Salzburg – Home of the sound of music and MOZART

奧地利的薩爾斯堡,聽個名都覺得係充滿古典氣息的地方(最少我係咁覺得)。到訪之前,淨係知The sound of music(《仙樂飄飄處處聞》呀,Maria呀,DO-RE-MI呀)喺度取景,同埋莫札特喺呢度成長,其他歷史嘢我一概唔清楚。

之前同朋友去旅行(我仲要成日係同另一個女仔,兩丁友去),所有機票、車飛、酒店都係兩個人一手一腳訂,有商有量又要計好條數,所以我地會完全知道發生咩事、酒店喺邊etcetc,但係今次係同屋企人去,我就托晒手踭,叫老豆幫手book酒店。我要book自己啲trips同埋溫書,其實無咩時間哈哈,所以最後我呆吓呆吓落咗機之後就乜都唔知,跟住佢行。

一出到室外,好 鬼 熱。三十幾度,額頭即刻開始標汗。可能同香港嘅濕熱都仲有少少距離,但係歐洲多數地方都係無冷氣的。我地間apartment就係其一,我兩晚都係攤喺床,流住汗訓。個頭熱到煎得蛋,check完IN就即刻換衫出去玩。

所有圖片來源:作者

所有圖片來源:作者

旅行通常行嘅景點都係室外,今次都唔例外,第一站係Mirabell Garden,其中一個《仙樂飄飄處處聞》取景地,全室外,32度,無風,全乾煎,見到有幾個artists全身油晒銀色企喺度唔郁,我見到佢自己都就快中暑。個花園係好靚,但係烈日當空下,港女如我真係頂唔順,食完雪糕都解決唔到我就快熱到熟嘅問題,所以第二站即刻去室內嘅地方,兩個關於莫扎特嘅博物館。

之前講過,我就係真港女但偽文青,中五考完琴之後就無再認真彈過,而家見到五線譜啲flats/sharps都要諗一分鐘:究竟係咩major。不過莫扎特咁出名就唔會唔識嘅,不過就講唔出佢有咩作品咁囉⋯⋯所以今次行完兩個博物館,我又變返呃得人嘅偽文青。果兩個館由佢嘅生平,出世到大個到死,每一個stage都講清楚,又講佢點唔如意呀,點病呀,但都堅持寫到好多膾炙人口嘅作品etc,跟住果一晚返到apartment熱到死嘅時候,就即刻開YouTube聽佢嘅歌,原來咁好聽嘅,點解之前聽極都係音樂堂教果一兩首?

IMG_8655

第二朝又係一早醒咗(熱醒咗,無冷氣訓真係唔係講笑),就搭車去薩爾斯堡附近一個喺德奧交界嘅山(薩爾斯堡好近德國,唔洗兩個鐘火車就到慕尼黑),搭電車搭上1800米高就可以俯瞰Salzburg全景。上山前仲心諗:上到1800米一定會涼少少,唔洗再不停流汗啦,點知上到去真係天真咗,事實係我同太陽近咗1800米,我覺得更加熱。(無讀地理唔知點解,不過上到去真係好熱,熱過山腳)。不過向下一望,嘩成個薩爾斯堡都喺我腳趾之下。個山有少少遠,唔係好似去Firenze/Cesky Krumlov上市中心塔頂咁,你要行一個圈先睇得晒全景,今次係你企定一個位就會望到成個城巿,仲見到中間有條河貫穿。(經過呢幾個trip我發現好多歐洲城市都係咁,除咗之前去過嘅Firenze ,Bourton-on-the-water,Prague, Cesky Krumlov,仲有我寫文呢吓身在嘅Vienna),由高處望落去見到條河間開一個城市為兩半。

IMG_8657

行完落黎去埋手信街,每一間,真係每一間舖都賣莫扎特朱古力,我發現全奧地利都係賣呢樣嘢(啱啱喺維也納火車站同超市都好多)。就係一粒朱古力,不過用莫扎特招紙包住。前幾年有朋友嚟Vienna GYLC,買咗一盒返去請我地食,望落幾靚心諗無伏啦,點知一咬,救命,入面係杏仁醬,好唔好意思咁即刻lur出黎,因為我真係完全唔受得杏仁味,朋友同我去茶記食嘢我唔俾佢叫杏霜的(yes,因為我係港女,有港女格)。行咗幾間之後,發現全線莫扎特朱古力不論包裝同形狀,都係朱古力外層包住杏仁醬同開心果醬,點解係杏仁醬呢?係咪莫扎特好中意食⋯⋯

雖然薩爾斯堡真係好靚好有小鎮風情,但係熱咗兩日真係唔太好受,一沖完涼出返去一分鐘內就可以開始慢慢出汗。所以我地三個第三日喺有少少唔捨得薩爾斯堡之下,就少少開心咁執嘢走人去今個trip第二站-一個更加人間仙境嘅地方。

ding@ding.com'

dingding

最後一年留學,瘋狂打工攢錢再瘋狂浪遊。

More Posts

Follow Me:
Facebook

高人指點

comments