旁門左味之:降火利器(上)-咸魚頭菜乾豆腐滑石湯

圖片來源:作者

圖片來源:作者

須知道,我地呢啲孤家寡人既,無人無物,做人唯一既寄托就係果少少口腹之欲,如果連食都無得好食既話,就真係唔好做人算啦。今次既虛火重症認真攞我命,搞到我成個星期食無啖好食,訓無覺好瞓,真係生不如死。然後過兩日成班老友又約我出去飲茶啦,如果到時我仲係咬唔到嘢既,就不如撼頭埋牆死咗佢算啦。所以為咗及早解決佢,我決定要出重炮啦,頭炮就係呢個:
咸魚頭、菜乾、豆腐、滑石湯。

個湯係好多年前一位中廚出身又精通藥膳既世伯教我既,果次又係重症,舊牙肉腫咗成半個月,隻牙痛到想甩咁濟。聽佢話一晚一劑,連飲咗三劑,加果幾日早瞓兼戒口,腫痛好快就散左。

材料好簡單﹕
咸魚頭:越大個越好,前輩教落越大個既越靚,效果越好。衰在栢斯買到既咸魚都係切咗頭既,搵唔到咸魚頭唯有用咸魚身都粗粗地頂住先啦,估計用咸魚係因為佢重鹽者,鹽係可以降火既,朝早起身飲淡鹽水都可以有下火既作用架。

白菜乾:中醫認為佢可以清熱除煩,解渴利尿,通利腸胃,廣東人家常清潤湯水之中最中意用既材料。

豆腐:性味甘涼,清熱解毒潤燥。 《本草網目》認為佢可以清熱散血。

滑石:味甘微寒,清熱解暑,《本草再新》認為佢可以清火化痰,利濕消暑,通經活血,消水肿火毒。藥材鋪有得賣,一次大概15-20g 夠用。

以上材料,半煲水,大火煲開之後轉中細火,滾兩個鐘左右飲得。重症既建議連飲兩三日,期間要戒口,生冷酸辣刺激嘢禁食,仲要早瞓。兩三日內見效。孕婦忌服。

好講住咁多先,聽日再講下篇。

旁門左味者,邪也~

延伸閱讀:芫茜皮蛋豆腐下火湯

ming@ming82.com'

黃邪

黃書最好讀, 邪性最難馴。 Blog: http://wongchea.blogspot.com.au/ (見下)

More Posts - Website

Follow Me:
Facebook

高人指點

comments