情人節介紹返我最喜愛的五部愛情電影

一年一度最x麻煩嘅情人節又黎。如果唔想出街同人迫,又唔想俾多幾草嘢為左貪個下「咋咋聲」,不妨好似新年搵啲睇到識背既周星馳應節一樣,係屋企睇下戲應節,一個人又得,一pair又得。以下就介紹返幾部我本人特別喜愛嘅愛情電影。留意返,係「我最喜愛」!所以請先收起你影評人嘅口吻評價呢個選單,多謝合作。

  • 孤男寡女
    我一直認為呢套係劉德華同鄭秀文合演嘅最佳作品。我永遠忘記唔到第一次睇呢套戲帶俾我嘅震撼。由細到大我都覺得劉德華係遙不可及嘅天王。但當我見到佢揸住架掛學神牌嘅電單車,對住一班「大包圍」發爛渣,歇斯底理地鬧出「妖!啲女都俾你哋溝哂喇」。點解?你咁靚仔都要發爛渣,咁我哋點算?無論翻睇幾多次都會笑得出。當然,仲有「紅豆沙,我頂我頂!」同埋「roger、roger、roger」嘅好笑;亦不乏「I need you」嘅感動,不妨再一次拎出嚟回味呢條分叉的感情線。

normal_4a3e3ef468be2

  • 下一站說愛你(Bangkok traffic love story)
    泰國近年除咗多鬼片,愛情片質素亦相當好,例如《初戀這件小事》同以下講嘅呢部都係。《下一站說愛你》因為曼谷地鐵(MRT)通車十週年而拍。故事圍繞一位三十歲,其貌不揚嘅盛女OL,同一位十分靚仔嘅夜班鐵路工程師,一場日夜顛倒嘅戀愛經過。劇情就唔係特別新穎,但勝在夠生活化。例如女主角每日返工「搭車又搭船」嘅情節,潑水節嘅盛況等等。劇情亦夠到肉,一個朝九晚五嘅白領,究竟能否與一個返夜班嘅男人相愛?相愛如果沒有同處,陪伴,又係咪戀愛?配搭鏡頭下嘅曼谷夜景醉人,會好想令人飛一轉。唔劇透咁多,保證你可以又笑又喊兩個鐘。

8e1ce1ad614f6123f16f230936c1f1aa

  • 心跳500天(500 days of summer)
    老實講,如果一pair人睇呢部戲,可能百般滋味在心頭。一個人睇,又可能有啲慘情。《心跳500天》用倒敍方式呈現一段關係的每個必然階段,由相識、相知、熱戀、冷淡,到分開。由心跳到心痛,十分到肉。一開始,男主角Tom就說明,這部戲是要獻給「八婆」summer,是擺明再見不是朋友系列。要是你一個人,也許電影會令你憶起過去甜蜜嘅回憶;又或者再一次挑動起你對前度嘅恨意。無論如何,希望看到結尾,我們也能被治癒。

24_1253034368V9C9

  • 西遊記之仙履奇緣
    呢部戲之神,已經唔需要我再花唇舌去解釋。「周星馳最好睇嘅三部戲」,「細個睇唔明,大個先睇得明嘅戲」等等嘅post都會上榜。由割櫈之作,到一百部不能不看嘅香港電影。除左真係睇幾多次都笑得出之外,一個保證你唔會再睇到嘅深情周星馳,仲有劉鎮偉導演對愛嘅理解。「我估中左個開頭,但估唔到個結尾。」紫霞話語剛下,五百年後,至尊寶轉世變成夕陽武士,紫霞成了普通人,站在城門上。那遲來了五百年,深情的一吻。「從前、現在、過去了再不來~~~」再看多少遍,都會俾呢個結局感動到眼濕濕。

0b875e3a284d301af4c4a11b7c18ee

  • 春光乍洩
    記得lecturer曾經講過:「好多大師,其實一世只係拍一個故仔,之後就係不斷翻拍個故仔。」王家衛嘅電影就係。從《重慶森林》到《花樣年華》、再到《2046》,再再到《一代宗師》,都係講一段有緣無份,無法留住,但刻骨銘心嘅愛情。《春光乍洩》之入心入肺,在於兩個係異鄉不離不棄嘅男人,有脾氣、有敏感、有脆弱,有各自想法,一個願打,一個願捱,但最終無法一起走到旅程嘅終點。梁朝偉拿著錄音機哭泣、張國榮回到空蕩房間看到檯燈、梁朝偉一人在瀑布下淋水……已經唔記得因為呢部戲喊過幾多次。無論一個人定一pair,都值得再三回味呢部傑作。

happy-together03

 

(所有圖片為網上截圖)

 

hangcheuk2003@yahoo.com.hk'

阿享

一個戒緊牛肉,但打邊爐仍然會忍唔住既耶青。

More Posts

高人指點

comments