青少年攻心計—之追逐名聲

有人會話,大人嘅世界好複雜,職場上爾虞我詐嘅事件多不勝數,細路仔(多數指未出黎做野)就簡單得多啦。佢地最多咪係講吓是非,欺凌排擠呢啲都唔常見,同埋咁樣亦唔能夠話佢地攻心計,因為佢地唔會識猜度同計算,只係純粹由心而發地唔鍾意一個人,而疏遠、排擠某人,難啲體現佢地係攻心計。

其實都唔係,,今次係想講吓佢地為咗名聲,個腦都可以轉得幾快,機關都可以算得好盡。

事緣就係我讀中學嘅時候,學期尾都會有一個大型嘅綜藝表演,同其他典型嘅表演節目唔同,呢個表演係會分上下晝兩場,上晝半校人睇,下晝就另一半校人睇。換言之個活動會佔咗全日嘅返學時間,同其他常見只係會比同學表演兩三個鐘嘅唔同。

個綜藝表演規模之大唔講,佢亦係譽為學校全年最囑目嘅盛事,基本上同學們都會好熱衷去睇呢個表演,而呢個表演亦係我校造就出唔同嘅傳奇人物,因為你一上到台表演,表演突出吸睛的話,全校嘅人就會識你,令到某啲人嘅風頭可以一時無兩,而嗰啲人,身上面就彷彿散發出儼如明星嘅光芒(某啲係自以為)。

故此,某啲好希望受世人關懷注目,或者想出名嘅同學呢個時候就會大嗌一句:這些機會,終於都屬於我了。

某一年嘅呢個綜藝表演,我被friend搭friend地獲邀做後台嘅工作人員,咁我亦都冇拒絕,做後台,唔止擔擔抬抬,有時仲可以聽到好多野。

話說原來年年最易吸到人睛,同埋令到全場最high爆嘅項目,永遠都會係跳舞,而跳舞唔係wave晒,喺地上面轉幾廿百個圈加倒立嗰啲,而係k-pop為主。

嗰一次喺後台,我聽到一位女同學同主辦單位嘅人嘅對話:

「我同你咁熟,當然畀個壓軸出場嘅你。」呢番說話出自主辦單位嘅人口中。

「唔該晒,我地team要做最後出場之餘,隔離team都唔可以搶我地風頭。」冇錯,年年都會有好多班人試圖想成為全校最出名嘅人。

「咁你想我點安排?」

「擺佢地去第一又會比人覺得係開場項目,就擺佢地去第二啦。」然後,兩把好難聽嘅女人奸笑聲從後台傳出。

我當然心諗:乜名聲真係咁重要?我望住自己後台工作人員嘅工作證,我冇乜特別感覺。

但攻心計最精彩嘅部份—演戲,係尚未展現。

與此同時,run down一出,第二隊亦發覺唔妥,然後向主辦單位理論。

嗰陣時,我喺台上面執緊野,而第一隊,第二隊,同埋主辦單位亦喺台下面。

「可唔可以將我地調前啲?」

「唔得呀,編好咗架啦份野,改唔到。」然後,主辦單位就施施然離開,留低第一隊同第二隊嘅人馬。

之後嘅劇情發展,就係第二隊嘅人誠誠懇懇地同第一隊嘅人講數。

cc photo via flickr user cristian muñoz

cc photo via flickr user cristian muñoz

係真係誠懇,只因佢地被蒙在鼓裡,完全唔知佢地已經係被當權者控制住嘅一群豬。

「我地隊低年班嘅多啲,你地隊就高年班嘅多啲,可唔可以讓個上晝比我地做最後,因為上晝係比低年班睇。」

「嗯…等我同班隊員商量吓先啦。」呢個女人嘅面口,真係好深刻。

真係笑得燦爛過一個烚熟咗嘅狗頭。

為八卦,我開咗隱形(純粹只係冇人識我)嘅技能落咗台下面聽佢地「商量」啲乜,殊不知原來要呃到人,先要呃埋自己人,班隊員原來係乜都唔知,有啲仲同情第二隊想讓步。

呢位想出名想到個心創晒嘅女同學點會比呢件事情發生,

「你知啦,我地啲髮型服裝講究咁多,去到咁前真係唔夠時間。」呢句最令我聽到當堂呆晒,咁都可以係一個理由?班隊員唔知係諗唔到野駁佢定已經係同意咗隊長嘅諗法。

「我地全員一致贊成唔會讓,好對唔住…」佢個樣,十分之誠懇。

「因為我地多人,又要化妝set頭,唔同舞有唔同衫,排最後時間鬆動啲…」佢個表情係十分之愧疚。

我唔知內情嘅話,都會畀佢呃到。

然後,第二隊就好成功咁變咗做第一隊嘅綠葉,做咗個好稱職嘅襯托工作,而嗰個女人做唔做到大好人我就唔知啦,反而第二隊有某幾個隊員竟然喺輿論界跑出,成為焦點。

呢個世界真係好搞笑,是吧?

嗰日完咗show,日落西山,上頭(班中好友)同成班後台一齊去食甜品慶功,喺臨出校門之際,我見到兩隊嘅人馬喺大堂同人影相,外人睇可能冇唔同,但我呢個知道內情嘅人睇落,只係覺得第一隊嘅女隊長嘅笑容真係好假,好虛偽,好想嘔。

的而且確,世人唔會知道原來你嘅壓軸出場係用手段同奸詐攞返黎,我呢個知情者就算講,啲人識我係老鼠,睬我有味啦。

但我望住第二隊嘅人嘅笑容,雖然佢地某程度上都係有想為名聲嘅意圖,但我嗰一刻,我好慚愧,唔向世人揭穿佢地可以,但我最後亦冇同返第二隊嘅人講,你地其實一早比人擺咗上枱。

最後,我只想奉勸同嗰位女隊長一樣嘅人,即使你地係跳k-pop還是做緊咩都好,不如去演技訓練班博吓,達到你嘅目的之餘亦可以將你地嘅個性發揮得淋漓盡致。

派拉特

沒有文字,又怎能說心事?

More Posts

Follow Me:
Facebook

高人指點

comments