不專業京都飲食推介

睇黎上次介紹嘅乳酪飲品真係冇乜人感興趣,原來只得我一個去廁所去得唔太「開心」至需要揾「救星」打救。所以我今次都係講返啲揾食好去處實際啲,希望日後你地有機會黎京都旅行時可以有多幾個選擇。今篇有幾個地方其實我喺第一篇寫我喺關西食乜嘅時候有介紹過,不過當時冇提到呢啲地方嘅鋪名同地址,所以就打算一次過分享晒佢地嘅資料俾大家。我相信鰻魚飯嗰間鋪頭應該有唔少旅遊書有介紹過。不過我循例都打返嗰間鋪嘅鋪名同地點先啦。

(所以圖片來源:筆者,さらさ花遊小路室內照除外)

 

1 (1)
1.京極かねよ
地址:京都府京都市中京区 六角通新京極東入松ヶ枝町456
營業時間:早上11:30〜晚上9:00(last order時間為晚上8:30)
午市時間為早上11:30〜下午2:00(公眾假期及特定日子不設午市)
預算:2100yen連稅

佢嘅鰻魚飯我上次講過,今次覺得值得一提嘅係間鋪嘅門面好有歷史痕跡。真係完全表達到咩叫老字號!又舊又黑,感覺上好似俾大火燒過咁。但係入到去又未至於好似驚每行一步會踩爛人地板咁舊,同埋間鋪有兩層,地下坐櫈而上層就坐tatami,貪得意想感受下日式食飯氣氛嘅朋友可以揀坐上層架(雖然香港都有唔少日本食肆有得坐tatami)。

之後就想介紹返1000yen以內都埋到單嘅大大份set lunch鋪頭,其實佢係一間cafe黎嘅。不過呢間cafe嘅裝修都幾奇怪,一樓就好似一間舊舊地嘅bar咁,然後二樓天花唔知點解會吊住條類似一大條魚嘅裝飾,同埋啲檯啊櫈啊都係好似喺舊式嘅小學用嗰類咁,但又有一個area係梳化區,而次次梳化區都係俾人book左搞到我永遠都冇得坐。唯一嘅唔好處就係呢間嘢冇禁煙區,唔鐘意煙味嘅朋友可能就唔太啱啦。

 

圖片來源:makia11.exblog.jp

圖片來源:makia11.exblog.jp

 

圖片來源:tabelog.com username:kirara

圖片來源:tabelog.com username:kirara

2.さらさ花遊小路
地址:京都市中京区新京極四条上がる中之町565‐13
營業時間:中午12:00~晚上11:30(last order時間為晚上11:00)
午市時間為中午12:00~下午3:00(有set lunch供應)
下午茶時間為下午3:00~晚上6:00
晚市時間為晚上6:00~晚上11:00
預算:set lunch約1000yen,其他菜式最貴約1500~1800yen左右,視乎你叫咩食

然後就到我最鐘意嘅重口味二郎系拉麵鋪

4
5
3.ダブルラリアット
地址:京都府京都市左京区田中大堰町168-1
營業時間:早上11:00~下午3:00及下午5:00~晚上9:00(逢星期日及公衆假期休息)
預算:1000yen以下(連稅)

注意!呢間鋪啲湯一賣晒就收鋪架啦。有時多人幫襯的話,開鋪四個鐘就賣晒上晝啲湯架啦。我試過中左幾次招,一入到鋪俾老闆話唔夠湯整多碗拉麵俾我,然後叫我明天請早架。但係如果唔係星期六日去的話都好少會俾佢叫你明天請早嘅。仲有,如果你想要多啲芽菜的話可以同佢講,唔駛加錢架!麵嘅硬度同落幾多油落碗麵度都可以因應你嘅要求去調整架,只要你肯出聲。老闆以前做貿易公司要經常去唔同國家出trip所以英文都有返一定水準。所以就算你唔識日文都可以同佢溝通到,起碼佢會明你想佢點整你碗麵至滿意嘛。間鋪好近京都大學(行5至7分鐘左右啦),然後撘巴士或者行10至20分鐘會到銀閣寺,如果想睇下呢兩個地方嘅話(雖然我唔明點解旅遊書會叫人去參觀京都大學,到底有咩咁好睇)不妨考慮順便試下呢間拉麵鋪啊。

