小病是福

Attached is the photo of the congee that my friend specially cooked for me.... Doesn't look good but full of love :')

Attached is the photo of the congee that my friend specially cooked for me…. Doesn’t look good but full of love :’)

孤身一人出國讀書,離開屋企人,朋友同自己成長嘅地方放洋留學,俗啲講句都叫第一次遠離溫室凡事要靠自己,所以遇到都係香港過嚟嘅朋友難免會同聲同氣,互相照應。好多人會成班朋友一齊出去租屋住,平時上堂一齊坐吹吓水,幫大家簽attendance 拎份notes,放假唔返香港就一齊去個歐遊見吓世面,而有難是當然都會雙脇插刀去互相打救。平時我同佢地都係圍威喂多,但近來一次小病佢地嘅關心真係令我感動流涕。

話說我復活節就去咗幾個地方玩,喺挪威臨飛返英國果一日就去咗當地漁巿場買海鮮食個farewell dinner,我仲影咗袋蝦up上咗我個page話好鮮勁好食。點知果晚返到英國坐車返學校就開始嚟料,好想嘔又嘔唔出。諗住係食滯咗(但其實唔係真係食咗好多,食完係飽,但絕對唔係超飽或者飽到想嘔)或者輕微食物中毒,果一日開始好無胃口,食多少少都想嘔。返工叫外賣都唔敢叫肉,淨係叫白粥⋯⋯陰公,我無肉不歡。

返咗英國兩日之後我又出發去柏林,訂呢個旅程之時我已經幻想緊去到德國日日飲啤酒食豬手currywurst(咖哩腸)同PRETZEL(一隻德國好出名嘅包,比較硬同乾,但加芝士或者搽牛油真係好正⋯⋯),點都無諗過人算不如天算,病住去德國真係無啖好食。同行朋友餐餐都大大杯啤酒大大隻豬手,我頂盡都係飲少少蘋果汁食少少生果就已經再食唔落。仲要偶然行咗入個food market入面好多好多好嘢食佢地狂掃街我得個睇字⋯⋯

四日無啖好食後返到英國,以為都過咗一個星期啦應該無咩嘢。一返到第二晚我要返工嘅,星期日晚唔太忙就同老闆同鬼仔吹吓水又偷吓食。點知飲咗兩啖豆漿轉個頭就嚟料,衝入廁所嘔。覺得自己仲有排病所以就send個text比朋友講話可唔可以教我煲個白粥等我可以係房攬住煲粥過世啦,佢一聽到我嘔完即刻嚇親,話第二晚去佢屋企煲粥過我食,果一吓好感動,有人秒回你仲要煲埋粥俾你。

今日無堂留係房做功課,做做吓有人敲門一開門成班朋友係晒出面睇我死得未,仲買埋朱古力俾我做康復禮物,hotel chocolate呀!開心死我。一齊行去朋友屋企,朋友係廚神(詳見 究竟英國留學生係食啲咩嘅呢?  佢就係文中所講嘅廚神),前一晚收到我text已經即刻漫定瑤柱預備今晚煲粥俾我食,我知道果吓更加感動。最後大家齊齊排排坐陪我食粥清腸胃⋯⋯

唉我好老土,而家諗返仲係好感動。話晒而家都就快考試,都有人肯早早準備同埋用2個鐘頭就係煲一煲粥俾我呢個病人。

拿附圖就係呢碗糙米瑤柱白粥,唔係咩大魚大肉嘢但係真係好有愛⋯⋯

ding@ding.com'

dingding

最後一年留學,瘋狂打工攢錢再瘋狂浪遊。

More Posts

Follow Me:
Facebook

高人指點

comments