好多人以為喺澳洲做嘢係等於唔駛做嘢

cc photo by flickr user Kevin Utting

cc photo by flickr user Kevin Utting

好多人以為,係澳洲做野,係等於唔駛做野既。
又有好多人以為,係澳洲做野,係一定可以準時收工既。
我可以話你聽,首先頭一項呢,就一定無可能;
至於第二項呢,就睇你做邊行、咩職位、入中咩公司、好唔好彩等等。

首先講係澳洲做野有無可能唔駛做呢?咁如你換個角度諗,如果有一個職位係唔駛做既,咁點解一開始會有呢個職位創造出來呢?加上而家市道唔好,無乜公司會咁樣駛錢,據聞以前既礦業公司係有好多錢咁樣灑,但近呢幾年mining boom 大勢已去,所以再無呢的「筍工」職位了。

然後講準時收工既問題,其實準唔準時收工,真係好睇你做咩行業、職位,例如你做超市的,如果你係收銀,據我所知,大多數係可以夠鐘收工,只要你隊個牌出來截住條隊(無錯,就係我地排隊最唔想見到的 “Sorry, this check out is closed”); 如果你係經理,今日又有少少麻煩野,例如邊個茂里做錯乜,的貨又唔知去左邊等等,可能你都要留低執一執手尾佢。

超市的情況我都係聽講的,銀行的情況個人就比較清楚,如果你係櫃位負責現金提存既同事,只要你埋到數,通常都可以準時走既。有同事話, 其實就算埋唔到數,理論上夠鐘就可以走,咁但係理論上係一回事,事實上我就真係未見過未埋到數佢地可以走,唔通你數錢數到一半掉低晒所有野行左去咩… 咁呢個情況之下係無乜可能實際走到既。

至於banker,駛唔駛超時工作,真係好睇個人表現同選擇。首先,我地既工作量係無定既,因為我地既工作就係幫公司搵客,咁你如果好多客, 當然你需要搵更多客既時間就相對減少(因為你已經有好多客啦嘛,各位同學數學上明唔明先?),但你多左客既同,亦都少左時間去處理有多無少既paper work、電腦紀錄、文件跟進等;呢間公司,每一個你搵過既客,不論佢地同意上來見你,定係無興趣,只要你同佢地對話過,都要做番電腦紀錄,加上有時的文件唔係話即刻即日做得晒,而係要等呢個補呢樣… 等果個補果樣… 又轉來轉去 email + fax 去幾個不同部門,而佢地又互相彈來彈去,有時就要等個客補文件,又會補錯、又會補漏,又或者完全無左件事;而另外有的客呢,就會係約左你之後,不停咁改期改期又改期,你就要改完改完又再改個電腦紀錄…(然後由段初再由頭再loop過)咁你要做既工作就會做極都做唔完喇…

mr@roo.com'

Mr. Roo

Mr. Roo 係香港人, 不過而家住係澳洲珀斯, 八十後算是第二代working holiday香港人, 現職澳洲銀行、坐房所謂顧問果的茂里 (當然不是葉朗程的級數啦). 由working holiday時既低級打雜, 捱下捱下, 終於捱到而家大企業..... 既低級打雜, 真係除左恭喜之外, 我都唔知講咩好。 唔駛返工就食, 有得煮、有得食, 有分享, 有係香港售賣澳洲特色零食同食玩.

More Posts

Follow Me:
Facebook

高人指點

comments