香港的森林

cc photo by flickr user Alias 0591

cc photo by flickr user Alias 0591

(筆者按:此文並非小說)
你係十九世紀嘅探險家。你同幾個朋友組成探險團去森林探險,唔好彩蕩失路。你哋冇 Google Maps、冇 GPS,淨係得指南針同基本求生工具。你認為向南行三十公里就會去到最近嘅城市,但領隊堅持向北。你望住地圖,見到北面只係無窮無盡嘅森林,如果一直向北行,就只會糧盡援絕。

你向領隊提出建議,游說佢掉頭向南。領隊話:「北面十公里有條村,可以借宿一宵。」你心諗:「好啦,十公里嗟,即管睇下點。」一團人繼續向北行十公里,乜都冇。你再次要求領隊轉折向南,佢話:「反正都行咗咁耐囉,可能條村就喺附近呢。」再行咗兩個鐘,都係乜都冇。

你拎住地圖,向探險團解釋情況:「根據地形,我哋依家個位置喺呢度。附近根本就冇村莊。向南行五十公里就有城市,趁住個天未黑晒,快啲趕過去啦!」領隊拎出另一張地圖反駁:「明明呢度有條村,我上年先嚟過,點可能會錯?或者村民搬咗去附近,大家繼續搵一定會搵到。而家都就天黑,我哋點可能摸黑行五十公里?」你開始鼓躁,大聲同領隊爭執。最後都係冇結論,你決定離隊,唔理領隊,自己向南行。另外有兩位團員都開始質疑領隊嘅判斷,願意跟你一齊向南行。

冇幾耐,入夜,狼嗥四起。你帶領嘅南方探險團發生內部爭執。你個團隊計埋你只得三個人,阿甲同阿乙。你認為冇足夠人手紮營守夜,所以建議摸黑前進,盡快搵到南方嘅城市。

甲:「橫掂都仲有幾十公里,不如我哋搵返大隊,同佢哋一齊紮營,好過我哋三條友乜都做唔到。我哋而家嘅共同敵人係狼呀,要團結一致先可以生存!」

乙:「仲向北行?咁我哋頭先咁辛苦向南行為咗啲乜?你頭先離隊嗰陣都明知要摸黑架啦,而家先反悔係咪遲咗少少呀?不如我哋劈幾條樹木整武器,咁起碼就算有狼嚟襲擊我哋,都可以同佢哋打過丫!」

甲:「哈!就憑你就同班豺狼打?快啲搵返大隊好過啦!」

乙:「你搵返佢哋,佢哋咪又繼續向北行。到時你想搵南方城市,就更加難喇。」

你聽佢哋不斷爭拗,開始唔耐煩:「喂,快啲繼續行啦!有乜好嘈唧!」你嘗試介入爭論,但係大家各執一端,冇辦法達成共識。最後,阿甲原路折返,阿乙留低紮營、起火、整武器,防狼。而你,就獨自一個繼續向南探險,去尋找地圖上嗰個南方文明。

其實,你從來未去過嗰個城市。究竟佢存唔存在,你自己都唔知。

散彈一號

全職文字工作者、應用哲學家。對「邏輯一致性」、「系統複雜度」之類的偏門學問獨有心得。在美利堅合眾帝國邪惡資本主義集團的領導下,嘗試改變世界。

More Posts

高人指點

comments