[短篇小說]深夜食堂 情人節-單身體驗日

幾年前,我同一個日本朋友HARU喺天后開咗間日本餐廳。生意一路都唔錯,喺食評網都算係評價唔錯。我呢個日本朋友係好好嘅partner,有義氣唔在講,連當初傾買日本貨嗰陣,uncle都好熱心咁送埋tips,話係費事嘥晒啲料。我而家嘅技術有唔少都係uncle學返嚟。

但係呢條友仔,一到大時大節就收埋自己,尤其係情人節。其實毒撚一個更開心,我點會唔明吖,但係丟低間鋪自己毒自在家都唔係辦法架。

「andy,你唔好理我啦,今年連巴士都係心型牌呀,心形牌呀!仲要叫人去自拍呀!The city is fucking crazy!你叫我點出街呀?你要我嗰日都返埋鋪,不如你一槍打死我吧啦。」

大佬,你講到咁,我可以say no咩?

於是幾年嚟,今年情人節,我唔只感情上單拖,連開舖都係單拖。

我睇住條友煲劇,突然間叮一聲,我拎起我哋menu用嘅紙同毛筆,問佢最後一句:

「你嗰日真係唔開舖啦嘛?我唔預你喇?我自己玩fusion架喇?」

無反應。

算。做嘢!

 

Menu:

深夜食堂-單身體驗日

今晚是特別的日子

我們想令大家過得刺激

所以今晚將會有特別的安排

相信大家都會看過日劇深夜食堂

「任何菜式,只要不太難也可以做」

沒錯,今晚就是沒有main menu,讓大家自由決定吃甚麼的一晚

另外,這日也是單身體驗日

無論客人有多少人,也會安排大家為單人

PS 平時的定食和酒menu仍然會有,但定食只會有當日決定的一款

感謝各位

-----------------

呢兩日張notice出咗之後,唔少客都問,仲要係專揀HARU嚟問。我唔知點解無客問我,但係HARU每俾人問一次,佢就越灰,見佢眼濕濕我唯有話:「你哋俾佢靜吓啦。」然後拍咗拍佢膊頭。

然後都係無人有反應。食嘢嘅繼續食,相機食嘅喺我拍佢膊頭嗰吓,閃完又閃,好似要同碟嘢做X光咁。我唯有偷偷哋同HARU補多句:「佢哋係咁架,無事,乖。」

終於到咗星期六晚。

-----------------

星期六。

雖然我都預咗喺香港搞深夜食堂式嘅night owl timeslot係無日本咁好氣氛,但係我真係估唔到呢日嚟嘅人,無論熟客又好新客又好,大部份都話要...

「乾炒牛河」

「乾炒牛河」

「乾炒牛河」

你班友仔係咪想食到咁呀?!

我真係忍唔住答咗句:「做咩今晚大家變晒曹仁超嘅?哈哈」

當幾個人笑完,叫咗嘢,之後就有個西裝友入咗嚟。

「豆腐火腩飯。」

「先生,我--」

「豆腐火腩飯,我認真。」

全場呆晒。

「我未必完全整到,盡人事啦吓。」

終於,我用咗角煮用嘅豬肉,燒咗兩嘢,炸咗豆腐,埋咗個蠔油芡。可能我預咗今日會有千奇百趣嘅order,所以無端端諗起蠔油,就毫不猶豫買咗樽,果然有用。

cc photo via flickr user Rumi Yoshizawa

cc photo via flickr user Rumi Yoshizawa

我仲用咗碟上,佢想開口之前我就問「青島?我有私伙,一千零一罐。」

「好。」

上咗啤酒,佢斟咗落杯,但係冇飲,反而拎咗隻戒指出嚟放入去。

「本來,我想去第間餐廳同我女朋友求婚,但係佢話我無樓,唔嫁畀我。我就話,而家個市咁高,等佢跌吓先再買啦,但係佢話屋企一定要有樓先俾佢嫁如果唔係就唔得。然後我發現原來佢屋企人想將佢同第個人夾埋,因為嗰個人喺我女朋友開始講嘢之前出嚟拉走咗佢。」

