打機可以係咁(上):獨立遊戲玩啲乜?

steamcover

遊戲就同電影一樣,有商業製作亦有獨立作品。荷李活電影梗係人人 like,但睇得多都會心諗點解劇情題材咁鬼大路,又會有啲 low budget 但又幾鬼好睇嘅非主流電影出現。咁喺遊戲世界,相對於商業遊戲嘅獨立遊戲又係乜料?

獨立遊戲係指由開發者自己承擔全部開發費用,而唔係由遊戲公司出資開發嘅遊戲作品,最易理解嘅香港獨立遊戲例子,係八九十後童年回憶 Little Fighter 2。獨立遊戲點解咁抵玩?三個原因:

1. 平!
當大廠出品講緊幾百蚊港紙一隻,買返嚟唔好玩或者玩兩玩就擺埋一邊,獨立遊戲因為開發成本低,定價可以低至一百蚊港紙樓下,遇到特價隨時十零廿蚊就執到一隻。

2. 有深度
問 indie developer 點解要做獨立遊戲,實有人答你「因為唔想諸多制肘」「我有嘢想講」「我想做自己嘅遊戲」。抱住一腔熱血湊大個親生仔,將遊戲當成藝術品而唔係消費品看待,十年磨一劍都有,想唔細緻都難。(雖然成本所限,畫面一定同大作無得比……)

3. 你有太多嘢未玩過
因為無咗金主指手劃腳,獨立遊戲可以完全跳出年度大作打打殺殺嘅框架,各種離奇古怪小眾玩法同題材都有機會重見天日。遊戲唔只係一時刺激,亦都係追求你從未有過嘅體驗。梗有啲嘢你喺現實中完全無機會試,而又原來好搞笑又或者從未想像過。

獨立遊戲點入手?有兩個好朋友你一定要識。

Steam
http://store.steampowered.com/
世界最大型電腦遊戲平台,霸權之中嘅霸權,遊戲選擇一網打盡。喺 Steam 買 game 最吸引係平日 keep 住有特價,再加一夏一冬兩次跳樓大特賣,離譜起上嚟 90% OFF 都有。唔講獨立遊戲,就算大廠作品過半年一樣同你五六折咁劈法,唔似得買實體 game 個價企到硬。

6 月 11 至 21 日做緊夏季特賣,有折重多過無折,想買 game 真係趁早。

Humble Indie Bundle
https://www.humblebundle.com/
HIB 會定期將幾隻獨立遊戲綑綁發售,特點係完全自由定價,又可以選擇將你付出嘅金額捐俾慈善機構或者 100% 俾晒開發者。各種 bundles 係好多人收埋幾百隻 game 未玩嘅惡夢開端……

對於從未買過獨立遊戲嘅朋友嚟講,今期 Humble Indie Bundle: All-Stars 絕對買得過。

獨立遊戲有邊幾隻係必玩?密切留意下集之抄獅嚴選十大經典巡禮~~~

名越拉岸

相信萬物有時,自覺生為改變現狀,於是熱愛解決世間種種難題,且思考迴路欠缺「難易」判斷。與文字的關係是不離不棄。相比起玩遊戲,其實更愛做遊戲和拆遊戲,更加愛聽別人故事。

More Posts

Follow Me:
Facebook

高人指點

comments