趕唔到船,又使乜驚喎!

圖片來源:作者

圖片來源:作者

以前每逢打風,新聞實會派個記者棟響中環碼頭做人肉風速計同訪問嗰啲趕唔到最後一班船嘅島民,大佬啊,都趕唔切啦,仲要問人點解,唔通答佢游水返去咩。確實作為一個島民,無論你幾勁幾有地位間屋幾大,船都係你唯一嘅選擇,而船期表係要響電話開個photo album放,令自己可以響最快時間check到,所以有好好嘅時間觀念係響小島生存嘅首要條件。以坪洲為例,大約四十五分鐘就有一班船,話多唔多話少唔少。你可以話上等啲行返入IFC嘆吓tea慢慢等,但我呢啲又低產又懶嘅人,唔太想行之餘成日覺得IFC係強國人行多,最重要佢哋好早收。要hea?其實都有啲偽文青啲嘅方法。

去3號愉景灣碼頭,最多外國人打躉嗰度。碼頭對出有間bar賣啤酒,一支賣又有,一杯賣又有,三十零四十幾文一杯,平過你去老蘭飲。有朋友話仲有一檔賣燒牛脷同燒肥豬肉都好正,嘩!咁真係酒池肉林咁喎。遇著夜晚趕唔到船(多數係),太陽收曬,坐響碼頭邊樓梯,吹住海風,聽住浪聲,都幾好瞓,有時撞啱,會有一至兩班玩Busking嘅後生響度唱歌,唔係唱得咁難聽而又唱中一兩首自己like嘅,咪放低十零廿文以示支持,有次我俾錢佢哋嗰陣仲問我想唔想唱,我唔係要趕船我真係有啲興趣。

就係咁,如果你有一班生活響唔同島嘅島民朋友,不如試吓約埋一齊坐響岸邊樓梯,隊啤咬肉吹水又吹風,又有live音樂助慶,叫佢哋唱「朋友,我當你一世朋友」,咁樣,趕唔到船,又真係無乜好驚。

小島-洋蔡

今年豁豁豁出去,成為坪洲人Junior,發掘香港真正嘅堅「離地」城

More Posts

Follow Me:
Facebook

高人指點

comments