除左拉麵之外,當然唔少得沾麵啦。平時嘅沾麵都係用粗身嘅麵,但係呢間鋪就相反,用幼身嘅麵做賣點,如果有時覺得粗身麵好難咬斷嘅朋友可以試下呢間鋪頭架。

 

6
7
4.(無名氏)

地址:〒604-8005 京都市中京区恵美須町534-31CEO木屋町ビルB1
(建議由木屋町通與三条通交界向北行多兩個路口再向左轉,會見到有一條樓梯通往地下就係店鋪入口,門口盞燈有著就代表有開鋪)
營業時間:星期一至五為早上11:30~下午3:00及晚上6:00~晚上10:00
星期六日及公眾假期為早上11:30~下午3:00(last order為下午2:50)及晚上6:00~晚上9:00(last order為晚上8:50)
預算:1200~1300yen連稅

呢間鋪其實係高倉二条旗下嘅其中一間概念店,佢地特登唔幫鋪頭命名,就係想冇掛住高倉二条呢個光環下去試下自己嘅實力,係咪都係咁多人幫襯。味道如何?我個人覺得唔錯。至於有冇失水準呢?我冇食過高倉二条嘅本店所以就唔方便評論啦。不過如果怕辣嘅朋友要小心,佢每碗沾麵都會附送一大條青辣椒。而我係超怕辣嘅,所以上次去食嗰陣真係辣到我差啲連阿媽都唔認得,雖然我冇試過同師傅講叫佢走左條辣椒佢,但我相信你出得聲佢地都願意照做。

黎緊就想向大家推介一樣小食,其實係獅子狗黎嘅,又係啲魚肉加工食品,當佢係魚旦啦。咁香港嘅魚旦就係炸完之後拎去烚然後睇你加咩調味料,而京都呢邊就係先將魚肉同其他食物撈埋一齊整做一舊獅子狗然後拎去炸,之後再拎去蒸嘅。其實可能其他地方都有類似嘅小食,但呢間出品嘅獅子狗真係幾多種類架。可以試下上佢官網睇下佢有幾多隻味架!我有食過佢整嘅北海道小食—「牛油薯仔」做餡嘅獅子狗,洋蔥蝦同埋雜菜做餡嘅另外兩種都有食過。三隻都好好味,不過呢隻巨型獅子狗就會比香港普通嘅魚旦更加油膩同飽肚。

8
上面張相係洋蔥蝦做餡嘅獅子狗。呢間嘢喺京都比較就腳嘅鋪面有兩間,其中一間分店喺清水寺前面嘅表參道,另一間係本店,就喺錦市場入面。所以黎旅行冇打算去清水寺都可以喺河原町附近行街時順便去錦市場買黎試下架。

 

5.汸臼庵
本店地址:京都市中京区錦小路通富小路東魚屋町188
本店營業時間:早上10:00~晚上6:30
 
清水寺分店地址:東山区清水2-254(位於森陶器館門口)
分店營業時間:星期一至五為早上10:00~下午5時,
六日及公眾假期為早上10:00~晚上6:00
預算:每件500yen左右連稅

之後就想介紹一下gelato,呢個雪糕品牌係喺京都起家嘅,現時只有3間分店,仲要全部都喺京都。可以話係「京都限定」嘅鋪頭!好多日本人黎京都玩都會黎幫襯架。

 

9
6.Handels Vagen新京極店
地址:〒604-8035 京都市中京区新京極通三条下る桜之町406番地3
營業時間:星期一至五為早上11:00~晚上9:00,星期六日及公眾假期為早上10:00~晚上10:00
預算:細杯460yen,中杯600yen,可以選兩隻味做一杯
(最盡可能三隻味都ok不過我未試過唔肯定佢地制唔制)

 

佢啲雪糕味道都幾多下,有次試過奶茶味同あまおう(甘王)士多啤梨味,真係好似佢地網頁度寫嘅一樣,食左覺得自己變返細路仔咁嘅心情,唔係話咩童年回憶,而係食到咁好味嘅雪糕已經好滿足嗰種感覺。順帶一提,呢間喺新京極嘅分店同最先介紹嘅鰻魚飯鋪好近架!可以考慮下食完鰻魚飯再去呢度食飯後甜品。


希望我介紹嘅地方冇同旅遊書嘅重疊得太多之餘又叫做對各位揀地方食嘢時有幫助啦。

miluku@gmail.com'

miluku

90後一名,冇特別嗜好,只係比較為食,所以間唔中鍾意周圍搵嘢食。

More Posts - Website

高人指點

comments