係因為咁至令到我近來比較鍾意嚟呢度買明信片,因為我個人覺得啲畫真係幾靚。

7ab163a0151d4b2cfffda4c560494847

嗱,呢啲就係我之前寄過俾朋友嘅。
16d1ecdcdb16a62b8a2c680460921bc3

不過呢度嘅明信片嘅價錢係比較貴,因為佢用嘅紙係比平時街邊買到嘅硬身啲,同埋仲要上面印嘅係插畫家嘅作品。所以話,一分錢一分貨嘛。如果你想寄張特別啲嘅明信片比朋友,不妨可以考慮下嚟呢間嘢睇下啊。

地址:〒604-8091 京都市中京区寺町姉小路上ル下本能寺前町520

其實唔係淨係京都先有鳩居堂架。只係京都呢間係本店我至淨係介紹佢咋。如果你哋去東京旅行的話,都可以去其他分店睇下架。下面條link有晒其他分店嘅地址,搵間就腳嘅去睇下啦。
http://www.kyukyodo.co.jp/shop/index.html

今次我都唔係介紹咗好多嘢,下次有機會再介紹平時冇咩人會留意嘅鋪頭比大家認識啦。

miluku@gmail.com'

miluku

90後一名,冇特別嗜好,只係比較為食,所以間唔中鍾意周圍搵嘢食。

More Posts - Website

高人指點

comments