等到頸都長嘅丹麥交流生又係食啲咩㗎?(二)養生篇

相信上次大家見到咁豐富嘅丹麥交流生飲食 ,係咪覺得意猶未盡呢?咁就唔好畀佢停,一於繼續丹麥之旅啦!我都唔想大家條頸等到一長再長,呵呵!

其實平時煮飯,又點止粉麪飯咁齋喎?萬一唔好彩頭暈身臖、食慾不振、肚脹飽滯點算好啊?唔通要繼續捱熱氣cornflakes、乾爭爭廉價白麪包、生骨白飯……?Of course not! 電飯煲幫到你,可以有靚粥食!當初我都無諗過煮粥嘅,都係因為一次小意外發現新功能。話說某日我同我同學應該一齊出門口上堂,但佢病咗,重好似有啲發燒,所以決定走堂休養下。我上完堂得下一堂嗰陣,收到佢message,竟然係用我個電飯煲炮製嘅白粥……就第一眼而言,應該話係「糜」—同「綿」、廣東粥有好大距離喎。但我同學堅持話碗粥好綿好靚,係人間極品,叫我返去試下再煮。見佢精神咗咁多,似乎呢碗絕對唔係粥咁簡單,勁過退燒餅啦!

所有圖片來源:作者

所有圖片來源:作者

我唔信碗「粥」真係咁好食,決心要親自做一次實驗先罷休。比平時煮飯落多幾倍水,煲一陣果然滾得如火如荼,學同學話齋真係驚佢爆煲,要打開個蓋。最後真係煲出一碗「糜」樣物體,食落真係好綿好滑!難道係因為經歷過滾到壓力爆煲,先製作出嘅結晶,真係咁令人滾動?

想再滾動多幾分,又唔想出動真煲,簡簡單單嘅飯煲粥,重可以有無限變奏!豉油撈粥?病就唔好食咁重口味啦……梗係加粟米粒、生菜絲啦!夠晒纖維,簡直完美配搭!

Congee_2

想身體好,當然唔係病先食碗粥,防患於未然先至可取。博大精深嘅涼茶學問、溫暖貼心嘅愛心湯水,感謝Asian Market,統統都可以實現啦!夏枯草、清補涼……嘩!聽見都覺得好涼啊!日日夜夜活喺暖氣懷抱入面,麪包等等都熱氣,見到以上孖寶,二話不說,掃啦!

夏枯草喜歡就加糖,想減肥或者唔想買糖(買一包我話你走之前一定用唔晒啦……),唯有忍一忍淡同苦啦。吃得苦中苦,方為人上人啊!
有幾次,我就偷偷地加咗遠古時代喺香港去丹麥程飛機上攞嘅咖啡糖、砂糖咁囉。

Herbal Tea

清補涼呢……喺香港幾大都唔買現成湯包啦!自己逐樣執最有質素保證。身在Aarhus啦喎……有得你飲都萬幸,打開見到淮山、玉竹、杞子、龍眼……嘩,妙啊!煲咗幾個鐘,廚房同自己房之間出出入入,終於完成!份量煲夠四碗,淡就淡啲,勝在多幾次開心幸福嘛。

Ching Bo Leung

重有個絕招要講下,就係如何將風馬牛不相及嘅剩餘物資一次過無痛KO?我諗大家都知,可以整炒飯呀嘛。炒飯真係偉大發明,淨返一條香腸、一截青瓜、幾隻雞蛋、西蘭花……炒埋一齊,再落豉油,真係天堂美食無得彈,感動到喊出嚟。賣相重係何等美觀,當你隔離個flatmate喺度食緊超市隨手亂買嘅pastry,你碟香氣四溢嘅傑作認真羨煞旁人!

Fried_Rice_1

Fried_Rice_2

重點係,炒飯重可以幫你錫住荷包。次次食西蘭花都有個煩惱:睇親食譜,張張相都影住深綠色嘅花冠,邊有人會食條又硬又淡嘅梗㗎?初頭為咗唔好浪費,成條梗就咁切片,喺無烚過嘅情況下同花冠一齊炒,跟著食飯嘅下場真係悲哀……好。難。食。。。

Broccoli

靈機一觸之下,我將梗切粒,亂咁倒落炒飯度炒,竟然出人意表咁好味!如此一來,炒飯又夠纖維,又可以拯救西蘭花梗,一舉數得,何樂而不為?

Fried_Rice_3

Fried_Rice_4

下次更加精彩,唔好行開啦!

tntintin88@yahoo.com.hk'

丁丁

只要在同一片天空下,就有夢想環遊世界、熱愛音樂與寫作的丁丁。

More Posts

高人指點

comments