男人唔可以唔識嘅「清補涼」

圖片來源:作者

圖片來源:作者

個人發覺好多年輕嘅或者不諳中醫藥膳嘅朋友仔,似乎對「清補涼」存在住嚴重嘅誤解,將佢當咗做「廿四味」之類嘅寒削猛烈嘅湯藥。唔止一次,當我聽講朋友有挨夜、口氣大,虛火燥熱等等既問題而建議佢地飲清補涼時,對方都係「哇!」一聲出黎,連帶住一句「唔使噤勁嘅」……我–> =口= ……

只能夠講誤解太深,結果好多人白白錯過咗一道簡單易整,又可以滋潤自己嘅家常湯水。因為講難度級數,以及力度,佢同皮蛋瘦粥差唔多咖咋,而且更加有益,係一款可以解決我地好多問題嘅萬用湯水嚟架,簡直係居家旅行,殺人放火必備良藥之選。

因為作為香港人,特別係香港男人,總有以下問題咖:一係挨夜,由男仔到男人,為咗打機好、溫書好、返工OT好、夜蒲好、陪女好,總之越夜越精彩。夜訓最直接既問題就係傷肝腎,谷虛火,短期嘅影響係有口氣生暗瘡,中期影響係無精神注意力唔集中,長遠影響係會降底性能力,甚或不舉。二係工作生活之中又煙又酒,然後飲食又唔定時,又中意食生冷嘢,而家又潮流興飲咖啡,得閒無事都要去Starbucks飲返杯扮下嘢。偏偏咖啡濕熱,飲得多會進一步刺激虛火,問題就再衰多幾錢重。總之唉夜損害肝腎陰精,不當飲食生虛火,兩者夾埋就叫陰虛火旺。年輕男子最明顯嘅表現就係一諗到女人就扯曬旗,但同條女一埋到位就軟曬扯唔起,就算扯得起都會早泄。後生十來二十歲時恃住自己個底好嘅仲無乜問題,但過咗二十五歲之後,呢啲問題就會逐步浮現,好多唔注意嘅人,因為咁壞咗個底,結果到咗三十歲已經舉唔起,就係咁嚟。

一如你部車每半年一次要入厰做service,換「偈」油,「偈」油嘅作用就係潤滑副機器,延長副「偈」嘅壽命,兼且令佢跑得更有力。而清補涼呢類溫潤滋補嘅湯水對身體嘅作用,就係好比你副「偈」嘅「偈」油,所以要定期飲用保養。

或者先喺字面上解下先,「清補涼」三字,清表示清熱袪濕,補表示補底養陰,涼呢,即係對應於前者嘅補嘅,意指補而不燥,即係湯料入邊雖然有補嘅材料,但亦有陰涼嘅元素作為平衡,所以絶對唔係一啲大寒大補嘅危險湯藥,而係四平八稳,老少皆宜男女合用嘅住家湯水。

材料組合有好多種,但一般都有百合、薏米、蓮子、圓肉、玉竹、茨實、淮山等等材料,然後可以因應個人需要有所增減,例如食得煙多想潤肺嘅,可以加埋南北杏。氣血弱想補血嘅可以加埋杞子、蜜棗等等。自己唔識嘅可以去藥材鋪執,佢地會知既啦,再唔係去雜貨鋪都有現成嘅湯包買。

我今日就買現成嘅湯包,當中百合養陰安神,薏米清熱健脾,蓮子補脾、益腎、安神,圓肉溫潤補血,沙參玉竹清熱養陰除口氣,茨實同淮山就補中益氣健脾肺。配一斤剩瘦肉,半煲水,大火滾開,之後轉細火,煲兩個鐘飲得,最好連湯連渣食埋佢。有我上述所講果啲陰虛火旺情況嘅,最好keep住三五日到一個星期飲一次,連飲一頭半個月,同時清淡飲食兼早休息,咁就基本可以將你體肉嘅虛火雜質去到七七八八咖啦,然後仲係無乜力嘅,就再整返劑我先前教嘅核桃、粟子、黑棗、茯神煲雞,補腦補腎補氣血。正所謂好腰好腎好男人,咁就包你鞭鞭有力。
當然,必需要強調,體質寒熱嘅野因人而異,我以上講既只系大路嘅情況,唔清楚自己嘅體質嘅,最好都係先搵個中醫師把下脉,問過佢意見先。另外雖然講咗咁多男人嘢,但「清補涼」係男女皆宜嘅滋潤湯水,女仔成日挨夜嘅一樣啱飲架,但要切記,有感冒,或者感冒未清嘅唔可以飲,男女都係,好就咁多~

旁門左味者,邪也~


補充:讀中醫嘅朋友Sanji Choi 指出,清補涼適宜夏天飲用,可以防中暑,特別係濕氣重既人。 但清補涼對寒底嘅肥胖人士不太合適,尤其胃寒嘅人,請注意。


補充二:關於廿四味。好多唔識藥膳嘅年輕朋友常犯嘅另一個錯係,亂飲廿四味-涼茶鋪入面既廿四味。唔好制,毒藥嚟架。呢個係好耐之前一位業界嘅前輩話我知嘅,成本問題,坊間涼茶鋪嘅廿四味肯定唔會執齊料,而往往只會簡化成最寒削嘅幾樣材料,變成重磅炸彈,間中一次半次,後生仔女年輕力壯無乜問題,但係成日飲真係會飲壞人架。

而且,火有虛火實火之分,分唔清虛實,亂噤飲嘅,只會越飲越衰。所以識飲嘅,只會飲最簡單嘅,例如:夏枯草、蛇舌草、五花茶、雞骨草,呢幾款,因為材料爛死噤平,唔會飲到假嘢。而且要對症下藥。

我會噤分:食得煎炸野多熱氣,即係實火,飲夏枯草。
通宵挨夜肝火盛,雞骨草。濕熱搞到肚痛肚瀉,五花茶。 而且只係救急用,一碗起,兩碗止,絶對唔會長期飲用。

長遠而言,大病睇醫生,小事都係阿媽煲湯煲粥搞定啦~


補充三:涼茶呢家嘢係為咗應對廣東地區嘅水土氣候而產生嘅,去到其他國家地區時,會因為水土氣候嘅改變,效果會唔同咗,身處海外嘅各位留學生們要留意。例如網友 Albert Hui 就指出﹕「有好多人去加州讀書,維持廣東人飲涼茶習慣,好快就病倒。原來加州水硬 (礦物豐富),平時就咁飲已經夠寒涼,再飲涼茶就會出事。」

ming@ming82.com'

黃邪

黃書最好讀, 邪性最難馴。 Blog: http://wongchea.blogspot.com.au/ (見下)

More Posts - Website

Follow Me:
Facebook

高人指點

comments