雞蛋仔配軟雪糕。ODDIES FOODIES

即係咁,我不嬲都覺得銅鑼灣同灣仔一帶無咩甜品好食既,數黎數去都係得Via Tokyo, Zoe Cafe等o岩我心水。不過,今日我終於可以加多間係我張List到啦,呢間就係 Oddies Foodies!其實兩個幾月前已經知呢間月存在,但係今晚先有機會同朋友仔一齊去試。

講咁耐,究竟呢間野有咩特色野食呢?一,軟雪糕;二,雞蛋仔。今次同朋友黎試,緊係一次過食哂兩野樣!

66% Dark Choc (L) $27
呢個Dark Choco(學名:「66% 黑朱古力意大利低脂扭紋軟雪糕」)質地幼滑,又唔會太冰,有敏感性牙齒都唔驚,66%黑朱古力當然帶黎濃烈既朱古力味,不過奇怪地,只有甜味,一丁點既苦味都無。對於黑朱古力控既我黎講,有小小美中不足。如果係飯後黎食既,自己一個嗌細裝食就夠皮,因為呢個雪糕都幾滯 ._.

圖片來源:作者

圖片來源:作者

Night Wolf $49
相信呢個Package係最多人幫襯既類別,朋友仔就揀左呢款「Night Wolf」,材料有(方太腔):朱古力加雲尼拿意大利低脂扭紋軟雪糕一客、布朗尼朱古力碎雞蛋仔一客、香脆牛油酥 N舊、焦糖香蕉雪糕一客、熱情果奶凍N舊 及脆脆片N塊(好似係)。材料多多,食味豐富,朋友當然十分滿足。

我都偷左d雞蛋仔黎食,好食程度大概係媽味雞蛋仔之下(係,我認,我覺得媽咪雞蛋仔既朱古力味雞蛋仔係全香港最好食),北角雞蛋仔之上。好食係邊呢?最重要係夠熱!對於一餅雞蛋仔黎講,夠熱真係好緊要,夠熱已經贏左一半;第二就係味道,有布朗尼朱古力既甜香之外,亦有淡淡既蛋香味,兩種味溝埋都好夾。不過呢,我就略嫌外皮唔夠脆,個涵唔夠Full,如果做到媽咪雞蛋仔咁脹卜卜就Perfect池。

小小食法建議,撕1-2格雞蛋仔落黎,High一Pat雪糕,跟著一啖過放入口。呢個冰火食法,除左增加味道既層次,亦可以加強口感。雪糕食左一半之後,就可以停手,撈埋下面D材料一齊食!

hw1a3002

(編按:有潮童歐遊飲食update!)

讚好「潮童焗飯」Facebook,收受最新資訊:

餐廳資訊:
Oddies Foodies
電話:9155 5185
營業時間:星期二至日: 12:00-22:00 (星期一休息)
地址:灣仔灣仔道149號1F地鋪

潮童焗飯

透過食物,我們能認識世界 透過攝影,我們能了解他人

More Posts - Website

Follow Me:
Facebook

高人指點

comments