Marvel’s Secret Invasion – 無間侵略

si1

所有圖來自 comicvine.com 和 talkcomic.com

 

今次想炒一炒冷飯,介紹一個2008年由Marvel出版嘅漫畫故事。本來筆者早喺幾年前,於論壇及其他網站寫過關係此故事嘅簡介,最近看到某啲新聞突然有感而發,所以希望喺度再次講下呢個人氣作品。

「如果你發現身邊熟悉嘅親人朋友俾其他人冒充,你會點諗? 究竟仲有邊個可以相信?」

Secret Invasion故事大鋼係關於一個叫Skrull嘅外星種族,主要劇情講述佢地如何處心積累去入侵地球,Skrull本身係出自神奇4俠嘅故事,佢地係一種綠色皮膚嘅外星人,能夠改變身體,模仿其他星球嘅高等生物,從而混入成為對方一份子,現代嘅Skrull本來係比較溫和,會樂意去與其他星球進行公平交易及分享科技成果,該種族喺宇宙已經有好長嘅歷史,中間亦有過唔少權力變遷,不過本身同地球人並無大仇口,最大嘅宿敵其實係另一外星種族Kree…

Skrull同Kree兩個民族如何結怨,在此暫不作詳細交代(其實筆者都唔太清楚 :p),佢地幾千年嘅衝突,於漫畫內被稱為Kree-Skrull War,多年前復仇者曾經被捲入呢場戰爭,而地球亦無辜受攻擊,當呢場Kree-Skrull War結束後,Iron Man回到地球,邀請左幾位英雄組成光明會(註1)

一次光明會嘅行動中,眾人決定集6人之力暗中突襲Skrull帝國,目的係對Skrull行下馬之威,警告Skrull唔好再攻擊地球,否則佢地唔會再客氣,可惜佢地6個一齊「奶」嘢,不止被Skrull生擒,Skrull更趁機對佢地6人嘅力量,戰甲逐一研究,幸好後來6人成功逃脫,臨走仲還返個「回禮」俾追捕嘅Skrull士兵,算係執返身彩,但同時亦激怒Skrull帝國,令佢地誓要對地球人作出報復,而Skrull帝國在俘虜光明會6人時所做嘅紀錄,亦成為日後侵略地球嘅皇牌殺著…

時光飛逝,經過Civil War(註2)後,一批拒絕向政府屈服嘅復仇者成員藏身喺奇幻博士嘅古宅中,成員包括有Luke Cage,Iron Fist,Spider-man,Spider-woman,狼人Wolverine,連同復活嘅Hawkeye,喺博士嘅協助底下,不理政府通緝,繼續行俠仗義,於一次行動入面,得知女忍者Maya被犯罪組織The Hand俘虜,眾人於是決定到日本進行營救,Maya教早前受美國隊長及夜魔俠Daredevil所托,到日本秘密監視The Hand嘅活動,而The Hand當時嘅頭號領軍人物正係夜魔俠嘅舊情人Elektra。

maya

當一眾復仇者與The Hand嘅忍者軍團激戰時,Maya擺脫控制與Elektra進行生死戰,雙方短兵相接,Maya手刃Elektra,但係奇怪嘅事發生啦,地上嘅「Elektra」屍體還原變為一個Skrull… 大家喺呢一刻都不知所措,The Hand嘅忍者軍團群龍無首,亦立刻撤退,留下在場嘅復仇者以及Skrull冒充Elektra嘅屍體…

skrull Elektra

一眾復仇者帶走屍體,喺回程途中,大家都無講過一句說話,因為大家都覺得好不安,無錯,眾所周知,Skrull可以改變自己模仿任何人,但一直以嚟,佢地嘅易容都無法避開其他超能人嘅觸覺,但今次唔同,呢個冒牌嘅Elektra,竟然可以避過奇幻博士嘅魔法,蜘蛛俠嘅感應,甚至狼人嘅靈敏觸覺都無法辨別真偽,各人不其然想到,係唔係已經有Skrull大舉混入佢地當中?又或者身邊嘅隊友是否本尊?無數疑問喺大家心中產生,Spider-woman更加認為,Skrull不單已經成功混入超能人或其他英雄當中,更甚者,有高度影響力嘅人,可能已經俾人掉包,佢指出Tony Stark喺近年反常嘅行為,好可能係因為嗰個Tony根本就係Skrull…

