初哥學人寫碟評:吳雨霏《艷羨》-林憶蓮加持

cover
「吳雨霏」,三個字,藏著甚麼的意思?

九餅年代Cookies最不起眼的那一個,但竟可以成為「九揀四」時的生還者皆因係四個入面最唱得?

「杏仁亦要花氣力」「明知做戲」「憑我徹底的勇氣 愛是最大權利」梗有幾首係你K房飲歌?

同余文樂有過一段情,分咗手之後覺得每一首佢唱嘅情歌都係講緊佢同余文樂?

有個離離合合咗無限次嘅網球王子男友?(今年年初最後一次復合,終於修成正果,恭喜晒!)

《艷羨》係吳雨霏婚後首張唱片。先行同名單曲〈艷羨〉喺去年已經派台,由被譽為80年代hidden gem的林憶蓮與其男友恭碩良監製,80年代的跳舞音樂曲風先聲奪人,喺年尾頒獎典禮大放異彩。洪太亦預告呢張專輯將會行八十年代風,加上有林憶蓮加持,立刻叫人大為期待,專輯發佈後立即先聽為快。

Track list:
豔羨
一分鐘稀客一分鐘色誘
想入非非
一千個假想結局
流螢
我敢愛
超男友
真過份

專輯一開波就係呢幾個月聽到耳熟能詳嘅〈艷羨〉,那叫人熟悉的80’s dance beat,已叫人期待接下來洪太會交咩貨。緊接嘅〈一分鐘稀客一分鐘色誘〉帶點funky,繼續教人好想跟住一齊un。〈想入非非〉由人山人海蔡德才同盧凱彤主理,竟然聽到有點黃耀明嘅影子。

〈一千個假想結局〉作為專輯嘅第二首主打歌,同前三首歌曲風迴異,係一首慢歌,歌詞出自八十年代著名詞人潘源良,貫徹專輯八十年代風。接著嘅〈流螢〉亦都係首慢歌,出自C. Y. Kong手筆,但毫無驚喜可言,可能俾佢個同王菲首〈螢火蟲〉差唔多嘅歌名呃咗-話晒都係出自同一位作曲人手筆,點解可以有咁大落差?〈我敢愛〉作為洪太結婚之後第一首唱嘅情歌,終於聽唔到佢同余文樂嘅影子,只有佢同新婚老公嘅甜蜜。之後的〈超男友〉只係一首好typical嘅情歌,作為一隻商業碟,我明白呢首歌嘅存在價值嘅。

成張專輯教人最有驚喜嘅竟然係最後一首歌-由林敏驄填詞嘅〈真過份〉!呢位才子最近專注做龍友,已經多年冇新填詞作品出爐,雖然歌詞看似無厘頭,但配上何山嘅曲,又得咗,真係唔到你唔服。

作為一張(企圖)向八十年代音樂致敬而且得到林憶蓮加持嘅商業專輯,呢隻碟都算超班,吳雨霏亦都駕馭得游刃有餘。見到佢依家可以獨當一面,作為一個由「九餅」就睇住佢不斷成長不斷進步嘅樂迷,真心高興。在此祝福佢新婚快樂,早生貴子。

vivien@vivien.com'

Vivien Lam

(Editor's comment: writer with good taste in music)

More Posts

Follow Me:
Facebook

高人指點

comments