章魚燒 ‪‎Takoyaki

所有圖片來源:作者

所有圖片來源:作者

作為一個八十後,我絕對深信章魚燒係由惠康引入香港。

講下姐,不過我第一次食章魚燒的確係喺惠康食,同埋應該唔係覺得幾好食,又淋又糊口……但係人越大可能覺得食呢啲野好潮就開始覺得好食(okay而家已經唔再係潮野我知道),再加上鍾意日本野同埋日之船章魚小丸子既沙津醬好好味(?),就開始久唔久想食下。

想係香港搵口味正宗同熱到辣咀既章魚燒已經買少見少,好彩仲有太古APITA既築地銀同埋…無喇就係得返佢一間。以前我所知佢係旺角(細個我都食唔少次)同埋九龍城廣場等等地方都有分店,不過而家旺角個鋪已經收左十年易手幾次而家好似係吉鋪,而九龍城個間就因為生意差到啟發左個間既老闆開左銀咖哩。

仲記得細個既時候佢已經好貴,成三十幾蚊八粒,日船著校服先賣緊十蚊六粒。之但係佢個味真係唔係度度食到,個時作為中學雞都會久唔久食下,而且個綠茶啲味都算幾特別(可能再外加媚日既心態啦下)。

就咁就過左咁多年,呢次之前我都已經好多年無黎過,睇佢生意都係幾好,不過好似已經由大鋪搬細鋪,味道係依然既正宗,不過落汁既妹妹重手左啲無左佢出名既脆口,而佢既綠茶飲品既味道就比較差,啲茶粉好重手而個味都唔多balance。

好唔好食?真係好睇好你識唔識食,係有日本既水準既,只係唔係日本既高水準姐,如果掛住日本既味道都可以去食下。順便行下個超市同商場都可以hea足一日。

 

題外話一,其實都仲有另一間有分店既野有章魚燒,但記得細個食覺得唔好食又淋身又貴,所以都無再去食,而家朗豪坊同sogo都有分店。

題外話二,太古城APITA係有急凍章魚燒賣(唔好同我講你睇到「燒賣」)。如果想係屋企食既都可以買,不過舊半水先四十粒,不如直接去築地銀食。

題外話三,太古城APITA係有章魚燒機賣,不過最平個塊都二百蚊,如果平啲我已經買左返去自己整。
希望下次講章魚燒會係我自己親手整既………

SONY DSC
PIC3
呢兩份都係係日本食既,睇落好似差唔多,不過就咁睇啲汁真係無咁多同埋上面既料都多啲。

食食食食懵你

鍾意煮亦都鍾意食,最鍾意就係食下啲家常野同滄海遺珠野。覺得好食既野唔一定在於佢有咩材料同煮法上既特別之處,而係在於煮既人對食物既一份執著,希望可以用呢個理念同大家輕輕鬆鬆分享食既樂趣。

More Posts

Follow Me:
Facebook

高人指點

comments