繼續唔關留學生事嘅澳洲留學生食啲乜 最終回 哇!穆斯林最黑暗嘅一日呀!──二世祖與窮秀才的飲食對談(二)

(水由古月、黃邪合吹,文由黃邪執筆而成)

(前文:part1 home staypart2 Backpacker 同大學宿舍part3  宿舍奇聞part4 Food court、買餸、打邊爐part5 天崖海角的香港之光

以下 古為古月,黃為黃邪

今次唔玩花臣野,但求有餐住家飯食下,聞下猪油味~起行個鑊,再落猪油果下,真系香到隔離屋都聞到~好正啊~T_T.....

今次唔玩花臣野,但求有餐住家飯食下,聞下猪油味~起行個鑊,再落猪油果下,真系香到隔離屋都聞到~好正啊~T_T…..

古:我另外一個算唔上文化衝擊,比較接近係文化花生嘅,就係同穆斯林去飲茶啦。響我讀餐飲管理進階文憑嘅時期,無可避免要做分組project。咁當成組人各散東南西北區又有人無車嘅情況之下,去學校附近嘅茶樓一路食一做傾就來得順理成章啦,而且間茶樓仲係好食過香港唔少同業㗎喎。

而你都知啦,響正統港/廣式點心入邊,豬肉係無處不在嘅,就算無同你講有豬肉,一如蝦餃,其實都有落肥豬肉,先得佢咁好食㗎嘛。有日我同果位生死之交一樣嘅穆斯林同學去飲茶嘅時候,我哋嶺南文化註新南威爾士代表一早就醒水,有豬肉嘅一邊,無豬肉嘅放響佢面前,費事跣人破戒啦。不過人地做fine dinning,出手實在太快,我哋一個唔為意,俾佢一嘢啪咗粒蝦餃同芋角入口喎!

「哇!穆斯林最黑暗嘅一日呀!」

事後我旁敲則擊咁問佢:

「根據你嘅信仰,如果你唔小心、唔知情嘅情況下食咗豬肉,會點算㗎?」

跟住佢嘅答案就精彩啦:
「技術上嚟講,咁嘅情況,我係比人呃之嘛,所以我無事嘅,係呃我嘅人落地獄嘅啫~」

嗰吓我同我另一位香港人即刻相視一笑,言下之意,阿叔我死咗之後,一係落天主教地獄(皆因我多年來成日同耶撚過唔去),一係落穆斯林地獄,兩邊搶,有排玩喎,花生有排食啦,哈哈哈哈哈!

豬油~

豬油~

黃:哦~~~恭喜古月公子落地獄~~~~咁事實佢知唔知自己食咗豬肉嘅啫~

古:咁其實,佢媽媽係唐人嚟嘅,話佢完全唔知就搵鬼信啦,不過側側膊,唔多覺,總之咪太過份,隻眼開隻眼閉啦。

黃:咁仲有一樣我想講嘅呢,就係中式菜刀啦。就話說我遇到嘅其中一任鬼佬大廚呢,就有一日唔知點解屎忽痕買咗把中式大菜刀嚟用,結果一用就唔啥得放手啦,成日喺度鬼食泥咁呻:

「屌,都唔知做乜鬼我哋啲人要整幾十樣刀出嚟,切菜又呢把,切肉又果把,麻鬼煩兼夾無效率。你地啲刀咁鬼好用,Fuck, one day, I may became an Asian」

38290_452230905538_1916658_n

古:呢樣都聽你提過,咁以我嘅經驗啦,中式菜刀切菜係好好用嘅,但係去到處理肉品果陣,有刀尖嘅西式菜刀又會好用啲喎。依個係關乎菜系之間完全唔一樣嘅食材處理哲學同概念,同埋每個檔之間都唔一樣嘅工作需要分配A. K. A. Prep list 嘅。又其實,就算係中式菜刀,都有文武刀、九江刀等等嘅分類,雖然形狀上睇起嚟好似,用途都係有分別㗎喎。

11147918_10153185942700539_1165132298_o

一如我響東岸做嘢時,好多同工都對日式菜刀有種迷戀嘅,之但係買把魚生刀返嚟切魚切到發忟憎嘅鬼佬亦不在少數喎。其實咁係關係到唔同嘅刀具,係有唔同嘅特性,同需要唔同嘅使用與及保養習慣嘅,用單邊開鋒嘅魚生刀,配以西式切魚嘅手法嚟做嘢,好容易就會流於神雕入面公孫止套金刀黑劍咁,刀使劍法,劍作刀使,咪唔夠人打囉。

而事實上,當你喺商業廚房入邊,要處理大量蔬菜時,中式菜刀平而直嘅刀刃線係非常有效率㗎。所以果陣我哋位低微,只能負責處理蔬菜嘅時候,常用嘅就係一把日式嘅三德刀,因為佢嘅刀刃線係同中菜刀相近,能夠發揮同樣嘅效果。不過係最緊要嘅,始終都係要自己有舊磨刀石去保養住佢,咁先用得長久嘅,而我嘅觀察係,好多鬼佬廚用嘅果把係鐵間尺嚟㗎。

黃:以我踎過嘅果個高檔嘢觀察呢,好多都係中西式刀混合使用嘅添,兩三把西式刀,跟一把中式刀咁玩。然後保養方面呢,我仲記得當年有其中一任英國佬廚仲要專門請磨刀佬嚟同佢磨㗎,佢哋自己的確唔係咁識處理嘅。

古:其實,同工們總有幾把刀返工仲有一個原因,就係出於嗜好鍾情於儲刀,一如攝影師會不斷買鏡頭一樣。買刀,都可以累全家㗎!

