職場十九事-「卑鄙的讚賞」

cc photo by flickr user Bill Strain

cc photo by flickr user Bill Strain

細路個陣,好恨比人讚,那怕只係一件小事我都恨比人讚下。無奈我就係一個資質蠢鈍嘅人,所以換黎我更渴望有人讚自己。

到我人越大,我就開始好怕人地讚我,因為我發覺依家有人真心讚你個機率奇低,而佢地過黎讚你好多時都有著卑鄙嘅目的。

係呢到我同大家介紹返幾句我時常都會聽到嘅「讚賞」,而呢啲讚賞好多時都會出現係你身邊,如果你真係周不時會聽到,你真係要小心啲。
__________________________________
<<你咁好人,一定會XXX>>

例句:喂呀吹,我聽日個邊要搬貨,你咁好人,一定會幫我架可?

心理:大多數人都唔願意自己做一個仆街,都希望自己做個好人,而當有人讚你係好人,某程度上就默認你嘅自我認同。

真相:咁你想做好人囉,依家就係有個機會比你做好人囉!過黎幫下我手,將來大把機會比你做好人!

評級(五星為最高)
使用率:****
卑鄙率:**

解決:唔好被我外表呃左,其實我只係賤人黎。
__________________________________
<<唔怕喎,我地對你有信心架,我地撐你>>

例句:由聽日開始你要調去沙頭角到做。唔怕喎,我地對你好有信心,我地成班都撐你!!!

心理:當有人對你能力有所認同,你自然就將面前嘅困難同麻煩當做係考驗!你會絕對地努力加油!

真相:事實就係,有屎無人食,迫你去食嘅時候咪唯有同你講呢種咁困難嘅野係對你能力嘅認同。最後再加多句,會力支持你,包你一定落搭。

使用率:*****
卑鄙率:****

解決:你地咁撐我,真係好感動,我一陣就同老闆講我地共同進退!!
__________________________________
<<見你平時咁醒目,呢啲重要嘅決定,要靠你先得啦>>

例句:呀吹平時見你醒目,呢啲重要嘅決定,就一定要靠你先得啦!

心理:同樣係對你嘅能力同智慧所認同,最重要係今次可以做一個決定!成功左我就可以上位!!

真相:如果大家都知道呢件事掂過碌蔗,仲會唔會到你話事?之後班人咪就係:「那,係佢個日話負責架!」

使用率:***
卑鄙率:****

解決:呢個決定,我決定交比你地決定。
__________________________________
<<我當你係XX一樣架啦,等時都係靠你>>
例句:我當你係仔一樣架啦,你真係要加油,等時公司都係靠你。

心理:老豆!!!!!!!!!!!!

真相:你唔好以為呢樣野好假,好那多人都係咁樣信左個老闆或者同事,以為佢真係好睇住你,當你親人一樣。事實佢只係想同你拉好關係,繼續想你做多D免費野。

使用率:**
卑鄙率:*****

解決:老豆呀,你份人壽受益人轉落我名,我聽日就會為公司訓身架啦!

當我了解到社會嘅可怕,職場嘅醜惡,唔該你唔好讚我……求下你……

blow@king.com'

吹水皇

港豬廢青一名。 只想吃喝玩樂不勞而獲 不求踏實地但求公屋有期。

More Posts

Follow Me:
Facebook

高人指點

comments