唐人街餐館小費奇聞

年初一最後輕鬆收爐,多得有個阿頭剔錯咗應該係今日嘅BOOKING去咗尋日,然後我地SET好晒十幾人大台等佢地大駕光臨,最後得個吉。老闆黑晒面因為佢為咗呢張大台推咗好幾班WALK-IN客。

大年初一嘅夜晚,一如所料係中國人多。尋晚發生左件幾好笑既事,成為夜晚STAFF DINNER嘅重點。

話說我地呢面係用DEBIT卡,用禁密碼嚟代替簽名嘅。咁如果啲客話比卡呢,我地就會拎部機去佢張台幫佢收錢。

咁插左張卡,出咗個銀碼,我哋就會俾部機佢,同佢講please check the amount and follow the instruction嘅。果時部機個畫面係問你:我入果個銀碼岩唔岩?即係同你張BILL個數一唔一樣。咁撳ACCEPT啦,下一頁就問ADD A GRATUITY?如果YES就撳制再加個TIPS啦,NO就直接去下一頁撳PIN(密碼)就得。

因為好多大陸客都碌卡,同通常都少串,特別係一身名牌果啲,咁俾部機佢佢第一時間就撳密碼,咁呢,部機就會HAND嘅,要CANCEL TRANSACTION由頭再做多次,已經見怪不怪,只係浪費大家時間。

另外一班就聽話睇清楚要撳個制先,無瀨到野,去到下一頁ADD A GRATUITY呢就望住個畫面呆左,因為佢地唔識GRATUITY係點解。有大半聽到我話係TIPS咁解就撳NO去下一頁撳密碼,咁無所謂嘅我作為學生,我都好少俾TIPS,但當然佢哋有錢過我好多倍(我識一個大陸人一個月洗10000鎊,係鎊。我10000港幣都洗唔到)。另外果班聽完TIPS都係一舊雲,要出動我普通嘅普通話講「小費」先明。最後都係喺浪費大家時間之下成功收錢。

有見及此,老闆就換過部新機,新機唔會再問”ADD A GRATUITY?”而係轉左問”ADD A TIP?”慳返好多好多好多時間。但當然,有啲客係唔簡單嘅,繼續有大陸客問WHAT IS TIPS?咁我真係有少少疑惑,你嚟呢面讀書英文要求都有返咁上下,TIPS都唔識,當初你IELTS係點過骨嘅?係機場入境係點答海關問題嘅?

但以上都係燥底多過好笑既。直到尋日果單就真係好笑。主角係華人男仔,唔知係咪大陸人,但英文無問題,幫佢落單佢係講到個菜名,而唔係好似大部分大陸人咁指住個MENU喺度THIS THIS THIS。到撳完PIN俾返部機我等緊CONNECT果陣佢有啲疑惑咁問我啱啱部機第二個問題係咩問題。我話係ADD A TIP。佢即刻有少少尷尬咁同我講「我好似入左我個PIN做TIPS」。我都幫客收過幾百次錢,但今次我都俾唔到反應。呢一刻部機LOAD完張單彈左出嚟,一睇,TIPS果行就係佢個4位數字密碼……足足四十幾鎊,五百幾蚊港紙……

cc photo via flickr user Dave Dugdale

cc photo via flickr user Dave Dugdale

ding@ding.com'

dingding

最後一年留學,瘋狂打工攢錢再瘋狂浪遊。

More Posts

Follow Me:
Facebook

高人指點

comments