Eataly-亂談意大利飲食[盡量搵圖]

嚟咗意大利一段時間,日日食意大利菜,而呢邊就只有淅江餐館為多,連個唐人街都顯得有點凋零,可以話真係好掛住香港嘅_魚蛋燒賣……

啱啱嚟到,自然要去下當地嘅超市,Esselunga,PAM,Simply,Carrefour等等,呢度大型超市唔會只得兩間,賣嘅野亦有好多,並且價格有高有低。話說喺超市,有好多人會搬水返屋企,幾pack 幾pack 咁買,一枝2L 嘅水,可能手推車上面有廿幾三十枝都未定。所以我有時同樣地,都要3枝3枝搬返屋企(因為6枝一pack 太重啦捘唔郁)。行一圈超市,就會發現歐洲人非常熱愛嘅芝士(formaggio),同埋帕爾瑪火腿(prosciutto),仲有各類洋腸(如salame)。

芝士篇

意大利人好喜愛芝士,所以有唔同種類,多到非常恐怖,有些芝士,真係好似卡通入面果啲一磚磚三角形咁,有啲就係處理過嘅粉狀,再有啲係一大舊芝士放喺包裝入面,仲有水隔住,有少少似豆腐(所以第一次見時筆者真係有天真地諗過係咪豆腐……)。例如意大利人喜愛一款芝士Mozzarella,係用嚟配蕃茄,當作小菜appetizer。有時候我見朋友會淨係成舊咁一刀刀切嚟食,會加jam 或者olive oil。另一種比較常見既食法就係喺一塊面包上面,加上芝士,再加上蕃茄粒,然後可能再加鐘意嘅嘢。因為芝士係佢地嘅生活,室友通常一日三餐都有芝士。而通常落喺pasta上面嘅芝士,或者餐廳拎嚟俾你任落嘅芝士,多為parmigiano reggiano formaggio。呢種有傳聞指話煮幾咁難食嘅嘢都好,落好多落去就會好好味咁架啦。

所有圖片來源:作者

所有圖片來源:作者

PS. 點解賣芝士賣豬肉果啲個個都咁靚仔架!​

火腿x腸篇

火腿同洋腸方面,更加種類繁多,會令人眼花繚亂。超市裡面,幾乎所有都係買完,可以帶返屋企,再拎塊面包,直接放入口食。好多時候,去到餐廳想叫道apertizer,好多人會叫一碟肉,就係成碟各類既火腿同腸。中間會放芝士塊,隨便加上啲肉,咁就好可口嘅一道本地菜。

unnamed (97)

unnamed (98)


Pasta篇

每個人提起意大利都會諗起spaghetti,偏偏意粉,其實並唔係真係咁普遍。Pasta 嘅種類,喺意大利可以話十隻手指都數唔哂。唔好講話顏色唔同,個形狀唔同,其實佢地有好多唔同嘅pasta。Spaghetti 我反而甚少食到。佢地有啲入面有料嘅叫 tortellini ,或者叫 ravioli,有款闊條面叫tagliatelle,又有千層面 Lasagna。平日喺香港常見啲,果種筷子咁樣又長又幼嘅係叫 Linguine。至於入面既餡料,有時係菇,有時係豬肉,有時係菠菜,有時係牛肉……

食過唔同地方之後,都係發現,愈近市中心愈伏,又貴又量少兼難食嘅,莫過於喺Duomo 大教堂附近。

unnamed (99)

p.s. risotto 係意大利飯,主要同米飯無分別,不過意大利人唔會煮全熟,所以有少少硬,而且煮法唔同,鐘意煮得比較 creamy。

Pizza

另一樣不得不提嘅當然係Pizza,pizza喺呢度周街都係,而且是但一間,其實都幾好味,同香港、美式、快餐果種係好唔同嘅。住喺Milan,除咗M記同埋BurgerKing 可以喺市中心附近搵到幾間咁幸運之外,pizzahut 同埋KFC 等等果啲 快餐就當然無嘅。Starbucks 亦都係全個意大利都無(咖啡喎,唔會敵得過意大利自己嘅咖啡)。

Pizza 喺度,可以吃takeaway,多數喺bakery 或者 Pizzeria 入面。價錢公道,而且非常好食。薄皮又脆嘅pizza,同埋厚到一兩寸嘅pizza,任君選擇。如果入去餐廳食,有部份餐廳都可以叫pizza。

Pizza 起源係Napoli,去果道一定要食架~

咖啡

講起咖啡,意大利係愛coffee 嘅人之福地,因為叫杯espresso 分分鐘比飲水平。多數嘅意大利人喜歡小小一杯espresso,特別係朝早飲一杯,而且如果你只係話要 coffee,通常人地就會比espresso 你。意大利係唔會有大大杯嘅咖啡嘅,只有細細杯好似茶杯咁。其他比較多人叫嘅就係大家都知嘅 americano, caffe latte, caffe macchiato, cappucino 等等,仲有好多。喺餐廳食完嘢,人地都會跟手問你要唔要dessert 或者coffee。

aperitivo 篇

講起意大利羅馬、米蘭、翡冷翠(其實姐係佛羅倫斯,兩個譯名都好好聽,只不過意文係Firenze,始終係翡冷翠比較貼近 XD)等地,是唔可以唔提aperitivo 嘅。

佢係叫做開胃酒,但其實一啲都唔只係限於開胃。特別係Milan,由6到7點開始,大部份嘅Bar 就會有aperitivo,姐happy hour,咁你只要用10€ 左右嘅價格,就可以叫一杯嘢飲,然後類似buffet 咁任食而無限時間。即使係叫做開胃酒,但其實人人都當晚餐啦!呢邊好多大學生,就會放學後同朋友一齊去飲杯野,食一餐(然後落下場)。

Aperitivo 係Milan 嘅熱點,主要係圍繞河道Navigli 一帶,果邊一入夜,就會好好景,河道兩邊都係Bar/restaurants,個個人坐哂係河邊,又可以睇景吹風吸煙,又可以飲酒食嘢傾偈。特別有好些比較熱門嘅 bar,就會塞哂人,遲去就要等位架啦。有一些好嘅bar,嘢食多,而且成日轉嘢食,次次去都唔同,甚至半個鐘又唔同咗,有啲嘢食好正架~例如海鮮意粉,又例如朱古力噴泉,又例如雞粒排骨火腿,有時仲有tiramisu。

講喺意大利飲野方面我唔算精,只係入門,不過spumante,就係意大利嘅sparkling wine 啦,同champaigne 係唔同嘅。呢種酒喺意大利Lombordia(包括Milan)一帶幾特別。另一種喺意大利常飲嘅,叫做Aperol Spritz,都係意大利傳統cocktail。

IMG_20150516_1

其實,意大利人真係唔係日日食pasta 同pizza (朋友話意大利人每個星期六都食pizza 喎,算唔算風俗?)。佢地都食好多其他野。不過有一點比較特別,就係我同朋友都覺得意大利菜係偏向重口味,多多芝士,而且比較salty。頭盔:不過,我都唔能夠話我講嘅全對,亦都可能有錯漏。以上嘅嘢,都係集眾友見識之大全,再外加些許個人經歷姐。大家權當係外人一窺意國風貌啦 🙂

kiteless@string.com'

斷風箏的線

講野講到壹舊史咁。「投稿」仲打錯做「投搞……」,十萬級輪盡。

More Posts

Follow Me:
Facebook

高人指點

comments