香港留學生到意大利的生活見聞

前一段時間,有好多人分享自己喺外國多多少少既經歷。我一直等一直等,就係等緊有無人肯講下我住呢度嘅生活,但係無…… 哈哈,希望喺度拋磚引玉,可以有同在意大利嘅朋友出句聲!

啱啱睇完一篇英國嘅留學文章之後,令我諗起我呢度。我目前喺意大利四大城市之一,所以都係幾……繁榮。

我必須表示深感認同,香港店鋪收工遲,真係好方便。喺意大利,店鋪係隨心所欲開張同收工架,無錯,係隨佢心所欲。星期一至五,如果間店係定時定候開門閘門就真係好謝天謝地架啦,至於星期六,就有啲開有啲唔開。星期日就仲有趣,所有店都落哂閘,所有馬路都靜雞雞無車走過,成個城市好似死城廢墟一樣荒蕪,成日出街都唔知可以去邊。普通店唔開就算,連超市都係唔會開架。

cc photo via flickr user Stefano Costantini

cc photo via flickr user Stefano Costantini

以前住果間apartment,住咗幾個月,我都未見過隔離街鋪頭有開過。因為,佢每次開門都係唔知星期幾下畫3點到4點……啱啱撞正我某日走堂,於是先發現箇中巧妙啊!如果將來我都只係每日返3到4點就好啦!至於其他店,真係開店時間可以騎騎呢呢,朝早4點開到5點都得!

講起店鋪,或者可以提一提銀行。銀行都算係頹中之頹喇。通常係星期一至五開工,朝早九點半到下畫十二點半,下畫大約二點到三點姐一個鐘。哈哈,如果撞正你上堂之類,真係永遠唔洗旨意見到銀行開門嘅一日。特別係下畫去搵佢地,效率通常唔太高,你想開戶口之類……唔好意思,我地仲有一個鐘收工啦明日請早。有朋友想開個戶口,去咗三次都有唔同原因打發佢走。分別係:仲有一個鐘收工、我同事傾緊電話唔好等佢、同埋無哂卡。

cc photo via flickr user Flickred!

cc photo via flickr user Flickred!

人喺異地,如果唔精通意大利文就仲淒涼。因為喺意大利,好少人識講好好既英文。仲記得初來乍到,唔識去學校,問咗十個路人先有一個可以講到 left right 之類方向。最後發現圍住學校兜咗一大圈。銀行職員係英文最好嘅,人都ok,起碼佢地都肯話我知成份意大利文contract 入面有一句係話每次deposit 都要交手續費之類。之不過,試過深夜打去cut card 嘅時候,面對住bla bla bla 嘅意大利文,我好弱雞咁問咗句”parla l’inglese?”(Do you speak English?)然後,就比人cut 咗線啦haha。去郵局,去警局,佢地都未必識英文。試過去郵局,都會被職員老點排錯隊排左一個鐘A隊重新再排B隊再叫返我番去A隊排,forever狂loop。又試過去警局報案,警察係拎住Google Translate 問我口供嘅。呢啲就已經係後話啦。

cc photo via flickr user Alex Hammond

cc photo via flickr user Alex Hammond

意大利生活悠閒,幾適合退休,但係亦都會令佢地工作幾懶散。平時遇到效率低,做野慢吞吞都算,千祈唔好同香港比,如果唔係下下火滾就唔係太好啦。最緊要係抱住同樣嘅,唉是但啦嘅心態就會過得好少少。交通方面就係一例,外國嘅罷工非常常見,電車、地鐵、巴士、火車……咁啱比你遇著,都唔算唔好彩,叫做正常啦。甚至有一次因為罷工,果日嘅堂就咁cancel 咗啦。其他時候,都會覺得幾煩,然後諗返香港既交通真係好好。

其實講起異地特別嘅嘢真係好多,十把口都講唔哂。比如每次過馬路直情可以合埋對眼過,因為車都會停低比行人行先(此處係誇張咗,真係唔好合埋眼!)。例如話,我喺呢度從來都唔洗自己開門,因為前面嘅人會好gentleman/lady 咁開比我,我就開比下一個。(朋友不是我呻:香港嘅男仔都會咁紳士就好啦)又例如話,煙民都幾多,成間學校都係煙味每次返學都好似入霧陣要破除視障。除此之外,意大利足球、意大利美食、意大利扒手、意大利盛產靚仔、意大利時尚、旅遊…… 凡此種種,相信大家都有耳聞,我講得多好攰,去到呢度收下聲啦~~

cc photo via flickr user Michael Dawes

cc photo via flickr user Michael Dawes

kiteless@string.com'

斷風箏的線

講野講到壹舊史咁。「投稿」仲打錯做「投搞……」,十萬級輪盡。

More Posts

Follow Me:
Facebook

高人指點

comments