小時候低低能之七/哈樂車

cc photo via flickr user Jo

cc photo via flickr user Jo

諗咗好耐細個有啲咩陪我過,終於俾我諗到,得以繼續寫小時候低低能系列~

長頸鹿哈樂,馬仔凱莉同埋譚美係我每年小學九月一開學就開始期待嘅嘢。
有一日小息去操場見到一架藍色好長嘅車泊咗喺停車場隔離,我就知好快有機會上哈樂車玩,會每一堂敬禮嘅時候都好期待老師話「嚟緊兩堂我地會上哈樂車」,咁嗰兩堂就唔洗上。仲記得有一年兩堂體育堂俾哈樂車取代咗唔係幾開心⋯⋯

唔知全港係咪間間小學嘅細路都有哈樂車陪渡過六年,但我嗰間就由我小一到小六都有安排哈樂車嚟俾我地上去上常識堂。全班上晒嗰架長型車,坐滿之後閂埋門入面就好暗好似要睇演唱會咁,大家就勁興奮咁喺度大叫歡呼,因為全年最開心嗰其中個半鐘即將要開始。

低年班嗰陣上去烚下烚下睇下姐姐玩隻哈樂木偶,聽下哈樂唱歌同媾下凱莉好快就過完兩堂落車走人,但高年班嗰陣時好似係上去學消化系統,食煙同吸毒。咁多年後已經唔係好記得個幾鐘入面總共有幾多個環節,但好記得譚美每一年都會壓軸出場。唔著衫仲要有半個身俾人去皮得返內臟示人,仲會每個器官都識著燈嘅譚美,就係嗰時教識我地幾十隻小學雞究竟啲嘢食係點樣由個口進入體內再一路到胃,腸,最後被屙返出嚟。

仲有嗰啲半呃錢嘅紀念品。每日小息哈樂車都會人頭湧湧,大把細路拎錢去買勁多哈樂product。我諗我都有買過幾舊五蚊嘅哈樂立體擦膠,好得意,嗰陣時完全唔捨得開嚟擦,到而家我屋企都好似有一舊膠袋都未開。呢樣紀念品已經係最平,我記得有錢啲嘅其他同學會買哈樂筆,貼紙,甚至大大隻公仔⋯⋯

ding@ding.com'

dingding

最後一年留學,瘋狂打工攢錢再瘋狂浪遊。

More Posts

Follow Me:
Facebook

高人指點

comments