等到頸都長嘅丹麥交流生又係食啲咩㗎?(三)交流篇

讓大家久等啦,今次係咪真係頸都長呢?……近排好似少咗好多異地交換生飲食文章咁,而喺呢個時候,丹麥交流生飲食終於強勢回歸啦,有無掛住呢!所謂慢工出細貨,闊別成個月重出江湖梗係有好嘢食(睇?哈哈)!出發啦出發啦!再講等唔切啦!

上兩篇有精彩家常便飯,又有愛心涼茶靚湯,咪已經完美囉,重爭啲咩喎?
欠嘅,就係對題。即使我寫多千千萬萬篇自己煮得有幾grand,咁不如返香港煮啦,使去丹麥咩?關鍵在於「交流」,而交流生要做嘅,正正就係交流嘛。所以,今次同大家開party,認識世界各地嘅朋友仔!

第一站:中式北方菜

中國地大物博,博大精深嘅烹飪藝術你識幾多?第一篇我都提過,初頭真係亂咁煮,只要營養均衡、放得入口就收貨。正當我以為之後四個幾月都係咁過嘅時候,我roommate認識咗一班mainland同學仔,我同佢經常形影不離,好自然我都會識到新朋友。呢班同學仔來自四川、北京等地,自然煮北方菜。嗰日去完Aarhus個Deer Park睇完鹿同去完外面個沙灘吹水片石仔之後,佢哋就話要請我哋去佢哋屋企食餐便飯咁話。話咁快,全世界踩晒單車飛晒去買餸同煮飯,得返我同另外兩個朋友慢慢搵巴士。

去到人哋宿舍,我哋被委派負責等食,喺common room玩完桌球又彈鋼琴。終於開飯啦……哇!無眼花呀嘛?!六餸一湯?!完全有酒樓水準,當佢哋問咁我平時煮咩㗎?即時口啞啞:平時嗰啲……點見人。。。

所有圖片來源:作者

所有圖片來源:作者

仔細留意,唔難發現好食嘅秘訣其實在於千變萬化嘅醬汁。我太慳,嗰時連豉油、蠔油都唔敢買,單靠鹽當然無辦法做到。而且佢哋會將三種以上食材煮一道菜,最深刻係薯仔、青色燈籠椒同矮瓜一齊炒,原來可以咁!嗰一晚之後,我被打通任督二脈,克日趕赴Asian Market增購豉油蠔油,開始鑽研點樣保持健康飲食咁適量調味。(註:嗰晩之後返去上網做research先知,原來薯仔青色燈籠椒炒矮瓜有名堂㗎!叫地三鮮,係北方菜。呢班朋友真係深藏不露好厲害……)

第二站:燭光紀念日

不經不覺,exchange已經嚟到一個月。喺呢個咁特別嘅日子,當然要好好慶祝一下。(其實係因為個廚房太污糟,大洗完一日即刻回復原狀好似暴風雨過後,所以過唔到caretaker嘅inspection,我哋再大洗完之後,樓主決定實行cooking ban,直至過到覆檢,免得每人被罰500 kr.清潔費;真係冤枉,我好乾淨㗎……真係連坐法!)燭光紀念日就係咁半自願誕生。

要對自己好啲,梗係要食好啲。至於美食哪裏尋?最唔用腦嘅方法就係去River Aarhus — 市中心嘅心臟地帶。河邊café、bar、餐廳林立,價錢當然都不菲。不過我哋無懼價錢,世界上總有方法食到又平又靚嘅嘢嘅!Intro Week嗰陣tutors帶過我嗰組去街尾一間意式自助餐餐廳dinner,100 kr.任食餐包前菜main courses,加十幾kr.再有兩杯飲品,對我呢啲窮苦學生嚟講,一次半次都唔算好過份啫!

九月已經早咗好多天黑,入夜之後出面凍凍地,入到餐廳一陣暖和,好舒服。今次得兩個人撐檯腳,配埋窗外美景同柔和燭光,真係唔捨得走。自助餐有兩個壞處,一就係啲嘢食好鹹,好彩一早裝定水出嚟飲(都可以帶定個樽去洗手間斟嘅……),亦唯有清晒所有西瓜當水飲。第二就係100 kr.就係100 kr.,唔好抱太大期望,有無聽過有人喺香港食自助餐試過試晒所有嘢食?而嗰晚,我同roommate都唔知將間餐廳反轉再反轉,食過幾多round同一樣嘅菜式啦。

Buffet

而最懷念嘅係,自己額外叫嘅Tiramisu!雖然好多cream,但唔緊要,破誡一次無壞啦。係就係貴貴地,但為今餐加咗好多分,非常滿足。

Tiramisu

第三站:生日家常飯

話說我roommate生日,嗰晚約咗另一個同學三個人喺我間房開迷你生日會。嗰晚我發板㗎,其中一道主角菜非豉油豆腐莫屬。Roommate最鍾意豆腐,幾貴都要買。豉油豆腐都係佢嘅家傳菜式,做法簡單,卻係人間美味!另外我用蛋白同蠔油自創咗個芡汁,配埋蒜蓉炒蝦撈飯,真係一流!好開心見到自己有進步!

同學送埋花畀roommate做生日禮物,真係sweet到爆。

Birthday

第四站:捷克.香港

唔知香港人同捷克人係咪有情意結呢?我同我roommate分別最熟嘅新朋友都係捷克人,而佢哋幾個又係朋友,重要住埋一齊。所以,有一晚佢哋決定要煮捷克菜請我哋作客。

頭盤已經好吸引!

Czech Appetizer_1

加上可可粉、肉桂粉、蜜糖,簡直五星級享受。

Czech Appetizer_2

漏影咗個main course真係全晚最大敗筆,道菜叫Goulash,當晚食嘅係用牛肉做,無加捷克最有名嘅Knedliky。

最後一個布甸加咗同學嘅家傳之寶 — 一支歷史悠久嘅生果酒,而另外佢只係斟10 mL畀每個人試下,one shot感覺認真盪氣迴腸,尤其平時我真係滴酒不沾,點解又要破誡呢?

Czech Dessert

第五站:香港.捷克

話說剛剛痴餐咁過癮,已經知道大難臨頭。同學早就言明:Next time is yours! 為此我同roommate驚咗好耐,平時我哋食得咁清淡,又無咩顏色,外國人會唔會唔鍾意食㗎?兩星期後輪到我哋主場,我哋見隔離房個北京同學有晚整扣肉,色香味俱全,即刻去求教。佢好耐心教我哋步驟,我返房第一時間背默所有重點;佢重好好人借支醬油畀我哋用(醬油深色同濃味過我哋支生抽),今次去超市唯有擰轉頭忍痛買包五花腩,最多我唔食啦,最多只係食肉唔要脂肪啦……我不停搵藉口令自己良心好過啲。

最後我roommate好叻,一個人煮好大半五花腩,加上豉油豆腐、蒸水蛋、西蘭花炒蝦同終極糖水芝麻湯丸,好感動大家讚不絕口,我哋無失禮粵菜!香港學生廚藝總算無失禮於人前,哈哈!

Hong Kong Dinner

同捷克同學食飯真係好開心,下次陸續有來!

tntintin88@yahoo.com.hk'

丁丁

只要在同一片天空下,就有夢想環遊世界、熱愛音樂與寫作的丁丁。

More Posts

高人指點

comments