港女瘋狂遊

我知道我旅行的次數相比起其他留學生算是十分多,所以有朋友十分驚訝,也常常有人問我究竟錢從哪裡來,讓我得以常常把腳毛留在別國。有的熟悉我的人知道我是打工把錢賺來然後轉頭便花去,但也有人一口認定我是向家人伸手拿錢月月浪遊。

雖然大多數認識我的人不會看到這篇,但還是打一篇解釋一下我為何常常去風流快活,也令留學生知道其實像我般常常出走並不難。

你只是需要一份工作。

前文提到英國人十六歲起很多就開始出來打兼職工賺錢,相比下香港學生(特別是大學生)畢業前除了為了執靚CV而打的internship及高薪私人補習,很少人會到零售店/餐廳等地方打工。但來到英國,找個英國學生教中文並不容易(而且我的普通話有點shit),所以留學生可以選擇的多是餐館或零售sales工作。有名你叫留學生,大部分學生家底優厚(我真的是最窮⋯⋯但人窮志不窮!),日日出入搭的士,餐餐出外食十幾廿鎊屢見不鮮,你可以說我輸在起跑線,但我能夠自己賺錢請自己去旅行,這份滿足感不能用筆墨形容。(唔係話其他人敗家或者懶,各人有自己的路,我都係放棄溫書時間去返工,我都唔係好學生 ;p)

第一個星期打工賺到的錢,買機票。

三年以來我每次搭飛機都永遠搭廉航,easy jet or ryanair,嚟緊暑假會試埋monarch。間唔中BA都會有同廉航差唔多價嘅飛,咁就可以坐得舒服D,有野飲同包花生食下。

廉航嘅好處就係通常極早就起飛,6,7點就飛,所以我每次都搭夜車去到機場訓一晚⋯⋯係好辛苦,但趁後生就當體驗下,而家已經成功坐coffee shop或者瞓地下都瞓得著。

仲有,easyjet ryanair果種平絕對唔同UO MM HX果啲所謂funfare,呢面嘅廉航真係廉,唔會好似香港咁一張699但又未連稅,最後埋得單都唔係promotion果個價。呢度真係見到幾錢就幾錢,經常£20就買到一張單程連稅飛去大部分歐洲航點嘅飛。 所以機票錢比較易解決,一個星期搵嘅錢通常都夠買一張 return ticket。

第二個星期打工賺到的錢,訂酒店。

當然唔係住貴野,我係窮遊。反正我去到旅遊點都係出街流浪多,晚晚返房沖個涼報個平安就訓,第二朝起身又出去再玩過。所以酒店從來都唔洗靚,亦唔洗包早餐,因為連鎖酒店食極都係食果D,但你出去街就會食到當地人嘅地道口味。最緊要最緊要係平,其次係近車站,始終有時獨遊一個女仔天黑都怕唔安全。

要體驗當地風情點少得住人地屋企。首先聲明我從來唔couchsurfing,係就係慳到錢,但時不時有意外發生;我女兒身無謂慳果少少搵命搏。而且我覺得couchsurfing你無理由當人地屋企係酒店,如果同個HOST唔夾咪盞無癮。所以我會俾錢揀啲好評多嘅HOST嚟住,SO FAR住過咁多次都無中伏。仲係盧森堡識到個好好嘅HOST,果晚一路飲一路傾又醉又攰,但我好中意咁哈哈。

第三個星期嘅糧,就係去到當地嘅洗費。

交通,飲食,手信,明信片,郵票等等,全部都係呢舊錢搞店。個個地方生活指數可以差好遠(例如瑞士太貴我暫時真係無錢去,同一個BUDGET夠我豪玩DOUBLE日數嘅東歐)。所以生活指數比較低嘅地方就可以充大頭做豪客,相反,咪食平啲囉。後生女就好FLEXIBLE嘅。

不過有一樣無論如何都唔可以慳,寫POSTCARD。唔知幾時開始養成儲POSTCARD習慣,每次出遊都會寄一張返香港俾屋企,熟嘅朋友去都會厚面皮要求POSTCARD當手信(如果我要求過你你又有寄俾我,而家我公開講一聲我愛你!)儲下儲下都有一大疊,睇返嘅時候好有回憶,個心飛返去嗰一刻。

最後一個星期,就係dream comes true的時間 🙂

踏上旅途,到新的地方豐富自己的人生~

cc photo via flickr user A.M.

cc photo via flickr user A.M.

 

ding@ding.com'

dingding

最後一年留學,瘋狂打工攢錢再瘋狂浪遊。

More Posts

Follow Me:
Facebook

高人指點

comments