Mobile Payment?香港邊有market?

cc photo by flickr user Monty Metzger

cc photo by flickr user Monty Metzger

話說我從來都唔係一個high tech人,對科技產品嘅興趣亦遠不及時裝,所以原本無打算寫呢個題目。眼見前有人吠香港無進步,後有大陸app扮本地貨,唯有犯大忌講下自己唔熟悉嘅範疇。

點解由商業角度分析香港無市場呢?信用卡滲透率高,再加上八達通覆蓋範圍大,其實已經解釋哂。香港人未必有留意,其實信用卡喺香港嘅滲透率係高過美國同日本好多,數字就麻煩有興趣嘅朋友自己google下。相信唔少朋友自己都會買件百幾二百蚊嘅衫都碌卡,又見過D令人想講粗口嘅阿叔阿嬸喺超市買十幾廿蚊嘢都碌卡,真係唔洗再elaborate。更有趣嘅係八達通。八達通同日本嘅「攜帶財布」,亦即係mobile wallet,其實異曲同工,亦即係喺商業角度係mutually exclusive。八達通有幾方便、幾普及,大家香港人唔洗我講喇啩?

咁即係點呢?即係一個正常人,一日搭車食lunch去超市、便利店全部可以用八達通找數,出街晚飯、行街買衫褲鞋襪、買飛睇戲甚至係salon執一執個look,全部都可以用信用卡解決,基本上喺香港只可以用現金找數嘅情況一早就唔多,而到今時今日都唔接受信用卡或八達通嘅商戶,其實同樣唔會接受mobile payment(方便理解,大家可以用Apple Pay直接當mobile payment嘅方式)。如果有人認為屋邨文具舖、非連鎖式茶餐廳、魚蛋粉雲呑麵舖會唔接受八達通但會接受Apple Pay嘅,我真係想介紹你俾劉鳴煒,你哋一定好啱傾。

有人提過wechat有個功能叫peer payment。首先我哋暫時忽略wechat係強國貨其實應該唔好理呢一個重點,我哋又睇下個市場有幾大。提提大家,香港嘅收入中位數係萬五蚊,而大學生嘅收入中位數係一萬零八百。大家覺得廿至四十歲,會每個月都約班朋友飯聚,事後每人要夾二、三百蚊,仲一定會用mobile payment嘅peer payment過數嘅人有幾多?

其實mobile payment簡單講應該得兩種模式:prepaid,即係好似八達通咁,你入定錢落去可以隨時要嚟找數。會唔會有人隨時擺住幾千蚊喺個app度呢?實有嘅,正如我相信香港有40歲以下銀包隨時有幾千蚊喺度嘅人一樣,有嘅,唔係我啫。另一種就係直接可以喺你銀行戶口過數。咁咩私隱呀、保安呀之類嘅問題我外行人就唔再提大家啦,求其提下手繼費啦。銀行過數洗唔洗手續費?要。你用個app收唔收手續費?傻嘅,唔收,人哋食咩?咁即係有兩轉手續費?未必,可能三轉呢?商戶都要收。

咁宜家大家明點解有人搞mobile payment九成唔係香港公司啦?淨番果一成係咩?你知唔知呢個世界上最多係咪人?基督徒?中國人?錯,係蠢人。

aragorn.ho@gmail.com'

明鏡

商科出身,一直認為自己是商界奇才。大學時期嫌課程沉悶,把時間都花在哲學、文學上。近年興趣為時裝、電影。

More Posts

高人指點

comments