1473048_10200757067483030_1884124287_n

黃:咁又係,作為廚房佬,又點會無返幾把刀傍身呢。同埋你剛才一講起飲茶呢,我就醒起,呢邊鬼對我哋飲茶點心嘅迷戀程度真係遠超我想像㗎,而且對我哋啲規距都好熟㗎,相信佢哋真係自細就跟住父母一齊去飲茶嘅啦。我曾經試過係一間頹唐餐度食嘢,係果種杯碟筷子自去去櫃度摸果隻,我睇啲鬼入到嚟,仲知定過我,啲動靜舉止十足十唐人咁,係差在未洗杯洗筷子嘅者。

古:講起呢樣,我都試過係間燒臘鋪度食燒臘飯,一班鬼嚟搭枱,結果發現班友揸筷子揸得仲正宗過我……

黃:而且我哋過往聽講嘅鬼佬唔食內臟啦,鬼佬唔食鳳爪啦之類嘅傳說似乎係呢邊都打破咗嘅,我見過佢哋食豬肚、牛栢葉啦,亦都見過佢哋食鳳爪㗎。似乎真係地緣政治嘅關係,澳洲人對亞洲文化嘅吸收係遠遠多於其他西方國家,好多係度大嘅鬼仔都真係好Asian吓㗎。

古:仲有海蜇都照食㗎,圍起我識嘅鬼仔唯一難到佢哋嘅係豬雜,準確嚟講係豬腰,可能關乎處理不當啦,不過點講都好,及第粥佢哋係搞唔掂嘅。

黃:然後另一個衝擊到鬼佬嘅,就要講下我哋嘅過冷河啦。話說當年我仲係backpacker時,有一次我想整牛椒牛肉炒意粉,咁就例排烚熟咗個意粉之後過冷河啦。果下又shock 到條意大利仔啦,佢O曬嘴咁話你做咩啊!我話過冷河囉,啲意粉爽啲㗎。咁佢話佢哋意大利人只有係啲意粉煮過咗龍,煮壞咗先用呢招咋喎,平時唔會無啦啦過冷河㗎。

古:講到過冷河啦喎,我咁講啦,萬法歸宗,睇你要啲嘅啫。因為意大利人呢,有個根深蒂固嘅概念,就係煮意粉嘅水係會成為個意粉嘅一部分嘅,依少少煮粉水能夠成為醬汁同意粉間嘅橋樑,得以令到醬汁同意粉彼此水乳交融,所見佢哋死都唔肯過冷河洗走佢㗎。

而事實上,我自己嘅經驗係,如果跟足步驟火候去煮意粉的話,都係爽口彈牙嘅,過咗冷河之後就唔係果家嘢㗎啦。所以話,冷河係一個手段,觀乎你要啲咩成品,要做出點樣嘅效果嘅啫。

163993_1459850750245_6019700_n

所有圖片來源:作者

黃:而最後一樣culture shock 到我嘅,就係一如端典代表所講咁樣,見到啲鬼仔用洗潔精洗完碗之後唔沖水嘅囉。

古:我呢邊係直情未見過啲鬼仔洗碗呀!啲契弟真係名副其實懶鬼呀!

黃:咁因為我當年住BACKPACKERS嘅時代,例排規矩係你自己用完嘅餐具自己洗返㗎嘛,唔洗比人閙㗎。

古:我返工嘅地方,尼泊爾人、印尼人、菲律賓人、非洲人洗碗都有,就係未見過鬼洗碗,至於我住嘅地方,一如上面所述,佢哋食完啲碟幢埋幾個星期,寧可用即棄碟都唔洗㗎!

黃:我早就已經見識過,只要無洗碗機,只要係要用手洗嘅,佢就做得出嘅啦,隨手隊落啲洗潔精水度過兩過,成碟泡咁就放上碗㗎嘅啦,唔過水㗎。

古:咁計,究竟係關佢哋係鬼事吖,定係因為佢哋係第一世界死o靚仔,缺乏自理能力呢其實?

黃:我覺得佢哋係唔識死,因為老果啲鬼好啲架,起碼會沖水。

(又係時候去飲水,敬謝撥冗賜閱,新題再續。)

ming@ming82.com'

黃邪

黃書最好讀, 邪性最難馴。 Blog: http://wongchea.blogspot.com.au/ (見下)

More Posts - Website

Follow Me:
Facebook

高人指點

comments