Like this say thing chun chit d mei?

刊登於 2015-08-11 By 擇言 All, 生活文化

cc photo by flickr user mark dolamore

是咁的，有朋友搞咗一個 Kongish Daily《港語日報》，風格類似十幾年前ICQ年代，用簡單英文，同埋大量英文拼寫嘅粵語寫成嘅文字。今日我戴頭盔，唔講贊成反對。我淨係想交代吓時代背景，同埋我預見嘅問題、展望。

講返少少背景先。我諗呢種混合語(mixed language) [1] 嘅形成有兩個主要原因：

1. 親切感
正常情況下，無論係講定寫，用自己最熟悉嘅語言應該係最自然嘅做法。一個日本人同另一個日本人講嘢，正路唔會講法文。不過廿年前嘅香港係一個好特殊嘅地方：首先大家有「言文不一」情況，手寫北京話，口講廣府話；其次日常教學都係用英文教材。即係話寫嘢嘅時候，大家係用緊兩隻同廣東話相差幾遠嘅語言。如果可以有合理原因去寫廣東話，大家一定會覺得親切好多。

2. 科技限制
同樣喺正常情況下，一個人民買得起電腦嘅地方，應該一早有生意人會諗計令到當地人可以用電腦輸入自己嘅語言。不過中文字咁多個，唔似得其他語言咁易打，整中文系統嘅人唔知點解咁＿＿＿＿（我諗唔到形容詞），竟然淨係得咩倉頡、速成、大易、行列、注音俾香港人用。咪玩啦，咁多嘢記，點學呀？於是香港成為少數有電腦用，但係大家都唔係咁打到自己語言嘅地方。

當年嘅電腦用家，梗係唔會個個嘥幾個月學倉頡啦（有時間都去唱K啦）。打唔到字，可以點呢？第一個答案係打‧英‧文。

打英文只係解決到科技限制，但係表達冇咁流暢，又唔夠親切。噉可以點做？一唔識打，就用英文拼返啲廣東話咪得囉！仲要因為唔係寫緊書面語，大家可以避開平日嘅枷鎖，盡情噉寫廣東話。

用英文打字已經達到一切溝通機能。同大部份混合語唔同，其實Kongish並唔係用嚟解決族群溝通問題而形成，而係香港插咗喺科技滯後同語言背景條罅度。如果廣東拼音輸入早啲面世，或者蒙恬早啲出手寫板，或者香港人啲英文再叻啲（i.e. 個個好似 DGS 學生噉）或者再廢啲（連用英文拼廣東話都拼唔出），噉成件事就唔會發生㗎喇。[2]

噉嘅背景俾到啲咩啟發我哋呢？

就係呢個moment，無論親切感定科技，都唔再需要Kongish呢類語言。香港人近幾年開始打破咗「書面語思想」，越嚟越多人喺日常生活入面寫廣東話。呢個轉變就算淨係睇TVB嘅人都應該會發現嘅：你睇以前啲劇集，打SMS或者Call台留言，都係書面語；到後嚟呢，你睇下《愛我請留言》，翠如BB基本上係打純廣東話。555555。即係論親切，Kongish點都唔及直接用廣東話溝通咁直接。而科技問題呢？經過十幾年，好多人都唔知點解學識咗打字。有啲係練成咗速成，有啲係裝咗九方，買咗手寫板，用廣東話拼音，用普通話拼音，用Yahoo字典copy and paste⋯ 總之大家少咗「打唔到中文」呢個問題。

當初兩個 Kongish 嘅產生原因都冇咗，究竟日後可以點發展落去呢？

作為一隻新新哋嘅混合語，其中一個用途係建立身份認同。香港人嘅構成，以粵語人口為主，但係都有唔少嘅少數族群，例如南亞裔、菲律賓裔、嶺北華人、歐美非各大洲嘅人等等。一隻獨特嘅英文可以係香港人嘅標誌，亦都可以成為跨族群[3]嘅交際語。當然喺香港講英文嘅族群通常係以主流（英式、美式）英語為主，不過假設跨族群交流增加，或者呢種Kongish會成為新嘅標準，變成一隻用喺一般交流，冇咁拘緊嘅底層語言 (basilect) ，而正式英文就以高層語言 (acrolect) 嘅形式，喺正式場合先至使用，一如新加坡嘅情況。

另一方面，喺英語教學上，好多老師都覺得要學一定要由第一日學啲最完美嘅嘢。但係語言教學向來都唔可以一步登天。如果容許一隻有廣東話成份嘅英語喺班房度用，或者可以增加學生自信，減低學習英語嘅心理障礙，令到學生可以口講Kongish，手寫書面正統英語，複製返香港人學中文嘅模式。教英文嘅朋友未必buy我，不過呢個係香港英語教學嘅新出路都未定。

不過同時 Kongish 要面對使用人口嘅問題。混合語要有好長嘅磨合期，一啲用法會漸漸消失，一啲會保留，個人差會慢慢合流縮細，而大家仲係處於呢個磨合期嘅開端。要有磨合，就要有人用，但係Kongish性質功能上明明係口語先至啱使，但係暫時又只係停留喺書面文字嘅階段，未變成真正嘅口語。英文叻嘅人或者會不屑加呢啲非正統元素，而英文唔好嘅人或者會避開一齊要開口講英文嘅地方。假設有人想推動 Kongish ，相信要考慮下呢個問題。

當然我唔鼓勵大家完全放棄粵語、英語去學、去講 Kongish －－而且一隻混合語要保持活力，係要靠講嘅人不斷由自己嘅語言引入用法，帶起衝擊。否則當大家放棄晒本身口語，亦會意味住混合語會失去其他語言儲埋幾千年嘅表達方式，呢隻語言會好快俾人撳到扁晒，唔再立體，唔再生動㗎喇。

I hey mong everyone can expand language ge imagination, but of course need write more cantonese sin.

—-
[1] 我唔想夾硬用學術分類。總之係兩隻話溝埋一齊啦。
[2] 其實仲有好多地方⋯例如講 Hindi 嘅地方依然有好多人覺得打字麻煩，不過呢啲地方科技步伐未必有香港咁快，而英文水平亦都兩極過香港：一係叻好多，一係鮓好多。
[3] 尤其係某啲唔肯學廣東話嘅族群－－我好厚道，我唔開名

‪#‎深夜廢噏‬