返工帶飯攻略

圖片來源:作者

圖片來源:作者

對於每個打工仔黎講,除左放工之外,最期待應該就係放食飯。有啲人日日都出去食,有啲人一星期出去一兩次,有啲人就日日留係office食,留得係office食既,就多數係帶飯架啦(今次唔討論係公司食杯麵超力米粉叮叮意粉麵包飲朝露練仙既人)。而我就係其中一個一星期帶四日飯既人。

每個人帶飯既原因都唔同,但係根據我既理解都不外乎儲錢,唔想出去,無飯友,想自閉,毒,好春多野做,食完想訓下,出面啲野又難食又貴,或者自己煮啲野真係好好食食少餐都唔得。

而對於我黎講,就每樣都有少少既。但係,再好食既野變左叮飯之後都硬係有啲怪怪地味,而點樣令自己個飯食落口無咁怪就開始成為一種我研究既問題。

叮飯最緊要係咩?……當然就係一個叮得既飯盒同埋個叮叮爐啦,飯盒有人會帶膠既(我),有人會帶玻璃既。膠就輕身啲,玻璃就感覺健康啲(有人話食用膠野會生cancer精神病發羊吊)同易洗啲。而個爐方面,就要知道佢既火喉喇,要熟悉自己盒飯當日既情況同埋個公司叮爐既火數,用經驗得出最佳既叮叮時間,咁先可以叮出熱熱既好滋味(拿我認真架)。

首先講下啲叮飯既基本功,飯同餸菜放入盒係唔可以壓到太實同裝到太滿,要留返啲空間比熱氣對流,咁個熱力先會均勻咁傳遞。叮既時候最好用盒蓋,保鮮紙,或者入得微波爐既蓋半冚住盒飯,等個飯唔好叮乾晒,亦都等佢既熱力可以有空間流走唔好谷住晒咁。當然,時間既掌握亦都好重要,我就叮開三分半到四分鐘不等既。如果叮到太熱辣親個咀,就點好食都無心情食落去,如果叮唔夠熱,食食下食到一個位係冰凍又懶行去再叮過,亦都會食到無mood。到真係叮到一個完美熱度既飯,亦都要摷一摷佢下面……等佢多餘既熱氣由底散咁啲出黎(上面話唔好裝太滿就係留返啲位摷下野),咁就可以開始享受呢一個鐘喇~

不過,要叮出一個好食既飯盒,入面既餸菜都當然要經過精心既挑選。肉個方面,一般係地上行走既都無咩問題,特別係係炆雞,蒸排骨呢啲有少少汁既就又唔易變味又好食,但係蒸蛋呢啲又易出水又叮完唔好食既就唔好喇。如果想帶海鮮呢,蒸既亦都唔係咁啱,同埋就要簡啲新鮮既,如果唔係臭左既話就成個飯盒都唔洗食。煎魚餅,煎鮫魚,蝦仁炒或者係我教過大家煮既炆魚肉釀豆卜同粟米斑塊都ok既,特別要留意既係如果啲汁係杰身既可能令佢難叮熱一啲,叮既時間盡量令佢放係一個比較受熱既位。

拿到打大佬喇!叮菜!我一直都覺得叮蔬菜類係令人慢慢唔想帶飯既其中一個主要原因,因為叮完既菜無論賣相,味道,質感,或者係個熱度都一樣係咁難以置信。但係因為現代人著重健康,又係好鍾意放啲菜係飯盒折磨自己。咁點好?只好簡一啲比較叮得同埋有啲調味既菜,例如係肉炒西蘭花,蠔油干貝煮娃娃菜,甚至係再重口味啲既南乳炆齋,都唔會有太大既變味。如果唔一定要食綠色既話,其實kimchi炒豬頸肉,或者菇類同豆製品都可以考慮一下。簡單黎講都係要用啲重口味既野煮過先啱帶架喇(咁其實好似都唔健康得去邊……)

當然啦,帶飯呢下野又唔係死都要帶飯帶餸,有時帶下炒飯炒麵都幾開心,我自己炒飯就一定落粟米既,當食菜。而炒麵就會加椰菜或者kimchi。有時亦都可以煮下意粉,白汁肉醬都得,係記得啲意粉唔好煲咁耐,雖然呢過左夜就點都唔會al dente 架喇,但係都無謂令佢好似米線咁既樣啦。

講到呢度,相信就算我點講都好,大家都唔會覺得帶飯係一件值得享受既事黎架喇,但係公司硬係會有人帶一舊變形金剛咁樣既首飾箱返黎叮,有時真係會想打到佢首飾箱變返藥箱。兩餸一湯加個白飯,夠膽同我分開四個爐黎叮,去Starbucks叫杯水坐一日都無佢咁有生活態度。其實我叮左兩年飯,真係無食過一餐叮飯會好食到想go through 一下,所以亦請各位自律,留返一個小小既叮叮爐比我快快趣趣叮完食完我就安落架喇。

食食食食懵你

鍾意煮亦都鍾意食,最鍾意就係食下啲家常野同滄海遺珠野。覺得好食既野唔一定在於佢有咩材料同煮法上既特別之處,而係在於煮既人對食物既一份執著,希望可以用呢個理念同大家輕輕鬆鬆分享食既樂趣。

More Posts

Follow Me:
Facebook

高人指點

comments