打機可以係咁(下):嚴選十大 PC 獨立遊戲

DSCF1628

上回講到獨立遊戲有幾新奇歡樂,咁 PC 獨立遊戲有邊啲值得推薦?絕無公信力抄獅獨家推薦如下,排名不分先後。

Minecraft|https://minecraft.net/
睇落似 lego,立體格仔(voxel)風格係佢一大特色。玩落亦似 lego,不過自由度更加大,基本啲可以玩砌屋,複雜如穿梭機都砌到,上 YouTube 望望就連 The Avengers 預告片都有人整到出嚟。Minecraft 係全球銷售量最高嘅遊戲之一,賣咗超過六千五百萬份,僅次於兩隻你一定估唔到嘅 game:Wii Sports 同俄羅斯方塊。

Braid|http://braid-game.com/
表面上好似 Mario 咁踩吓怪獸過關,但唔同關卡有各種操控時間嘅方式,你以為只係普通謎題,又原來同個故事環環相扣。遊戲本身已經好玩,關卡細節收收埋埋無數隱喻,絕對唔係勇者打魔王救公主嗰種級數。推出六年以來,各地玩家解故已經衍生咗幾派理論,有心考據不妨 google。(好想劇透……好想劇透……)
再講背景音樂真係唔玩都要聽,catchy 到不得了。配合埋操控時間,玩落就知重有玄機。

Magicka|http://www.magickagame.com/
遊戲入面玩魔法師通常做啲乜?咪就係按一個掣就放個火球,按另一個掣就有龍捲風咁。好悶,好唔合理,好無自由度,哈利波特都要唸兩句咒語啦。做魔法師識得咁多元素知識,無理由用嚟用去都係嗰兩招嘅,應該光加熱就等於火,火加歌就等於我咁,溝吓溝吓就有幾百種招式可以出,玩落令你無時無刻都好奇究竟重有幾多組合未試過。如果將啲電加埋水 cast 落自己度咪……電瓜自己囉。你幾時玩過啲 game 個魔法師可以出錯招電死自己嘅啫。

The Binding of Isaac
*注意:反宗教題材
聖經記載,上帝賜咗一粒仔俾當時已屆九十歲高齡嘅希伯來人祖先亞伯拉罕,個仔就叫做以撒(Isaac)。有一日,上帝又失驚無神叫亞伯拉罕將以撒獻祭,亞伯拉罕忍痛拖埋個仔上山,準備一刀斬瓜佢嘅時候:「停手!我知你敬畏神喇!因為你連個獨仔都肯獻出嚟!」
全知嘅神要求你獻出自己個仔,就只係想考驗你有幾忠誠?我望唔透,The Binding of Isaac 作者都應該望唔透。如果你有一個無啦啦會收到上帝(?)啟示而又深信不疑嘅阿媽,有一日突然收到柯打話要斬瓜你,你都只得一個選擇:走。即使地下世界真係好恐怖,起碼有機會執番條命。到頭來嗰啲幫到你脫離生命威脅嘅醜陋事物,同一個將唔知上帝定魔鬼睇得比你更重要嘅阿媽比較,邊一邊先係邪惡?

The Stanley Parable|http://www.stanleyparable.com/
企業員工 Stanley 返工打卡放工打卡,有一日行出房見到全公司所有人唔見晒。跟住旁白老點四圍行,打開一道門,從此就自由鳥……咪住先,呢個並唔係一個解謎故事。The Stanley Parable 詭異之處,係由你無再跟住旁白指示,行差踏錯一步開始。未知道玩咩嘅朋友不妨直接 download 免費試玩版,玩過一次就知係咩料。(又一隻極度精彩但唔劇透得……話說作者聲稱個試玩版內容係同 paid version 完全分開)

To the Moon|http://freebirdgames.com/to_the_moon/
科技發達,即使臨死前有心願未了,都有方法可以植入虛假回憶,「完成」一生最大心願。老人堅持自己願望係上月球,但又唔知點解想咁做,唯有闖入老人記憶,理清人生歷程脈絡,令虛構故事得以完整。催淚之選,無打打殺殺,唔使點用腦諗解謎。

Papers, Please|http://papersplea.se/
雖然係架空背景,但一睇就知係蘇聯東歐咁上下。被國家選中咗做關員嘅你,每日對吓身份證護照,西口西面咁又 1 day。喺共產主義國家生活捉襟見肘,做錯嘢會扣糧壓力已經夠大,各國局勢有變又會令規矩五時花六時變。反政府組織利誘你幫手放兩個人過關,你又會唔會冒險?機械式工作都可以有咁多內心掙扎,呢隻嘢係得嘅。

Super Hexagon|http://superhexagon.com/
企喺中間避障礙物,撐過六十秒就升級,講完。超難玩,超易上癮,越玩越覺得自己遁入空門物我兩忘咁上下……唔怕頭暈的話,一邊玩住放空諗嘢又得,喺一大班人面前 show off 亦得,得咗。最高難度嘅世界紀錄去到 668.42 秒,而我睇廿秒已經見到殘影……

Dont’ Starve|http://www.dontstarvegame.com/
碌咗入異世界,有啲肚餓有啲凍,要用盡一切方法生存。一邊要搵食物,一邊要準備材料整武器同埋生火。再收集材料整唔同發明出嚟。如果入黑重周圍行,又或者飢不擇食乜都擺入口,好容易會發癲……
最近出咗雙人模式,有無人陪我玩呀~~~(回音)

Thomas was Alone|http://www.mikebithellgames.com/thomaswasalone/
聽到旁白講第一句說話,就足以令你會心微笑嘅治癒系遊戲。難以想像講故事畫面元素可以簡單到咁嘅地步,得幾舊唔同顏色唔同大細嘅 blocks,但你會覺得角色鮮明,非常高章。
如果你有玩過 Assassin’s Creed 某幾集,可能會覺得旁白把聲有啲熟口熟面……同宅男阿 Shaun 係同一個配音(Danny Wallace)。

順帶一提,買 game 記得留意特價,詳情請參閱上篇。
歡迎 add 我 [email protected],吹水又得打機又得。有機會再寫過,打機先~~~

名越拉岸

相信萬物有時,自覺生為改變現狀,於是熱愛解決世間種種難題,且思考迴路欠缺「難易」判斷。與文字的關係是不離不棄。相比起玩遊戲,其實更愛做遊戲和拆遊戲,更加愛聽別人故事。

More Posts

Follow Me:
Facebook

高人指點

comments