坐飛機,拉唔拉後張櫈好?

cc photo by flickr user Henry Burrows

之前有人喺飛機上嘅食飯時間拉後張櫈,結果自稱比坐後面嘅人又踢又鬧。事主將件事放上網,留言嘅人嘈得仲激烈過條片入面。

咁到底張櫈拉唔拉好?

冇錯,無論你撐拉定唔拉,你都係有理據嘅:「張櫈有咁嘅設計就比拉架啦」係正確嘅,但「有冇諗過後面條友感受,你有冇同理心」又有道理喎。正如你都知坐得耐會想伸展一下,而拉後啲坐真係舒服好多,但你咁做嘅同時又會令後座嘅人更唔舒服。

但點解冇人諗過同後面嘅人講聲拉低幾分鐘?

坐飛機辛苦就個個都知,老實講如果坐到咁上下你真係想伸一伸直個人,拉下條筋咁嘅,好聲好氣問下人唔好咩?同人講你想拉一拉低幾分鐘,我相信如果後面嘅人冇嘢做係唔會點拒絕——如果你粒聲唔出就「彭」一聲拉後瞓低而後面食緊杯麵,佢唔打你算你好彩。至於點解人會咁討厭前座拉後張櫈?問題唔一定係本身拉櫈依個行為,而係因為你冇知會一聲就侵犯到本身屬於我嘅領域。你有權拉後,我都有權拉低個餐盤放嘢睇書架係咪?當一個人凡事都咁自私,你想可以有幾受人歡迎?拉櫈本身真係冇問題,你可以話依個係乘客嘅權利。你細細個啊媽比包薯片你拎返學校嗰陣都叫你請同學食架,有福同享咁話。係啊,你係可以一個人食哂一包唔分比人,但食得咸魚抵得渴,又要自己舒服到盡又要唔比人鄙視,難啲囉。

點解有啲嘢香港人做得特別樣衰?因為佢地真係會喺理論上可容許嘅範圍下用到盡佢地嘅「福利」,由飛機座位到自助餐點食最回本等等。唔係唔做得,但真係連見到嘅我都覺得羞恥。你又要人有同理心體諒你坐得唔舒服,但又唔諗下人地會辛苦過你都算,有要求又唔同人講,搞到後面嘅人發老脾就拍片話人地鬧你,依啲咁嘅例子真係一聽就知九成係香港人。

講體諒?講同理心?傻啦,香港人眼中有嘅只有自己。

毛言地

你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」。Fanpiece: http://women.fanpiece.com/moyinday/

More Posts - Website

Follow Me:
Facebook

高人指點

comments