Spider-woman認為要試探Tony Stark好容易,只要將假嘅Elektra屍體,送去佢面前,再觀察佢隨之而起嘅行動,就可以猜出佢是否本人,不過其他隊員卻持不同意見,原因係,未搞清楚成件事就魯莽做任何嘢,只會令事態惡化,可惜佢地幾個人無時間去討論,因為佢地回程嘅機上,不幸地遇到另一批復仇者戰鬥嘅力量波及,做成飛機嚴重失控,幾經辛苦勉強降落,但混亂間,Spider-woman竟然搶走Skrull屍體,狼人想阻止都嚟唔切…

Tony從Spider-woman得到Skrull屍體後, 漫無頭緒, 佢唯有再一次召集光明會成員, 希望可以通知大家事態嚴重, 同時可以相討有咩對策, 席間Tony告訴大家現時Skrull模仿術連佢嘅先進科技亦無法探測到真偽, 而且Tony更認為今次Skrull嘅侵略, 好可能係多年前光明會突襲帝國激怒Skrull所致…

正當Tony想向大家尋求意見之際, 黑雷突然開聲說話, 大家都嚇左一跳, 佢地一向知道黑雷從來唔說話, 因為佢嘅音波力量就算細細聲都足以驚天動地, 不過最驚人嘅係呢個「黑雷」竟然露出真面目, 原來佢都係Skrull!!!假黑雷二話不說, 即時向其餘5人作音波攻擊, 接住再向海霸王Namor瘋狂進攻, 因為佢知道5人當中, 以Namor力量最強, 所以實行先發制人, 不過Namor亦都並非善男信女, 苦戰底下擊殺呢個冒牌黑雷, 當大家以為可以得到喘息之際, 另外兩個Skrull追兵原來一早埋伏喺附近, 呢個時候奇幻博士用魔法將受傷嘅X教授,神奇先生,Namor等人傳送到安全地方, 而Iron Man就喺臨走時炸死兩個Skrull士兵…

si3

大家脫離險境之後,X教授告知其餘4人, 即使以佢嘅心靈感應, 亦都無法分別Skrull嘅模仿術, 此話一出, 各人都心知再無人可以相信,奇幻博士只係拋下一句永不再見, 大家就各散東西, 剩下Iron Man一個人連同兩具Skrull屍體在旁,此刻Tony心諗, 以後究竟還有誰可以相信…

無助嘅Tony帶住假黑雷嘅屍體, 通知Inhumans嘅皇族, 即黑雷嘅皇后同妹妹, 並且向佢地道出, 真正嘅黑雷生死未卜, 還有,既然黑雷已被假冒, 即係話Skrull已經成功入侵月球Inhumans帝國, 不過Tony現時已經泥菩薩過江, 自身難保…

另一具Skrull屍體,Tony就交左俾神奇先生同Hank Pym作研究,Hank Pym除左係一名優秀科學家, 亦同時係一位超級英雄, 外號Yellowjacket, 其時任職政府Initiative, 負責管理及訓練自願向政府登記嘅超能人,Tony希望集兩位科學家之力可以破解到Skrull嘅模仿術, 呢個時候, 另一太空維和組織SWORD探測到有一架Skrull飛船正衝入地球軌道, 未幾, 飛船更墜落荒蕪之地Savage Land, 當時SWORD嘅其中一位揸fit人正係Dum Dum Dugan,(佢前身隸屬神盾局, 亦係單眼佬Nick Fury嘅舊部),Dugan有見事態危急, 於是通知Tony, 當Tony收到訊息後, 立即離開研究所, 留下神奇先生同Hank Pym繼續埋頭苦幹…

在此先講一下Nick Fury呢個角色,當時嘅Nick Fury可以話係正亡命天涯, 佢因事被神盾局革職, 而且被通緝, 不過原來佢之前都曾經俾Skrull間諜埋身,幸好及時洞悉Skrull嘅計劃, 一方面逃避追捕, 另一方面亦明查暗訪, 召集超能人新力軍, 組成Secret Warriors, 希望大戰一旦爆發, 人類一方可以留有後著, 佢亦冒險潛入神盾局,將Skrull嘅入侵計劃通知現任神盾局局長Maria Hill, 不過Nick Fury始終棋差一著, 因為佢佈署Spider-woman做多重間諜去幫佢, 但佢一直有所不知, 原來Spider-woman一早已經被Skrull冒充…