「……嗰個人係我老頂。」

西裝友一嘢講晒佢今晚嘅故事,就開始拎起罐青島飲。啱啱聽完一個咁傷感嘅故事,三個曹仁超都靜晒,好彩無耐又有人入嚟。

原來係鍾意X光式影相嗰個女仔。

佢一入嚟就問:「hello,HARU呢?」

「佢今晚有事。」

頂,HARU唔嚟真係嘥,死仔原來已經有fans。

三個曹仁超woooooo一聲,好似前世未見過雌性動物咁。

「咩喎!單身體驗之嘛,又唔係man’s night~」

X光妹一睇就睇到嗰杯有戒指嘅青島。

「咦--」

我做咗個「殊」嘅表情。

「ANDY今晚好惡啊~~~」

「哈,我都未開口鬧人就好惡喇?你信唔信我遲吓整個『澳牛體驗日』?」

「你唔會嘅~地舖啲租咁貴~」

「話唔埋架,同樣都係通粉炒蛋,加返『北海道』三隻字賣多不知幾多~」

我真係費事同啲小妹妹一般見識,擰轉身睇吓幾個曹仁超,全部用不懷好意嘅眼神望住我。

我唯有用最經典嘅嘢KO三條友。

「咩啊,未見過靚仔呀?」

到最後個X光妹真係要澳牛餐,然後一手搶咗西裝友嗰杯有戒指嘅青島飲。

點知個西裝友同佢講:「你鍾意嘅,個戒指你攞埋去。」

點解佢一定要做啲會令人無言嘅嘢架呢?

「戒指你拎返,我要嘅係酒,不過你鍾意嘅可以俾埋你電話我~」

well,我諗今晚變咗單身聯誼日喇。

cc photo via flickr user Blowing Puffer Fish

cc photo via flickr user Blowing Puffer Fish

—————————————————

我以為今晚唔做情人節大餐應該都無乜生意,但係唔知係咪唔少人都覺得呢個idea都幾得意,呢晚我turn out都幾忙,而且多咗唔少奇怪要求,不過成晚好開心,交流都多咗。平時我七點收都會打個拳先瞓,但係今朝我一沖完涼,就一覺瞓到晏晝。

如果唔係HARU條死仔慘叫,我都唔會咁快起身。

「做咩啫你?」

「尋晚…尋晚…你做過咩嚟…」

咩呀?

「open rice啲食評一晚多咗三四個,仲有仲有文專講尋晚…我哋係咪要紅喇?」

我一睇到openrice頭一個最多人推薦食評,心裡面屌完又屌…

—————————————————————

二月十四日

 

呢篇係十三號同十四號嘅食評~

呢間嘢喺天后都一兩年,仲係生勾勾,我都知佢一定唔簡單~

但係估唔到呢間嘢除咗嘢食OK,兩個師傅都好。萌。啊~~~~~~~~~~~

(然後有張我搭HARU膊頭嘅相)

(再嚟一張我安慰佢嘅相!呢張仲要秀秀得好緊要,成張少女漫咁四邊都係星星!仆街吖…)

好,整返十三號食過咩先~

(跟住就係幾幅食物相)

其實啲相呢我就無咩effect做過,但係都好靚靚,味道都ok,但係對住佢哋兩個晒溫馨真係比我食公仔面我都會好滿意囉hehe

所以我十四號悶悶哋就去多次啦

十四號氣氛好好多呀,我估唔到指明single嘅場都可以咁好玩架。ANDY果晚個頭好狂野,HARU無出嚟,我講咗咩大家自己意會啦~~~

(HARU睇到呢度紅都面晒,做咩啫你?)

我叫咗澳牛餐,不過我唔算玩嘢喇,起碼有三個人叫咗乾炒牛河,仲有個西裝友叫豆腐火腩飯,佢真係整埋啊!嗰個人仲請我飲咗杯有戒指嘅青島~

哈,係咪好葡萄呢~~~~

—————————————————————

呢個係食評嚟架咩?!

我簡直唔敢睇comment。

不過HARU睇咗。

「ANDY…佢哋話我個樣好受feel呀……」

我已經諗唔到點應佢。

Anyway,為咗短期內唔好再俾人炒hehe,我決定繼續做單拖!

然後我上google,打咗乾炒牛河。

高人指點

comments