想我留喺屋企做煮飯婆,首先要每個月放低二萬五俾我

cc photo by flickr user Nicola Albertini

cc photo by flickr user Nicola Albertini

家用哩家野,無論係父母子女之間,定係夫婦之間,都有可能引發世界大戰。早幾日見倒forum 有人討論老公應該俾幾多家用,「想我留喺屋企做煮飯婆,首先我老公要每個月放低二萬五俾我。」記得第一次聽到朋友Jane 講哩句說話,我淨係覺得佢好霸氣,當香港男士月入中位數係一萬六千五百,佢要二萬五先會考慮做家庭主婦。

後來Jane 小姐計俾我睇:我屋企得我一個女,每個月七千蚊家用已經唔算多,就算我唔食都一定要養父母先。一頭家洗費好多,淨係水電媒差銄管理費上網電話,加加埋埋都已經過二千,供樓一萬,買餸加埋家居雜項(晚晚兩餸一湯),其實已經所剩無幾。剩低小小做零用,買胸圍底褲潤膚膏M巾都靠晒佢,同朋友食多餐飯都唔多鬆動。原本我而家都搵緊二萬五一個月,扣返父母家用,夾一半供樓同家用,自己都仲有萬三蚊,就算間中同老公出街食下飯,有時間又煮下飯咁,都最少淨返一萬幾千可以用,有啲私己錢之餘仲可以送下禮物俾老公,又唔洗買套胸圍底褲都要問老公claim。想我留喺屋企做煮飯婆,每個月放低二萬五其實都係應付返頭家既開支,同埋我基本洗費。又要煮飯,零用錢又少左咁多,其實我仲蝕左,但自己煮飯的確健康啲。

聽完Jane 小姐咁樣計,我終於明白點解佢老公咁鐘意老婆去返工,難得Jane 小姐搵倒返得開心(仲要準時放工又準時出糧)既工,又可以分擔供樓同家用,唔洗每個月一出糧就去左二萬五先,實在真心支持老婆繼續服務社會咁話。但其實Jane 小姐只係代表住小部份大專學歷既香港女性(可以準時收工攞二萬五仲唔係小部份?),而其他大部份高學歷女性,就係遲收工仲要兼顧家庭,有啲仲要放工返到屋企煮飯,因為即使幸運到買倒樓,供完樓已經無錢請家傭幫手。

最近家計會推出新廣告,其中提到只要早計劃就「生一隊籃球隊都可以」。但好多年輕情侶,一早已經計劃,但就連買樓結婚都未結到。到上倒車,開始供樓,又開始掙扎如果有小朋友,爸爸/媽媽可以辭工喺屋企照顧小朋友嗎?家傭只可以幫忙家務,唔可以幫忙教小朋友,但以Jane小姐為例,如果將來生小朋友後再辭工轉為全職主婦的話,家用已經唔係二萬五可以應付。而且,上車盤通常只有三四百呎,生完一個,都唔敢諗生第二個。到換倒大單位,兼有錢請家傭,仲有能力養兩個小朋友,太太已是高齡,分分鐘接近更年期。一代比一代遲婚遲生,祖父母普遍年紀越來越大,所以以往可以「父母幫手睇住」只會越來越少,所以單單考虜要由家傭照顧,定係自己全職湊,已經有排諗。而且經濟條件同居住條件方面,「早啲開始計劃」都計劃唔倒我幾時可以換大單位,幾時可以再升職加薪,幾時可以一份糧養一家人。

愚小姐

八十後,愛吃愛睡愛運動愛音樂愛大自然;相信做到大智若愚,才是大智慧。

More Posts

Follow Me:
Facebook

高人指點

comments