當你覺得香港好灰無得救時……

cc photo by flickr user Ian Muttoo

cc photo by flickr user Ian Muttoo

返新工個零月,同部門算有三個同事:兩個老公係差佬,一個阿哥係差佬,佢哋份人ok咖,但尋日我做做吓嘢有一個同事喜滋滋咁同另一個同事講::「唉呀睇住直播嗰兩隻青政無得做議員真係開心!」我忙到飛天無得查證,心下一沉應該係講釋法,而我最唔開心嘅係有人會因為咁而好開心。

原來有人會睇住另一個人嘅權利被剝奪而感到開心。
我相信唔係一個人咁諗。

做到咁上下同designer傾計,佢都幾灰覺得香港無救,諗住睇時移民算。認真我都灰過,或者兩位青政真係會無得做議員。但諗多一諗,其實中共想打佢哋落嚟(由梁天琦開始),就會無所不用其極咁諗計,佢哋就算宣誓到都唔會做得長,咩咩入到去先慢慢玩係星斗巿民一廂情願嘅諗法。入到去,都應該係無得玩,唔係今次依個理由,就會有下次邊個理由,除非游梁二人放棄立場,變成民主派一樣扮住反對派然後乜嘢都接受,咁樣,游梁二人入到立法會又有咩用呢?

好多人都講過今次選舉應該係最後一次選舉,只係就算講過嗰批人都無法想像究竟立法會同選舉制度會點樣終結,到真係現兜兜出現依啲咁嘅「釋法」喺你面前,就不禁驚惶灰心了--我哋唔係早就預咗咖喇咩?而立法會,回望過去十幾年,有無任何政策通過咗而係有利於巿民?(我仲月月供緊嗰啲明知會俾基金佬呃錢嘅強積金。)

嘩好灰呀,我哋做咁多嘢香港依然係步入衰亡。係咖,現實世界唔係TVB啲膠劇,唔係你勇敢咁同中國說不/扭兩吓突然上面就會皇恩大赦俾你班曳仔繼續還珠格格咁吵落去,你有嘅一切唔努力保住就會失去,你嘅優勢佢會進一步削弱-但係!但係!我哋爛船都仲有三斤釘(唔止三分),而相比佢哋好想谷起嘅上海、北京、前海(come on James, is that a joke?),或者深圳,我哋有更強嘅根基同軟實力去通往世界邁向國際(我哋已經係國際城巿,而唔係發展中國家),佢哋恨都恨唔嚟。(所以我幾覺得donald trump上台都未必係壞事,crazy peopl act crazily。站喺香港利益嚟睇,我喜歡有人將中國列為貨幣操縱國。btw其實有無人認真睇過trump嘅政綱?定係只係笑佢發癲?)我哋嘅效率係全中國難以匹敵,我哋有嘅法制同財政系統就算係快要崩壞,但都仲係好過佢哋多多聲。

咁趁仲有優勢,又喺度嘥咩時間傷心灰心?我哋要取得國際嘅認同就要變更強大,全世界buy中國(同時我哋都知佢哋有幾鄙視中國)只係因為錢。香港要變得喺世界上佔有一席位,有利益輸送,無咗香港會好大鑊嘅話就自然有人出嚟保住香港。我哋未必軍事上夠人打,咁梗係尋求國際支援咖啦。

你會話,喂大佬你講嘅嘢咁大咁遠,國際嘅嘢我識條毛?好簡單你做好自己,think globally,你嘅才能如果係世界通用,你嘅老闆都係咁諗,好快香港係一個比新加坡/韓國更國際嘅地方,咁個spotlight就真正返番嚟香港,咁再有下一次想出催淚彈就有外資嘈個政府阻住佢搵錢喇。

#嗱嗱臨去提升自己 #我認真

12@son.com'

十二少

爾雅集第一台柱。可以fb messenger我: [email protected]

More Posts

高人指點

comments