secret warriors

回說Tony情況, 當Tony接到情報後, 知道形勢緊急, 立即拋底手上工作離開, 剩底神奇先生同Hank Pym喺實驗室繼續研究如何拆解Skrull嘅模仿術。

Tony回到自己率領嘅復仇者總部, 正準備外出召集所有隊員前往飛船墜落地點進行調查, 就喺呢個時候, 在場嘅Spider-woman暗中通知另一隊以Luke Cage為首嘅地下復仇者, 希望Luke Cage等人可以趕喺Tony之前, 快一步到達墜船現場。 由於要到墜船現場Savage Land, 非依靠大型載具不可,於是Luke Cage一行人借助另一超能人Cloak嘅瞬間轉移能力, 偷偷去到Tony嘅總部, 喺佢未返到嘅時候, 迅速制服留守嘅Black Widow (黑寡婦), 強行騎劫復仇者嘅專用噴射機, 一舉出發前往Savage Land。

有樣奇事不得不提, 就是Marvel故事中, 每次復仇者到Savage Land (蠻荒之境, 內有好多史前生物可供野生捕獲), 都例必會墜機收場, 今次Luke Cage都唔例外, 一進入Savage Land, 即時被野生恐龍狙擊, 噴射機被迫降落, 眾人一落機, 急不及待到Skrull飛船墜落嘅位置, 正當Luke Cage想打開飛船機倉門時,Tony以及佢嘅復仇者小隊亦同時趕到,Tony想叫停Luke Cage都嚟唔切,Luke Cage發力,飛船門應聲破開, 與此同時, 飛船上一個訊號燈由紅轉綠, 啟動所有隱服地球嘅Sleeper Agents。何謂Sleeper Agent?佢地係一班為數唔少嘅Skrull卧底, 同其他以模仿術混入地球人當中嘅Skrull唔同, 佢地最大分別, 係被催眠成一路都唔知自己係Skrull, 直到正式大戰, 到達臨界點時, 先會被特定訊號喚醒, 所以話, 卧底最高境界, 係要做到連自己都唔知自己係卧底。

無數Sleeper Agents被訊號喚醒, 當中有好多係意想不到, 如S.W.O.R.D嘅指揮官Dugan, 原來佢都係其中一個Skrull, 當意識一還原, 就馬上引爆S.W.O.R.D嘅太空要塞。

那邊箱, 多年來一直替復仇者打理家居嘅管家Jarvis亦係其一員, 佢以Skrull嘅電腦病毒入侵Tony嘅戰甲系統, 連鎖反應下, 從而連接到全球衛星通訊, 再繼而奪取S.H.I.E.L.D神盾局空中要塞嘅控制權。 另一方面, 因全球嘅Stark通訊設備癱瘓, 令到所有高度設防監獄, 無一不中門大開, 各類超能罪犯, 不費吹灰之力就可逃脫。 禍不單行, 由歸順政府嘅綠魔Norman Osborn所率領嘅隊伍Thunderbolts以及神奇4俠嘅大本營,同樣遭受重創, 一時間世界大亂。

故事回到Savage Land一眾英雄, 當機倉門開啟後, 走出嚟嘅竟然係一班大家都熟識, 甚至係同時在場嘅英雄, 包括衣著較舊, 外形較早期嘅Luke Cage,Spider-man, 狼人, 美國隊長, 雷神等等。一時間, 各人腦中充滿問號, 究竟邊個先係真身, 邊個又係冒牌?

正於實驗室嘅神奇先生與Hank Pym, 經過一番努力, 終於破解到Skrull嘅模仿術, 正當神奇先生想同Hank Pym分享成果之際,Hank Pym突然取出Skrull嘅專用槍械, 向神奇先生作出一下重擊, 喺殺傷力強大嘅武器底下, 神奇先生雖然不死, 不過都俾人射到開花, 一地都係。 原來連Hank Pym都一早被掉包。

si2

又回到Savage Land呢個戰場, 眾人滿腦子疑問, 就算心知眼前一齊人和事只係擾亂視線, 但兩幫人馬仍然逃不過大打出手嘅局面, 實行嚟個動手先動口, 一開戰,Sentry就被另一幫嘅Vision以心理戰術敗走, Sentry一向情緒不穩, 被Vision三言兩話, 就被迫得發瘋一樣飛走。同時, 原身為Hawkeye嘅Ronin, 再次駛出拿手看家箭術, 連放三箭, 痛擊疑似Skrull嘅Emma Frost,Beast及美國隊長, 但呢個「美國隊長」竟然可以擋格到呢下無聲冷箭,Ronin霎時懷疑眼前從飛船走出嚟嘅呢班人, 會唔會係真身呢?

