何以笙蕭默 (XDDDDD)

cc photo by flickr user knifegoeson

cc photo by flickr user knifegoeson

估唔到之前果個講彈結他同彈琴嘅 post 咁多人回應。其實我係覺得如果我照直講我按洞簫的話應該馬上無人回應,所以先以結他/琴為喻嘅。
 
不過我的確係識彈少少結他嘅。唔,其實我又唔可以話自己「識彈」,你識撳 chord ,識彈「低中高低高中高低」嘅分解和弦,唔叫「識」嫁嘛。但總之係呢個程度咁啦。
 
其實正題係,我入手咗一支低音 D 調洞簫,用尺八嘅概念理解即係「二尺三」,但實際長度係二尺四寸。按呢類超低音洞簫,少啲氣力同手指力量都舞佢唔掂。一般撳孔係用手指第一節嘅肚來撳最好,但呢類低音孔就要用第二節去按,靈活性同速度都大打折扣。
 
我諗過去搵一啲替代品,例如類似西洋樂器嘅鍵裝落去,但都只係諗下,而家首先要用正常方法舞掂佢先。呢支吹熟咗之後會好好玩,因為音域闊,低音極淳極厚,都幾好聽。
 
玩得吹管樂多,就會好感慨一樣嘢:吹管樂真係一音一血淚。每向下開多一個音,成支樂器玩法都會好唔同,唔似得用弦嘅樂器,佢哋要向下開四度、五度,將條弦設計得硬啲,粗啲就可以,當然,理論上共鳴箱係要配合返,但睇下小提琴就知,佢四條弦之間係各相差五度,淨係最低弦到最高弦都已經相差一個半八度有多。
 
吹管樂器個進路唔係咁。兩支樂器之間如果相差三度,已經算係喺運用同音色上唔同晒。即係小提琴同中提琴差五度,但同樣嘅改變放諸吹管樂上可能係講緊小三度、三度左右而已。
 
吹管樂要好聽,所以其實個音色真係好重要,講音域好難同鍵盤樂器,拉弦樂器鬥。何況你又無雙音(笙除外)。

(p.s.編按:隻編輯改個咁嘅題目,應捉去打靶)

林非

離經,不欲縛於經書舊說。八十後,以追求人生自由之道為己任。

More Posts

Follow Me:
Facebook

高人指點

comments