窮中產移民計劃

香港地四五六七百萬嘅窮人恩物我真係住唔起喇,幾千蚊租個蚊型劏房又唔想。不如試吓逃離市區,搬入離島啦!長洲?賓客人數太多。南丫島?租有啲貴同埋我又唔係ABC,鬼識同外國人溝通咩。而坪洲呢,佢好似你中學裏面最唔起眼嘅同班同學咁,暱埋一角唔多覺,加上佢上面無渡假屋,閒雜人又小,逃離感倍増。據本人非精密統計,十個香港人有五個話未去過坪洲,去過嘅有兩個以為東平洲係坪洲,你話坪洲幾咁唔覺眼呢,真係逃離嘅首選。

根據維基百科,坪洲人口五千幾,生活設施基本上都有,一個三百呎單位租四千至八千,係冇七仔冇私家醫生睇(最近終於有返),舖頭又早收,又遠又要趕船又冇夜蒲乜娛樂都冇。如果真係頂唔順,離島真係唔係咁啱你。就算你頂到,實有花生友話又要搭船又剩,又花時間交通費又貴,幾平租都冇用啦。無錯,如果你返工返新界,堅係遠,但返港島區呢? (中環最無敵,落船即到)我親自計過,由上船一刻開始,到轉港鐵去炮台山行多一陣到公司,有多冇少一粒鐘。慢船35分鐘$15.3,港鐵中環到炮台山$5,全程$20.3其實同一般新界出九龍巴士差唔多,都未計你塞車同等車排餐死嘅時間。船就超級準時,你趕到就實上到,話七個字到就七個字。要開OT或者夜蒲,唯有搭灰姑娘十二點半尾班船或者子夜場半夜三點個班,咁咪當訓練自己做嘢決斷啲,時間控制再絕核啲,Hea少啲,激發潛能喺尾班船前做晒啲嘢,十二點好除定玻璃鞋跑去碼頭。

當然除咗趕船呢啲最基本問題,坪洲都有唔少令我哋啲市區人唔慣嘅嘢,之後再講。不過呢度確實有太多你市區唔會體驗到嘅奇幻經驗,至小,你要有呢個無敵海灘景,我響市區要租幾錢嘅單位先有呢?

(編按:今朝凌晨新開的專頁小島洋菜,like啦like啦~)

圖片來源:作者

圖片來源:作者

小島-洋蔡

今年豁豁豁出去,成為坪洲人Junior,發掘香港真正嘅堅「離地」城

More Posts

Follow Me:
Facebook

高人指點

comments