戰鬥途中, 一隻體型龐大嘅T-Rex恐龍突然亂入, 混亂中殺死兩位英雄, 兩人嘅屍體立即還完為Skrull, 到呢一步, 大家幾可肯定, 從飛船走出嘅英雄, 明顯都係Skrull嘅Sleeper Agents, 可能連佢地都唔知自己係A貨…

此時, 各地出現大規模攻擊, 少年復仇者與另一隊異能少年Runaways於曼克頓死戰擁有多重超能力嘅Skrull,X-men鎮守三籓市, 綠魔率領嘅Thunderbolts就繼續於基地頑抗, 一時間, 戰雲密佈。

si4

另一邊箱,Ms. Marvel拉起受傷嘅Tony離開戰場, 於Savage Land一個廢置嘅工作室嘗試以有限資源重置戰甲,Tony拜託Ms. Marvel為佢飛回市區, 搜集需要嘅配備, 好等佢可以修復戰甲, 就喺呢個時候,Spider-Woman突然現身, 道出Tony其實都係一名Sleeper Agent?!

正當Tony疑幻疑真之際, 黑寡婦及狼人趕到, 真身為Skrull Queen嘅Spider-Woman眼見擾敵成功, 就逃離現場, 黑寡婦上前扶起Tony, 問道,「不管你是否Skrull, 你只需答我, 你依家打算點做?」盛怒中嘅Tony答道,「x#[email protected]!#$, 就算我真係Skrull, 我都要隊冧班仆街一齊陪葬!」

與此同時, 各地英雄都陸續加入市區嘅戰場, 先有Nick Fury嘅新力軍, 繼有雷神以及肩負新美國隊長之名嘅Bucky, 大家都到達市區, 於時代廣場一帶作出支援。

講到呢度, 大家可能都好擔心被生擒嘅神奇先生, 有驚無險, 被S.W.O.R.D嘅另一頭目巧計救出, 由Skrull太空船回地球後, 馬上用新儀器破解所有Skrull嘅模仿術, 敵我分明, 咁就唔同打法啦, 目標清晰明確, 最後, 大伙兒齊集中央公園展開了最後生死鬥。

故事結局如何,相信都不需筆者多費唇舌,大家都可估到。此大型故事同樣有一點點諷刺時弊嘅意味,以筆者個人觀感,作者Bendis一方面將反派角色套用冷戰時期蘇俄嘅諜報技倆 (據說當年有好多間諜為Sleeper Agent,蘇俄政府透過科技及洗腦催眠技術,令諜報人員隱伏於敵方之中),另一方面,故事亦表現出美國911後對恐襲嘅擔憂,多元文化以及不同種族,未能令社會共融,反而人心惶惶,正正呼應故事嘅副題,「Who do you trust?」

若要說令到筆者是次推舊文嘅主要原因,其實係日前筆者由朋友FB上看到一則外國新聞,文中描述澳洲本土右派政黨打正旗號反對強國人以金錢經濟入侵,甚至開宗明義拒絕多元文化。正常人可能會問,為何如此極端,如此法西斯嘅政見可以公開地宣之於口? 究竟咩情況下先可以種出這種因果? 在筆者於該處求學時,已有政黨極端排外,部份更加對亞洲人嗤之以鼻,當年筆者亦都十分痛恨部份澳洲人對黃種人嘅歧視,可是近年來眼見當地各城市都出現許多新嘅精品樓盤,廣告仲要用上殘體字,方察覺呢個地方已逐點逐點被強國入侵,當下心情有點複雜,既是活該亦是可憐。對於強國嘅Not-so-Secret Invasion,香港就只能腿張開任入,彼岸的歐美國家,希望你們自求多福了。

最後喺度送首自家製MV俾各位,筆者貪得意將Secret Invasion嘅漫畫片段,配上廣東歌曲「無間道」,9唔搭8得嚟又Match到個主題,希望大家鍾意(或硬食)。

註1: 有關光明會,請參考筆者另一篇文章http://style.vjmedia.com.hk/2015/05/17/6172

註2: Civil War乃係一個頗有名嘅章節,下年上映嘅美國隊長3亦會以此為故事藍本

little@iron.com'

小鐵

初為人父, 平時愛看美國漫畫, 欣賞各類電影, 不時會以戲論政, 借題發揮(or抽水)

More Posts

高人指點

comments