《真田丸》第一集觀後感

(無責任的鳩吹,純粹講下個人感受者)

無時間煲劇既睇我截圖就明白既啦~ 你睇~仲唔系古裝版古美門~~~~

無時間煲劇既睇我截圖就明白既啦~
你睇~仲唔系古裝版古美門~~~~

一年一度既重頭制作,大河劇《真田丸》,竟然變咗搞笑據。因為笑位實在太多啦。

首先系係飾演主角真田幸村既堺雅人,無辦法佢老哥演時裝喜劇太過深入民心啦,諧星味實在太重,結果一睇到佢出場就笑左出黎。一如網友所講「我其實係唔係睇緊古裝版既legal high啊,古美門穿越咗去戰國吓~XD」,問題係你演緊既係真田幸村啊,戰國第一戰士啊,打到伊逹正宗既龍騎兵無鞋拉屐走、德川家康裙甩褲甩既日本第一兵真田幸村啊,即係趙子龍果類既人物黎架,認真啲比少少殺氣啦唔該…..

不過睇真吓,編劇係三谷幸喜,又難怪既,佢老哥最中意玩政治不正確,玩政治諷刺,喺《清須會議》已經見到佢既風格。所以諗落,搵阿堺樣嚟做呢個角色,可能都係有意配合劇本風格啦,ok 呢part 放過你。

笑位二,戰略大地圖。大河劇呢類歷史劇,多數以戰國時代為背景,果個時代七國噤亂,群雄並起,要交待個政治背景,戰略形勢唔容易,所以如果劇情中出現一幅戰略大地圖嚟交待下形勢無可厚非,會令到個形勢即時明朗曬。問題係,佢竟然出左光榮《信長之野14創造》既戰略大地圖,即時歷史感厚重既大河劇就變咗打機式既現代穿越劇啦,當時我飲緊水,即時成啖水笑到噴咗出黎,差啲俗親= =

笑位三,都唔算係笑位既,係覺得唔多夾啫,就係幸村佢老豆,真田昌幸囉。成套劇我最期待既角色,人設唔多match囉,man 過頭啦,昂藏七尺既中年大漢,加上果一身豪邁既毛皮著裝,我即刻諗起既係最新果套三國入面既馬騰,係,就係成個馬騰噤款。問題係,昌幸係天才級既謀士黎架!!!! 係果種醒到機峰處處,翻手為雲,覆手為雨既人物。能夠帶住小小一個真田家周旋喺武田、織田、德川、上杉同北條呢啲強雄之間既智謀之士。關原大戰時靠住千幾人,用出色既遊擊戰術同奇謀困住德川軍三萬幾人,激到德川家康生蝦噤跳。
關原之戰,日本分裂成東西兩軍既天下大戰,佢又可以諗到大仔投靠東軍,細仔投靠西軍,最終邊方勝都可以保住真田家,正一係公又佢嬴,字又佢嬴既神級軍師。噤樣既天才,通常係果種思慮深遠,言行有少少怪異,有少少神經質既人物(因為太醒太多野諗),所以係唔應該噤大隻噤man架。相比之下,喺《風林火山》入面飾演真田幸隆既佐佐木藏之介就最能夠演繹出呢種天才謀士既神粹。可幸既係編劇功力夠,安排比昌幸既對白字字珠機,總算為佢搶番啲分。

其他有代表性既角色方面,武田勝賴可以,上杉景勝可以,北條氏政可以,德川家康勉強過得去,係織田信長麻麻,無乜殺氣,壓唔到場。

前半段搞笑野多,不過後半段認真番好多。第一集選定既時間點係真田家依然侍奉於甲斐強雄武田家,家主係武田信玄之子武田勝賴。時值擁有戰國第一騎兵團既武田家喺長篠之戰比織田軍既火槍一鋪清袋。武田勝賴敗走,之後眾叛親離,被重臣小山田信茂所出賣,最終一族人自盡於天目山。

長筱之戰被視為係日本新舊勢力交替,時代進步既重要事件,選擇喺呢個大時代展開故事,將武田一族走向沒落時既最後時光,風聲鶴唳,人心遑遑,面對時代洪流既轉變果種無奈,都仔細噤刻畫出黎。

總之三谷喜幸既風格,就係既傓情,又玩野,用戲謔既手法去呈現大時代之下人既無力感。好定唔好就真係見人見智啦~

ming@ming82.com'

黃邪

黃書最好讀, 邪性最難馴。 Blog: http://wongchea.blogspot.com.au/ (見下)

More Posts - Website

Follow Me:
Facebook

高人指點

comments