W hotel婚宴攝影師crew meal食餿-部份香港人無當過人係人

百五蚊港紙(+10%)可以食到啲咩?以前鏞記金牌燒鵝飯三盒(或一盒上庄拎走),翠華1-3個set meal,譚仔三哥4碗,麥當勞餐最盡7個,然後有攝影師朋友講起去W Hotel拍婚宴,新人俾咗HK$150+10%,結果係四碗白飯加幾粒菜心粒。人所共知啲飯仲要硬到仆街。

Crew meal係4個白飯,真係多謝曬 #whotel #whongkong #whotelhongkong

Posted by TY Yau on 2015年12月27日

係咪人食咖?

朋友叫我咪咁嬲住:「嗱其實本身W Hotel Crew Menu應該係咁,以前係正常嘢--係唔好食但唔係餿,今次可能係預人頭出咗錯,咁新人計錯數其實都無可厚非(邊個結過好多次婚?),所以酒店就硬夾叫佢吔食住白飯先。」

12443164_10153327745102636_1301831515_n

攝影界嘅朋友真係厚道,唔好食係正常,家陣有餿食住先……咁出面啲客少咗,阿部長你又會唔會叫個客食住白飯炒菜粒先?W Hotel婚宴我都去過,啲嘢幾好食咖!咁即係話:非不能,不為也。啲經理啲部長根本無當過攝影師等工作人員係人,佢吔根本無諗過佢吔係新人真金白銀俾錢出嚟請返嚟嘅。

望返份正常Menu;我真係好替啲新人荷包感到酸痛--Sorry W Hotel $150一個一人份量嘅星州炒米,福臨門足2-3人份量都係收緊我$200,人吔仲要好食。(非賣廣告)再望返啲白飯……即係你同我講依四碗白飯加幾粒菜芯可以換一碗福臨門排翅加竹笙加菜膽仲有錢找?!我日日同你換!(不鼓勵人食翅, but you know what I mean.成件事有幾痴線?無論喺定價上、安排上、待遇上。)

即問做乜唔買外賣?「酒店唔俾帶外來食物。」

連老麥都扼殺埋,俾條生路行吓好喎?

「其實呢,你都唔嬲得咁多,」朋友曰:「有好多客人又唔當 crew 係人。咁樣只會令人覺得佢冇涵養。我想講嘅就係咁啫。」

咁唔得咖嘛!唔係啲飯硬唔硬嘅問題,唔係今次瑤柱蛋白飯走瑤柱蛋白嘅問題,更加已經唔係好食同唔好食嘅問題喇,你搵個記者去訪問人吔去解釋「嗱,啲飯放耐咗就硬」係無用咖。依個係最基本需要廣大教育嘅問題!由酒店或酒樓開始,到唔少新人(突然諗起嗰個R免費影相媽媽),都應該正視人吔嘅付出係辛勞,而唔係由上到下被欺壓,而一直壓落去。婚宴界實在有太多shit,喺大意之中好似有唔少人都唔記得咗背後付出嘅人,忘記咗咩叫尊重。而依個風氣唔應該助長,點解啲人喺婚宴會鼓吹一翅都唔食?因為覺得殘忍。咁活生生喺你面前生勾勾嘅剝削呢?

你試過揹住啲機材辛水辛汗走成日,為咗同人影得靚靚嘅,然後by the end of the day望返住碗菜粒白飯,咁你會明咖喇。

p.s. 有個做婚宴化妝師嘅美女朋友,成日聽佢講會遇到怪獸客人--由於吉時關係五點幾要起身,一盒化妝櫃咁全日通山走,然後俾人壓價。姐姐,人吔化妝師確保你(supposedly)一世人一次嗰個大日子最靚咖,你乜都可以慳,啲相呢就留一世嘅~化妝師同攝影師唔應該壓價咖!

p.p.s.總之W Hotel一日唔改過,我唔知你,小弟(如有)婚宴一定唔會喺嗰度擺酒。係,我擺明係杯葛佢。有啲錯事要有後果,否則天下大亂--你睇吓點解689可以貪完又推惡法?因為佢無後果。

12@son.com'

十二少

爾雅集第一台柱。可以fb messenger我: [email protected]

More Posts

高人指點

comments